1Wiac biŋe qanârekicne i manapaŋkerâ irec woŋec juju, â wiac mi hohonene maŋzi sakarerâ babaju, izi mamanasiŋ ekac.
2Mitiŋic raŋɋane jaŋe mamanasiŋ iŋucnehec jupie Anutuzi honec‐jopame biaŋkewec hâcne.
3Mâreŋ i Anuture micte fuawec, ine mamanasiŋhec juhuc mana taraeŋgopeneŋ. Wiac hohonene i mi honekickonec fuawec hâcne.
4Mamanasiŋhec juhuc Abezi Anutu bâzi rikecneme honeme sâckeha Kaiŋte qikiŋnewec. Mamanasiŋ‐ticnere hâcne Anutuzi honeme kiŋfâsâc eme bâzi‐ticne rohuc fuŋne‐ticne bataniŋkewec. E mamanasiŋhec juwecte manapene hâmokicnezi sifu dâŋ nâzâkac ekac.
5Enoko e mamanasiŋhec juwec, irec hâmoczi mi bâuaocte Anutuzi ɋâricne bafewec. Iŋuc ecnewecte ŋiczi basambiŋ. Erâ mi feha fuŋne‐ticne biac ʒiŋuc mutaniŋkekicne: Anutuzi e honeme biaŋkewec.
6Mamanasiŋ tâmiric jupene Anutuzi honec‐nâpome bibiaŋke ine mi fokac. Anutu mâc mai mi ecnezo, jukac i mana ʒakiezo, â maŋzi hefârepene tahac‐nâpoekac dâŋ i mana ʒakiehuc mai ecnezo.
7Noa e mamanasiŋhec juwecte Anutuzi wiac ʒâhec fuaocmu irec biŋe qanaŋ âzâcnewec. Âzâcneme araŋ bacnehuc wiacfâc‐ticne ɋâricne juniŋte murâ woke bawec. Iŋuc ehuc ŋic kiŋjeŋicte fuŋne bataniŋkewec. Erâ mamanasiŋte erâ kiŋfâsâc ee irec fârine rauckewec.
8Abraham e mamanasiŋhec juwecte mâreŋ‐ticne beherâ moc rauckeocte irec dâŋ erao fuame reŋkewec. Erâ mâreŋ irec me irec mukicne kâuc bahuc sifu rawec.
9Mamanasiŋhecte mâreŋ biŋe qacnekicne ira ra fisirâ jaba juwec. Jaba juhuc bozeo sawa ŋeŋerâ juwec. Isaka â Jakobo jahe biŋe mâmâc qajactekicnezi sâc ijaha epic.
10Abraham e hae ŋeŋe sanaŋ moc Anutuzi bâfuarâ basarickewec irec mamanacko juwec.
11Sara e iŋuc jaha mamanasiŋhecte tâpiri fuacneme ŋokac qizec juipiehuc kiwechec ewec. Ine ɋâricte biŋe qacnewec ere, mume fufuazi mukac, muhuc iŋuc ewec.
12Eme irec hâcne ŋic mocjaha, fua sawecte tâpiri‐ticne arictac ehame, eraonec ɋâric fua sawec embiŋ jaŋe sambâŋko bâpiŋ ŋerakac irec sâc, erâ hâwecmecko moŋgeŋ forakac, ŋiczi mi wowosene, irec sâc fuambiŋ.
13Ŋic izi hâcne mamanasiŋhec juhuc hâmo‐fârembiŋ. Wiac biŋe qajarekicne irec fârine ine mi roro mâc taicko fome honerâ worickehuc jumbiŋ. Iŋuc ehuc fuŋne‐jeŋic ʒiŋuc manambiŋ: Nâŋe mâreŋko hotâ â jaba juŋgopeneŋ.
14Dâŋ iŋuc muhuc mâreŋ qizec moc bâfuaniŋte maŋjeŋic âeckeba ewec.
15Erâ jaŋacne hae mâreŋ râpeckembiŋ irec maŋhâhâŋ mi ejarewec, irec ejareme muzac risiezo murâ sâcne risienʒapiŋ.
16Jaŋe ine hae mâreŋ biaŋ mocte maŋhâhâŋ ejarewec, sambâŋko fokac irec hâcne. Irec Anutu e jaŋere Anutu, ere iŋuc mupene maname mi sâqoreekac. Wemocte? E jahac hae sâko moc bâfua‐jarewec.
17Abraham e Anutuzi esâickeme mamanasiŋhec juwecte Isaka taha bâzire qikiŋnewec, e biŋedâŋ roweczi ŋokâ‐ticne mocjaha qikiŋnezo ewec hâcne.
18Biŋedâŋ ʒiŋuc âzâcnekicne: “Isakaraonec ɋâricfâcge fua sawec eraniŋmu.”
19I kecʒiŋuc muhuc ewec: “Anutu e ŋic hâmockonec bâɋârec‐jopaocte tâpiri focnekac.” Eme irec hâmockonec tinac bârisiecnewec.
20Isaka e mamanasiŋhec juwecte Jakobo â Esau jambuŋ‐jofahuc wiac ʒâhec fuaocmu irec findaŋdâŋ wâc jasawec.
21Jakobo e mamanasiŋhec juwecte hâmozo ehuc Josefe ŋokâ jahec‐ticne jambuŋ‐jofawec, ehuc gunuzi âkesiŋnerâ ŋehuc Anutu dapecnewec.
22Josefe e mamanasiŋhec juwecte hâmozo dameŋ‐ticne maickeme Israe ŋic jaŋe juku Aigita mâreŋ beherâ raniŋmu irec manasurâ siec‐ticnere qanaŋ dâŋ mutâcne‐jarewec.
23Mose fuame neŋgoc mamacne jahe mamanasiŋhecte motec honebâckerâ ŋicwofuŋ dâŋticnere mi hâwic‐jofaha mosa jahec â moc soŋkepic.
24Mose e mamanasiŋhec juwecte ine sokarâ Farao otâ‐ticnere ŋokâ mucneniŋte mupie qikiŋnewec.
25E sâqocnere aŋac bembeŋne qikiŋnerâ Anuture ŋicfâc jaŋehec ʒâic busâqoc manaocte wosâewec.
26Ehuc Aigita mâreŋkonec moneŋ mafa mâriri irec maname jawane ewec, â Kristore erâ mamakucne juocte ine maname fârine ewec. I juku furine roocte manasuhuc iŋuc ewec.
27E mamanasiŋhec juwecte ŋicwofuŋ aaric‐ticne qamaserâ Aigita mâreŋ behewec. Erâ Anutu mi hohonene e ʒâŋezi honehuc tinac erao siŋkewec.
28Mose e mamanasiŋhec juwecte mume aakic lama hezurâ socnezi ficmotâc ruacnepie aŋelo momorizi jowaruhuc mârâc ŋokâfâc‐jeŋic akic‐jopawec.
29Eme Israe ŋic jaŋe mamanasiŋhec jumbiŋte Hâwec Bâbâroŋko tiŋko rara tinac rahuc fotâcnembiŋ. Aigita ŋic jaŋe ijaha ezo mupie hâweczi ɋâcjopawec.
30Israe ŋic jaŋe mamanasiŋhec jumbiŋte Jeriko haesac orâŋkekuhapie ʒoaŋ gie bapa 7 eme hericke qawec.
31Sasec ŋokac Rahaba e mamanasiŋhec juwecte ŋic mâreŋ hone têcnepic jahe âgo ejactewec. Eme qaqatara ŋic jopambiŋko e akickekicne.
32Erâ dâŋ gâcne wemocko mufârezo. Gideoŋ â Baraki â Simsoŋ â Jefita â Dawidi â Samue â porofete jaŋere binaŋ bafârepe muzac mâretec ʒorazac.
33Jaŋe mamanasiŋhec jumbiŋte ŋic guru sâko bawahac‐jopambiŋ. Bâbâtiŋ gie bâhâmombiŋ, wiac biŋe qajarekicne irec fârine rombiŋ, laioŋ micjeŋic bâbâzickembiŋ,
34ʒocbâruŋ fâro‐ticne hemâteŋkembiŋ, ʒika faio feipiehuc ɋâricne jumbiŋ, dockekicnezi mocwâc sanaŋkembiŋ, ʒikao momori wânʒâŋ embiŋ, mâreŋ gâcnaonec râsi jopa jâpec embiŋ.
35Ŋokac gâcne jaŋere ŋokâ hâmockonec bâɋâre‐jarekicne. Ŋic tucne bâʒâic‐jopahuc mâsi qâsi ejarekicne, eme “miti behepie akic‐ŋopazo” jazapie, juju sanaŋte ɋâreniŋte manasuhuc qikiŋnembiŋ.
36Ŋic tucne jaŋe maric maŋgâpâc â qa imac ejarekicne, â tucne jaŋe me kike‐jeŋic qarâ kâpâcwâru ficko râec‐jopakicne.
37Tucne jaŋe qânâzi hehâmoc‐jopakicne, tucne jopa qâʒâic ejarekicne, tucne jaŋe segezi bâtâc‐jopambiŋ, tucne jaŋe ʒikazi upe‐jeŋic qâtâcnembiŋ. Jaŋe lama â noniŋ sahacne rufarâ rorocko juhuc bebekâne erâ ʒâŋ goma faio jujumbieŋ.
38Iŋucnezi ŋic wemo‐jeŋicte mâreŋko jupie sâckewec. Jaŋe tiki tuhuo mâreŋ â qorac hawecko foforâ jujumbieŋ.
39I jaŋe sasawa mamanasiŋ‐jeŋicte Anutuzi honec‐jopame biaŋkewec, erâ sifu wiac biŋe qajarekicne irec fârine mi bâfuambiŋ.
40Fuŋne ʒiŋucte: Anutu e nâŋâcnao wiac fekicne râeocte maname fowec, irec jaŋe nâŋâc tâmiricko juju saric bâfuaniŋte mi manasuwec.
