San Juan 11:1-23

¹Bzu tub mbecy rat: yu nu la Lázaro. Yu zeꞌ tub mbecy Betania, gyedz zeꞌ nu rcyiiñ Li nu bily ñii Mart.

²Laab Li zeꞌ, fiñ zeꞌ nu pcoo asecy zguul gyiꞌ Shuaan den Jesuuz. Orzeꞌ pcuiigy ñi gyiꞌm nu gyich ic ñi. Fiñ zeꞌ zan Lázaro, yu nu gurat zeꞌ.

³Orzeꞌ rup laa deñ nu bily ñii bzeed ñi tub raso̱o̱ lo Jesuuz. Orzeꞌ na raso̱o̱ zeꞌ: ―Shuaan de̱, amig nir riib rat ñi ―na raso̱o̱ zeꞌ.

⁴Na ornu güeñ Jesuuz raso̱o̱ zeꞌ, orzeꞌ nam: ―Tees güii zeꞌ walab nu zaꞌ loñ yu tub tir ziꞌl, sinu gush güii zeꞌ par nu gabe nu dzi lily na Ñgyoozh, nunu niꞌ ziꞌl par nu gabe gyel lily ne̱ ya̱, iꞌñ mi ―nam.

⁵Na Jesuuz tonaꞌ la guzañ lagy mi Mart, gal nu bily ñii Li, gal nu Lázaro.

⁶Tees ornu bri raso̱o̱ nu riib rat Lázaro, orzeꞌ byeeñ mi se cyup dzi lugaar zeꞌ nu rcyiiñ mi zeꞌ.

⁷Na ornu bded cyup dzi zeꞌ, orzeꞌ nam rab mi de yu nu rsyaꞌ lom: ―Yaa gaꞌ der gyan Judea tuubaꞌ tir ―nam.

⁸Orzeꞌ na de yu nu rsyaꞌ lom: ―Masht, ¿a walab nu sa ñuu, de mbecy Israeel bicy pee dey ngoow gyitaꞌy ru gashtal ñgyat lar? ¿Walab gaal rlagy ru gya gaꞌr tuubaꞌ tir? ―na dey.

⁹Orzeꞌ na Jesuuz: ―¿A walab rishli nu trocyup or ndeꞌ yuꞌ yaa nañ tub dzi? Benu ca na tub mbecy rded yu zeꞌ nu yuꞌ yaa, orzeꞌ waglagy gyiꞌy, gun rzac dey ya̱, biñ nu rbic yaa lo de mbecy gyishlombecy ii.

¹⁰Tees benu rded yu rel, orzeꞌ rlagy gyiꞌy, gun sac yaa nu gzac yu.

¹¹Orzeꞌ na gaꞌm: ―Lázaro, amig ni den, gush pcaal yu, tees na cha̱ gun cueeña̱ yu ―nam.

¹²Orzeꞌ na gaꞌ de yu nu rsyaꞌ lom: ―Shuaan de̱, benu nas yu, ¿orzeꞌ yaruuñ nu gruu nap yu shiñ? ―na dey.

¹³Tees riidz ni Jesuuz yaruuñ nu gut Lázaro, tees de yu nu rsyaꞌ lom guzii dey nu mniim nu nas ziꞌl yu.

¹⁴Orzeꞌ Jesuuz naal la mniim lo dey. Orzeꞌ nam: ―Gut Lázaro.

¹⁵Tees nu nac de ru yet lagya̱ nu saca̱ loy, gun orzeꞌ gyicy cup der consuel lo̱. Yaa der chan lo cuerp na ―nam.

¹⁶Orzeꞌ Tomaas, yu nu rnii dey cuach, nay rab yu deꞌ zir de yu nu rsyaꞌ lo Jesuuz: ―Yaa der cha dun masht nin, gun orzeꞌ gat den tublaazh dun mi ―nay.

¹⁷Na ornu bri Jesuuz Betania, orzeꞌ briic mbecy nu gad lagy mi nu bi gut Lázaro nunu bi bzaꞌ tap dzi nu ri cuerp niy gyerbaa.

¹⁸Betania, ndeꞌ tub chon miily metr nu zet riñ nu Jerusaleeng.

¹⁹Nunu zigy de mbecy Israeel za güii dey Mart nu Li nu cuic dey consuel ni deñ nu nac nu gut zan ñi.

²⁰Na ornu güeñ Mart nu bi zaab riidz nu bi yeed Jesuuz, orzeꞌ za cheel ñim. Tees Li byeeñ ñi yuꞌ.

²¹Orzeꞌ na Mart rab ñi Jesuuz: ―Shuaana̱, bicy na nu zur ii, orzeꞌ cueꞌ ñgyat zana̱.

²²Tees rad lagya̱ nu mas na, Ñgyoozh gyicy mi la ziꞌl coz nu cyiñ ru lom ―naañ.

²³Orzeꞌ na gaꞌ Jesuuz rab mi Mart: ―Zan ru gyabañ yu tuubaꞌ tir ―nam.