Isanquienare Joa 11:1-23

¹Isaviqui Vetaniaqui shirampari pajitachari Irasaro, yojoquiitaca. Osaviqui aisati ivancoqui iritsiropee: jero Maria, jero Marita.

²Chapinqui osaitiri Maria Avincatsarite iitiqui. Iro osaitantari casancajari. Oshetantajari oishi aisati. Ari yojoquiitaca ojariri,

³irootaque otiancantacariri camanterine Jesoshi. Arejiqui ijatashitaqueri. Ineantapaacariri icantapaaqueri: —Novincatsarite, yora Irasaro pinintasanotiri, yojoquiitaca.

⁴Iquemavaqueri Jesoshi, icantavaqueri: —Yojoquiivetaca, iro cantaincha eiro icamasanotitsi. Iro yojoquiitantacari, icoaque Tasorentsi impincatsatanteeteariri, aisati impincatsatanteetenari narori.

⁵Jesoshi inintiro iroori Marita, ireento, jeri ojariri.

⁶Ari iquemacotitacari yojoquiitaca, iro cantaincha apite quitaiteri isavicanaque.

⁷Irosati icantantajana aisati icantajeitiri itsipapee iroamerepee: —Tsame ampiajeitanaje aisati Joreaqui.

⁸Nocantanaqueri narori: —Chapinqui, oametanari, anta impichaaquempime ashanincapee. ¿Ariompa pimpiashitanajeri aisati anta? Eiro ajatitsi: yoicari.

⁹Yacanaquena: —Noshiacantempiro. Icontetapaaque catsirincaiteri, iquitaitetacotapaajee. Ariorica inquianaje, ari ontsiteniiteanaje. Yora aniitatsiri quitaiteriqui, iniiro oquitaiteti quipatsiqui, irootaque caari itsitincanta.

¹⁰Iro cantaincha itsitincajeita aniitatsiri tsiteniriqui. Iro itsitincantacari, tecatsi quitaitetacoterine.

¹¹Aitaque icantaquenari. Irosati icantantanari: —Maanaqueyea Irasaro. Nojate meeca noncaocapaajeri.

¹²Nocantanaqueri: —Maanaquerica, Novincatsarite, aitaque iravisacotaje.

¹³Iro cantaincha, irointi iquenquetsatacovetacari Irasaro, icamaque. Narori, nojitashivetaca iro icantaquenari: “Imaashita, irimaoreanteari”.

¹⁴Irosati icamantasanotantajanari: —Camanaque Irasaroni.

¹⁵Te nontsipatavaqueariji narori. Meeca pinquemisantajeitanaquena, irootaque noquimoshiretantanacari. Tsame amenajeitaiteri.

¹⁶Yora Tomashi ipajiyeetiri Tsipari, icantajeitana: —Tsame aijajeitanaqueri, iroavaqueeta arori.

¹⁷Irotimataintsi inampini Irasaro. Niojeitaque icaratacotaque otsipasati quitaiteri yoiminqueantacariri Irasaroni omoroqui imperita.

¹⁸Ora Vetania oquempejitaro Jerosare, ocarati 3 quirometero.

¹⁹Iponeanaca Jerosarequi oshequi joriopee pocashitirori Marita, jero Maria. Icantapaaquero: —Eiro poashiretacoshirearitsi pijaririni.

²⁰Oquemacotavaqueri Marita quempejitapaaque Jesoshi. Osoquijanaque, ojataque otonquiotavacari. Irointi Maria, ainiro osaviqui pancotsiqui.

²¹Ocantavaqueri Marita Jesoshi: —Ariorica pintimaiteme aca, Novincatsarite, eiro icamime jaijini.

²²Niotaque meeca paitarica pincanteriri Tasorentsi aitaque inquemisantaquempi.

²³Icantanaquero Jesoshi: —Aitaque intinaaje pijaririni.