1Ekꞌu ri kubꞌulibꞌal kꞌuꞌxaj rukꞌ ri Dios keꞌeloq e lik kaqajikibꞌaꞌ uwach kaqakꞌul ri qoyeꞌem che Rire. Ruma ri kubꞌulibꞌal qakꞌuꞌx, qakojom lik kꞌolik janipa ri kuqꞌalajisaj ri Dios chiqe, tobꞌ waꞌ na kilitaj taj.
2Lik chom ri xtataj puwi ri kibꞌinik kisilabꞌik ri qatiꞌ-qamam ojertan ruma ri kubꞌulibꞌal kikꞌuꞌx rukꞌ ri Dios.
3Ruma ri kubꞌulibꞌal qakꞌuꞌx, qetaꞌam ri Dios xchꞌawik y rukꞌ kꞌu ruchꞌaꞌtem xuꞌan ronoje ri kꞌolik, ma ronoje ri kaqil woꞌora upetebꞌem lo che ri na kilitaj ta uwach.
4Ri Abel, ruma ri kubꞌulibꞌal ukꞌuꞌx, xuya chwach ri Dios jun qasaꞌn más utz chwa ruqasaꞌn ri Caín. Ruma laꞌ, ri Dios jusukꞌ xril rubꞌinik usilabꞌik y xukꞌul kꞌu ruqasaꞌn. Tobꞌ kꞌu kaminaq chi ri Abel, kꞌa kachꞌaꞌt ne woꞌora qukꞌ ruma ri kubꞌulibꞌal ukꞌuꞌx.
5Ri Enoc, ruma ri kubꞌulibꞌal ukꞌuꞌx rukꞌ ri Dios, xkꞌam bꞌi chukꞌaslikil chilaꞌ chikaj y na xrikꞌowibꞌej ta ri kamik. Ekꞌu rucuerpo na xriqitaj taj, ma e ri Dios xukꞌam bꞌi. Yey ri Enoc echiriꞌ kꞌa kꞌo ne che ruwachulew, lik chom xilitaj rubꞌinik usilabꞌik chwach ri Dios.
6Noꞌj e junoq na jinta kubꞌulibꞌal ukꞌuꞌx rukꞌ ri Dios, riꞌ na kukꞌul ta kꞌana ukꞌuꞌx ri Dios janipa ri kuꞌan chwach. Ma e junoq karaj kaqibꞌ rukꞌ ri Dios, lik chirajawaxik kukojo ri Dios kꞌolik y kukojo Rire kuya rajil ukꞌaxel chike ri ketzukuw re.
7Ri Noé, ruma ri kubꞌulibꞌal ukꞌuꞌx rukꞌ ri Dios, xukojo echiriꞌ xbꞌiꞌx che ruma ri Dios saꞌ taq ri katajin loq, tobꞌ ne waꞌ kꞌamajaꞌ kuꞌanaꞌ. Xutaqej kꞌu ri xubꞌiꞌij ri Dios che y xuꞌan ri nimalaj barco re kebꞌukolobꞌej rufamilia chupa. Yey ruma wa kubꞌulibꞌal kꞌuꞌxaj xukꞌutu, xqꞌalajin kꞌu ri kimak ri na kikojom ta utzij ri Dios y xpe kꞌu qꞌatbꞌal tzij pakiwiꞌ. Ekꞌu riꞌ ri Noé ruma xkubꞌiꞌ ukꞌuꞌx rukꞌ ri Dios, e xukꞌul ri utz kuya ri Dios chike ri e jusukꞌ chwach ruma ri kubꞌulibꞌal kikꞌuꞌx rukꞌ.
8Ri Abraham, ruma ri kubꞌulibꞌal ukꞌuꞌx, echiriꞌ xsikꞌix ruma ri Dios, xukoj tzij y xeꞌek chupa ri luwar ubꞌiꞌtisim ri Dios che. Xel kꞌu bꞌi pa rutinamit, tobꞌ na retaꞌam taj pa keꞌek wi.
9Ruma ri kubꞌulibꞌal ukꞌuꞌx rukꞌ ri Dios, ri Abraham xeꞌjeqela pa ri luwar ubꞌiꞌtisim ri Dios che, tobꞌ rire na aj ta chilaꞌ. Na xkꞌojiꞌ ta chupa juna ja; xa xjeqiꞌ xeꞌ taq carpa, y jelaꞌ xkiꞌan ri Isaac y ri Jacob, ma e ne jun rike xkikꞌul ri ubꞌiꞌtisim lo ri Dios chike.
10Ekꞌu ri Abraham royeꞌem ri jun tinamit tzꞌaqom lo chi utz, yey wa tinamit e ri Dios xchꞌobꞌow re y xyakaw re.
11Rixoq Sara, ruma ri kubꞌulibꞌal ukꞌuꞌx rukꞌ ri Dios, tobꞌ lik nimalaj winaq chik y na utz tane kalanik, xyaꞌtaj che xalax jun ralabꞌ ma xukojo ri Dios lik e kuꞌana na janipa rubꞌiꞌtisim che.
12Jekꞌulaꞌ ri Abraham, tobꞌ ne xa naqaj chi kꞌo wi lo rukamik, xalax rukꞌajol. Yey taq ri ralkꞌoꞌal rire lik xekꞌiyar kiwach, xebꞌuꞌana lik e kꞌi pachaꞌ ri kikꞌiyal ri chꞌumil e kꞌo che ruwa kaj y pachaꞌ ri sanyebꞌ kꞌo chuchiꞌ ri mar, ri na utz taj kajilaxik.
13Konoje waꞌ xekamik echiriꞌ kꞌamajaꞌ kakikꞌul janipa rubꞌiꞌtisim lo ri Dios chike. Ruma kꞌu lik xkubꞌiꞌ kikꞌuꞌx rukꞌ ri Dios, e pachaꞌ xkil pan waꞌ y lik xekiꞌkot rukꞌ taq ri xkil apanoq. Y rukꞌ waꞌ, xkiqꞌalajisaj rike na e ta aj wara che ruwachulew, xa ebꞌikꞌowel.
14Yey ri kakiqꞌalajisaj waꞌ, kakikꞌutu ketajin che utzukuxik jun kitinamit pa kejeqiꞌ wi.
15We ta e laꞌ kꞌa kakichꞌobꞌ raqan puwi ri tinamit pa xebꞌel lo wi, riꞌ lik pakiqꞌabꞌ kꞌo wi ketzelej tanchi chilaꞌ.
16Noꞌj rike e xkaj jun kitinamit lik junwi, waꞌ e ri jun chomilaj tinamit chilaꞌ chikaj. E uwariꞌche, ri Dios na kakꞌix ta che kabꞌiꞌx che e Dios ke rike, ma uyijbꞌam chi jun kitinamit lik chom chilaꞌ chikaj.
17Ekꞌu ri Abraham, ruma ri kubꞌulibꞌal ukꞌuꞌx rukꞌ ri Dios, echiriꞌ xkꞌam upa, xukꞌam bꞌi rukꞌajol Isaac re kukamisaj chwi raltar, tobꞌ xew ne ukꞌajol riꞌ yey puwi rire uꞌanom ri bꞌiꞌtisinik ri Dios echiriꞌ jewaꞌ xubꞌiꞌij kanoq:
18«Xew che rakꞌajol Isaac kakipetebꞌej wi lo rawalkꞌoꞌal» xchaꞌ.
19Xuya kꞌu ranimaꞌ rukꞌajol ma lik retaꞌam ri Dios kꞌo uchuqꞌabꞌ re kukꞌastajisaj lo ri Isaac chikixoꞌl ri ekaminaq, y echiriꞌ ri Dios xuya tanchi che, e pachaꞌ xukꞌul tanchi rukꞌajol chikixoꞌl ri ekaminaq.
20Ri Isaac, ruma ri kubꞌulibꞌal ukꞌuꞌx rukꞌ ri Dios, echiriꞌ xebꞌuꞌan bendecir ri Jacob y ri Esaú, xujikibꞌaꞌ uwach chom taq sipanik kuya ri Dios chike chwach apanoq.
21Jekꞌulaꞌ, ri Jacob ruma ri kubꞌulibꞌal ukꞌuꞌx rukꞌ ri Dios, echiriꞌ xa naqaj chi kꞌo wi rukamik, xebꞌuꞌan kan bendecir ri kebꞌ ukꞌajol ri José, xutzꞌonoj chom taq sipanik re ri Dios pakiwiꞌ chikijujunal y lik xuloqꞌnimaj uqꞌij ri Dios e riꞌ yuxul chwi ruchꞌamiꞌy.
22Ri José, ruma ri kubꞌulibꞌal ukꞌuꞌx rukꞌ ri Dios, echiriꞌ xa naqaj chi kꞌo wi rukamik, xuqꞌalajisaj kꞌo jun qꞌij raj Israel kebꞌel bꞌi chupa ri tinamit Egipto chaꞌ ketzelej tanchi pa ri luwar ubꞌiꞌtisim ri Dios chike. Y xtaqan kꞌu kanoq saꞌ kaꞌan che rubꞌaqil echiriꞌ kebꞌel bꞌi, ma xraj kamuqiꞌ rubꞌaqil chilaꞌ.
23Ruchu-uqaw ri Moisés, ruma ri kubꞌulibꞌal kikꞌuꞌx rukꞌ ri Dios, xkewaj ri Moisés oxibꞌ ikꞌ, ma xkilo lik chomilaj akꞌa. Na xkixiꞌij ta kꞌu kibꞌ che ri taqanik re ri rey echiriꞌ xutaq kikamisaxik konoje ri raltaq ko alabꞌo e aj Israel.
24Ri Moisés, ruma ri kubꞌulibꞌal ukꞌuꞌx rukꞌ ri Dios, echiriꞌ xnimarik na xraj ta chik kabꞌiꞌx che e ralabꞌ rumiꞌal ri faraón, ri rey re Egipto.
25Xuchaꞌ kꞌu ri kutij kꞌax junam kukꞌ rutinamit ri Dios chwa ri kakꞌojiꞌ chupa ruqusil ri mak, ma waꞌ xa kikꞌowik.
26Ekꞌu ri bꞌeyomalil más kꞌo uwach chwach rire e ri kachꞌamixik pachaꞌ xꞌan che ri Cristo, na e ta taq ri bꞌeyomalil re Egipto; ma runaꞌoj e kꞌo pan puwi ri rajil ukꞌaxel kuya ri Dios che chwach apanoq.
27Ruma kꞌu ri kubꞌulibꞌal ukꞌuꞌx rukꞌ ri Dios, xel bꞌi Egipto y na xuxiꞌij ta kꞌana ribꞌ chwa ri royowal ri rey. Ekꞌu ri xuꞌano e lik xuchuqꞌubꞌej ribꞌ che ri kuꞌano, ma e pachaꞌ lik kutzutzaꞌ chi pan uwach ri Dios, tobꞌ Rire na kilitaj ta uwach.
28Ruma kꞌu ri kubꞌulibꞌal ukꞌuꞌx rukꞌ ri Dios, e xuꞌan ri xtaq che; xuyijbꞌaꞌ ri nimaqꞌij Pascua y xtaqan che kasoqꞌ ukikꞌel bꞌexex che taq ruchiꞌ ja chaꞌ echiriꞌ kikꞌow ru ángel ri Dios, na kukamisaj ta kan ri nabꞌe kalkꞌoꞌal ri e aj Israel.
29Ri tinamit Israel, ruma ri kubꞌulibꞌal kikꞌuꞌx rukꞌ ri Dios, xebꞌikꞌow chupa ri mar Rojo echiriꞌ waꞌ xjaqataj upa y e laꞌ pa chaqiꞌj ulew xebꞌikꞌowik. Noꞌj echiriꞌ raj Egipto xkijeq kebꞌikꞌow chupa ri mar, ri yaꞌ xukꞌul tanchi ribꞌ y jelaꞌ xejiqꞌ kan chupa.
30Raj Israel, ruma ri kubꞌulibꞌal kikꞌuꞌx rukꞌ ri Dios, xebꞌin chirij ri tinamit Jericó wuqubꞌ qꞌij, y tekꞌuchiriꞌ xwuluwubꞌ lo ri tapia re ri tinamit.
31Ri Rahab e jun ixoq retzꞌabꞌem uwa uqꞌij kukꞌ achijabꞌ; na rukꞌ ta kꞌu riꞌ, ruma xkubꞌiꞌ ukꞌuꞌx rukꞌ ri Dios, na xkam ta kukꞌ ri e aj palajiy tzij e aj Jericó, ma rire xebꞌukꞌul chi utzil chomal ri e kꞌakꞌalenel e aj Israel y xebꞌutoꞌo.
32¿Saꞌ chi más kambꞌiꞌij? Ma na kuꞌan ta wa jun qꞌij kinchꞌaꞌt chwi ri kubꞌulibꞌal kikꞌuꞌx ri Gedeón, ri Barác, ri Sansón, ri Jefté, ri David, ri Samuel y ri qꞌalajisanelabꞌ.
33Ruma ri kubꞌulibꞌal kikꞌuꞌx rukꞌ ri Dios, e kꞌo ri xkichꞌij uchuqꞌabꞌ ukꞌiyal tinamit, xetaqan kꞌu pakiwiꞌ chi jusukꞌ y lik xkiriq ri toꞌbꞌal re ri Dios bꞌiꞌtisim lo chike. E kꞌo ne ri xkitzꞌapij ruwakeꞌ ri koj chaꞌ na ketij ta kuma.
34E kꞌo ne ri xekꞌaq chupa ri aqꞌ y na xekꞌat taj. E kꞌo ri xekolobꞌetaj chwach ri kamik rukꞌ espada. E kꞌo ri xyaꞌiꞌ kichuqꞌabꞌ echiriꞌ na jinta kichuqꞌabꞌ, lik xnimar ri kichuqꞌabꞌ pa chꞌaꞌoj y ruma kꞌu riꞌ, ri soldados e aj naj xebꞌanimaj bꞌi.
35E kꞌo ne ixoqibꞌ xkikꞌul ri kalkꞌoꞌal e kꞌastajinaq tanchi lo chikixoꞌl ri ekaminaq. Noꞌj e kꞌo jujun chik tikawex, ruma ri na xkaj taj kakoqꞌotaj ri Dios, e xkichaꞌ ri na xetzoqpix ta chubꞌi y rukꞌ kꞌu unimal kꞌaxkꞌolil xekamik, ma e xkichaꞌ ri jun chomilaj kꞌastajibꞌal re kꞌaslemal na jinta utaqexik.
36E kꞌo jujun chik lik xechꞌamixik, xjichꞌ kipa, xeyaꞌiꞌ pa karena y xeyaꞌ pa cárcel.
37E kꞌo ri lik xkꞌam taq kipa, e kꞌo ri xekamisax pa abꞌaj, e kꞌo ri xqꞌatiꞌ kipa rukꞌ sierra, e kꞌo ri xekamisax rukꞌ espada. E kꞌo ri lik xesutinik kikojom kiqꞌuꞌ xa re utzꞌuꞌmal bꞌexex o kaprux, xꞌan nibꞌaꞌ chike, lik xpaxir kꞌu kikꞌuꞌx y lik xꞌan kꞌax chike.
38Rike xebꞌin pa taq luwar katzꞌintzꞌotik, xebꞌin pa taq juyubꞌ, xejeqiꞌ che ruwachulew xeꞌ taq pek y pa taq jul. E taq kꞌu waꞌ wa winaq re ruwachulew na taqal tane chike kekꞌojiꞌ wa nimaq e aj chak re ri Dios chikixoꞌlibꞌal.
39Tobꞌ konoje waꞌ lik xkikꞌut ri kubꞌulibꞌal kikꞌuꞌx rukꞌ ri Dios, na jinta kꞌu junoq chike xukꞌul wara che ruwachulew ronoje rubꞌiꞌtisim lo ri Dios chike.
40Ma ojertan ri Dios uchꞌobꞌom chi lo ri más chom kuꞌanaꞌ chaꞌ kutzꞌaqatisaj lo ri karaj kuꞌan qukꞌ riꞌoj junam kukꞌ rike.
