IOSUA 9:14-23

¹⁴Bena Israel taudia na edia aniani taidia taidia e ani; Iehova ena hahedua asie tahua.

¹⁵Bena Iosua na idia ida e herohemaino bona e gwau hamata, basine aladia mase eto. Hebou ikwarana taudia danu unu e gwau hamata toma.

¹⁶Dina toi vada ela, una herohemaino karana murinai, bena sivaraidia e kamonai, idia na dekedia taudia, bona badidiai e nohomu.

¹⁷Bena Israel taudia na edia laolao ela, dina ihatoina ai idia edia hanua ai e kau. Edia hanua be Gibeon bona Kefira bona Beroto bona Kiriat-iearimi.

¹⁸Bena Israel taudia ese asie aladia mase, badina be hebou ikwarana taudia ese vada e gwau henidia hamata, Iehova, Israel edia Dirava, ladana ai.

¹⁹Bena Israel taudia iboudiai ese edia lohia e maumauraidia. A hebou ikwarana taudia iboudiai ese hebou taudia iboudiai e hamaorodia, eto, Ai ese Iehova, Israel Diravana, ladana ai vada a gwau henidia hamata; harihari ita ese basita daudia toho diba.

²⁰A ini baita karadia toma: baita hamauridia, badu ita edai baine kau na garina, badina be ai ese a gwau henidia hamata.

²¹Hari lohia ma eto, Baita hamauridia. Taunabunai, idia na au-siri bona ranu-utu taudia ai ela, hebou taudia iboudiai edia, hebou ikwaradia taudia edia hereva heḡereḡerena.

²²Bena Iosua ese e boiridia, e gwau henidia, eto, Dahaka dainai o koimai? Umui oto “Ai na gabu daudau amo vada ama”, a ḡau be gabu kahikahi ai o nohomu.

²³Taunabunai, heuduguirai herevana na latamui ai baina gwauraia: umui na hesiai iḡuidia ai ba noho; au ba siri bona ranu ba utu, egu Dirava ena ruma ena.