San Juan 11:1-23

¹Betaniamanta caj uj runa, Lázaro sutiyoj, onkoska carkan, chay llajtallamantataj panancunapas, María Martapiwan.

²Cay Lazaropaj panan María, Señor Jesuspaj chaquincunata sumaj k'apayniyoj perfumewan jawerkan; chujchancunawantaj ch'aquicherkan.

³Iscaynin panancuna Jesusman willachimorkancu: —Señor, amigoyqui onkoska —nispa.

⁴Jesús chayta uyarispa, nerkan: —Chay onkoyka mana wañunanpajchu, manachayri Dios Tata Churinpas honrawan alabaska cananpaj.

⁵Jesús Martata, Mariata, Lazarotawan sinchita munacorkan.

⁶Chaywanpas ‘Lázaro onkoska’ nispa willajtincu, iscay p'unchaytaraj quedacorkan.

⁷Chhicamantaraj discipuloncunata nerkan: —Ujtawan Judeaman purisunchis.

⁸Discipuloncunataj nerkancu: —Yachachej, kaninpalla judiocunaka rumiwan chhokaspa wañuchiyta munarkasunquichis. ¿Ujtawanchu jakayman puriyta munachcallanquitaj?

⁹Jesús contestarkan: —¿Manachu uj p'unchayri chunca iscay horayoj? P'unchaypi purejka mana mitc'anchu, cay pacha c'anchaypi puriskanraycu.

¹⁰Tutapi purejka mitc'an, mana c'anchay caskanraycu.

¹¹Nillarkantaj: —Amigonchis Lázaro puñupun. Rijch'achimusaj.

¹²Discipuloncunataj nerkancu: —Señor, puñupun chayka, alliyachcaskanta ricuchin.

¹³Jesuspaj niskantaj niyta munarkan Lázaro wañupuskanta. Discipuloncunataj pensachcarkancu puñuchcaskallanta.

¹⁴Chayraycu Jesús sut'incharkan: —Lazaroka wañupun.

¹⁵Kancunaraycu cusicuni mana chaypi caskaymanta, astawan creenayquichispaj. Jacu, khawamusunchis.

¹⁶Mellizo sutiyoj Tomás discipulocunaman nerkan: —Nokanchispas purisunchis, paywan cusca wañunanchispaj.

¹⁷Jesús chayamunanpajtaj Lazaroka tawa p'unchay p'ampaskaña caska.

¹⁸Betania llajtaka carkan quimsa kilómetro jinalla Jerusalenmanta.

¹⁹Achqhayoj judiocuna Martata Mariatawan watoj puriskacu, turan wañuskanmanta sonkochanancupaj.

²⁰Marta Jesús chayamuchcaskanta yachaspa, taripaj lloserkan, Mariataj wasipi cachcarkan.

²¹Marta Jesusman nerkan: —Señor, caypichus cawaj carkan chayka, turayka mana wañunmanchu carkan.

²²Chaywanpas noka yachani imatapas Diosmanta mañacojtiyqueka, pay konasunquita.

²³Jesustaj payman nerkan: —Turayqueka causariponka.