Evangelio de San Juan 11:1-23

¹Yaakat Betanianmaya aents Lázaro daagtin jaak tepau. Duka umayí María, Marta aatus ijunag nunú yaaktanmag batsamajakajui.

²Maríaya juuwai kugkuinu juki Jisusan nawen ukatug niina intashinig ujugtujua nunú.

³María, Martajai Jisusan chichaman akupjuinak: —Apuh, amina kumpajum aneetaigmea duka jaawai, —tiajui.

⁴Nu akatjamu tusá ujaam Jisus: —Aunak tuke jaak jakashtatui, Apajuí senchijin, nuigtú Apajuí Uchijí senchijinashkam iwainaktatus aniawai, —tiuwai.

⁵Jisusak Martan niina kaijai, nuigtushkam umayí Lazaronashkam senchi aneejakuí.

⁶Imaatiknaitak jaawai tabaun antukashkam wetsuk, ni pujamunmag jimajá kanajui,

⁷nunik ni jintintaiji aidaun chichajak: —Judeanum ataktú wakettsaik wegagmi, —tiuwai.

⁸Tama dita ayaak: —Jintinkagtinuh, amina awiya judío aidau kayai tukú tukugmainakua mantamawagtatus imatijabiagmaya nuniaigkik, ¿awi ataktú wemi tusamesh tame? —tuidau.

⁹Tiagtai Jisus ayaak: —¿Makichik tsawantan doce hora ajatsuak? Aents tsawai wekaguk tukuumaitsui, shiig wainak wegau asa.

¹⁰Untsu kashi wegauk tukuumain ainawai, tsaaptinum wainmak wegachu asa.

¹¹Nuna ti nuigtú: —Iina kumpají Lazarok yamaik kanag tepawai, tujash wi wejin inankittajai, —tiuwai.

¹²Nuna tutai ni jintintaiji chichajuinak: —Apuh, dekas kanag tepauku nantaktatajama, —tuidau.

¹³Jisusak Lázaro jakamtai taunak, ditak ayatak kanagmatais tawatai tusag tiajui.

¹⁴Tiagtai Jisus paan iwainak: —Lazarok dekas jakae,

¹⁵tuja wi awi juwakchau asan shiig aneajai, atumek wi au inanbau wainkajum dekaskeapi tiagtin asagmin. Tujash jegaa diisagmi, —tiuwai.

¹⁶Tutai Tomás, Jimagmamu tutaiya nunú, tikich Jisusa jintintaiji aina nuna chichajak: —Jutiish niijaig wegagmi, mainakush jutiijai mantamatnume, —tiuwai.

¹⁷Jisus Lázaro pujutain jegakmá, Lázaro ukusam cuatro tsawan wegai jegauwai.

¹⁸Betaniak Jerusalén jegattak kampatum kilómetro jegaantu.

¹⁹Tuja kuashat judío aidau shimutkajui Marían, Martajai ijagsagtatus, umayí jajukam buutuinak senchi wake besemag batsatu asamtai, anentain ichichtugtasag.

²⁰Nuninai Jisus taattak minawai tabaun Marta antuk, Jisusan igkugtatus jintai, Maríak jegag juwakui.

²¹Nunik Marta Jisusan igkug chichajak: —Apuh, ame juwi pujutaik mina ubajuk jamain wajakchae,

²²tujash wika yamaikish ame Apajuí segamunak imatiksagkeap amamainaita tajai, —tiuwai.

²³Tusá tama Jisus ayaak: —Amina umaimik aneantatui, —tau.