GUNALAIA TAUDIA 20:4-34

⁴Inai Levi tauna, unai idia alaia hahine ena adavana, ese ia haere, ia gwau, “Lau bona lauegu hahine danu, be Beniamina taudia edia hanua ladana Gibea dekenai ai ginidae, unuseni do ai mahuta gwauraia.

⁵Vadaeni Gibea taudia ese lau hadikaia totona idia toreisi. Hanuaboi neganai idia ese ruma idia hagegea. Idia ura lau idia alaia mase. To gabeai egu hahine idia abia, idia fosia, bona idia sihari henia kava, ela bona ia mase.

⁶Unai dainai, lau ese hahine lau abia, iena tauanina lau utua parara, bona kahana 12 lau siaia lao, Israela iduhu ta ta edia. Badina be inai Beniamina taudia ese lebulebu kara, bona hemarai kara idia karaia vadaeni, Israela taudia edia huanai.

⁷“Umui Israela taudia ibounai e, do umui laloa namonamo, bona dahaka do ita karaia do umui gwauraia.”

⁸Vadaeni unai hebou taudia ibounai idia toreisi, tau tamona ia toreisi bamona, idia gwau, “Ita ta be iena palai ruma dekenai do ia lao lasi, bona ita ta ta be iseda ruma dekenai do ita giroa lou lasi.

⁹To Gibea totona inai bamona do ita karaia: Laki gadara dekena amo do ita diba, daika bona daika ese Gibea do idia tuari henia.

¹⁰Israela iduhu ibounai dekena amo, tau 100 dekena amo 10 do ita abia hidi, bona 1000 dekena amo 100 do ita abia hidi, bona tau 10,000 dekena amo 1000 do ita abia hidi. Idia be do idia lao, aniani do idia abia, bona huaia iseda tuari taudia totona, bona iseda tuari taudia oredia ese Gibea taudia edia kerere davana do idia henia, Israela lalonai inai kara mirona idia karaia dainai.”

¹¹Unai dainai Israela taudia ibounai be mai lalona tamona idia haboua, Gibea hanua do idia tuari henia totona.

¹²Vadaeni Israela iduhu ibounai ese edia hereva gwauraia taudia be Beniamina iduhu taudia dekenai idia siaia, idia gwau, “Unai kara dika umui emui huanai ia vara, ena anina be dahaka?

¹³Harihari unai kara Gibea dekenai idia karaia taudia be ai dekenai do umui henia, ai ese idia do ai alaia mase, vadaeni inai kara dika Israela dekena amo do ai kokia haorea totona.” To Beniamina taudia ese edia varavara Israela taudia edia hereva idia kamonai henia lasi.

¹⁴Vadaeni Beniamina taudia be edia hanua ta ta ibounai dekena amo Gibea dekenai idia haboua, Israela taudia oredia do idia tuari henia totona.

¹⁵Unai dina dekenai Beniamina taudia edia hanua ibounai dekena amo idia haboua tuari taudia be 26,000 mai edia tuari kaia. Bona Gibea hanua taudia edia tuari taudia mai goadadia be 700.

¹⁶Inai Beniamina taudia ibounai edia huanai be imana lauri taudia mai goadadia 700. Idia ibounai be varo dekena amo nadi idia negea diba, bema huina tamona dekenai nadi idia negea, idia misi diba lasi. Beniamina tuari taudia mai goadadia be 26,700.

¹⁷Israela iduhu oredia tuari taudia, Beniamina lasi taudia, be ibounai 400,000, mai edia tuari kaia, bona tuari dekenai manada taudia.

¹⁸Israela taudia idia toreisi, Betele dekenai idia lao, Dirava idia nanadaia, idia gwau, “Edena iduhu taudia ese Beniamina taudia do idia tuari henia guna?” Lohiabada ia gwau, “Iuda iduhu be do ia tuari henidia guna.”

¹⁹Daba neganai, Israela taudia idia toreisi, Gibea hanua ena vairanai idia kamepa.

²⁰Vadaeni Israela taudia ese Beniamina taudia idia tuari henia, Gibea hanua ena vairanai idia gini.

²¹Unai neganai Beniamina taudia be Gibea dekena amo idia raka mai, bona idia ese unai dina dekenai Israela taudia 22,000 idia alaia mase.

²²To Israela taudia be idia boga auka noho, bona edia tuari gabudia dekenai idia gini lou, tuari dina ginigunana dekenai idia gini hegeregerena.

²³Israela taudia be tomadiho gabuna dekenai idia lao, bona unai hanuaboi Lohiabada ena vairanai idia tai. Idia ese Lohiabada idia nanadaia, idia gwau, “Aiemai varavara Beniamina taudia do ai tuari henia lou, o lasi?” Lohiabada ia haere, ia gwau, “Do umui tuari henidia.”

²⁴Unai dainai, Israela taudia ese Beniamina taudia ma idia tuari henia lou, nega iharuana.

²⁵Vadaeni Beniamina taudia be nega iharuana Gibea hanua dekena amo ma idia raka mai, bona idia ese Israela taudia 18,000 idia alaia mase. Unai mase taudia ibounai be tuari dekenai manada taudia.

²⁶Vadaeni Israela taudia, tuari taudia ibounai be Betele hanua dekenai idia lao, mase taudia totona idia taitai. Israela taudia ese Lohiabada ena vairanai idia helai, aniani idia ania lasi, bona ranu idia inua lasi ela bona dina ia diho. Ma danu maino karaia bouboudia, bona gabua bouboudia Lohiabada ena vairanai idia karaia.

²⁷Unai dinadia dekenai Dirava ena Taravatu Maua be Betele dekenai ia noho. Unai dainai Israela taudia ese Betele dekenai Lohiabada ena ura idia tahua noho.

²⁸Pineha Eleasara, Arona ena tubuna, be unai neganai Taravatu Maua ena vairanai Lohiabada ena hesiai gaukara ia karaia. Israela taudia ese Lohiabada idia nanadaia, idia gwau, “Aiemai varavara taudia ma do ai tuari henia lou, o do ai hadokoa?” Lohiabada ia gwau, “Kerukeru ma do umui tuari henidia lou, bona lau ese Beniamina taudia dekena amo umui dekenai kwalimu do lau henia.”

²⁹Vadaeni Israela taudia ese edia tuari taudia haida idia siaia, Gibea hanua be hunia dekenai idia hagegea, bona hunia gabudia dekenai do idia naria noho.

³⁰Dina ihatoina dekenai Israela taudia be ma Beniamina taudia idia tuari henia, Gibea hanua ena vairanai idia gini, nega guna idia karaia hegeregerena.

³¹Vadaeni Beniamina taudia be hanua dekena amo idia raka mai, bona nega guna idia karaia bamona, idia ese Israela taudia idia alaia hamatamaia lou. Haida be Betele dala dekenai bona Gibea dala dekenai, bona hanua ena murimurina tano dekenai idia alaia. To Israela taudia ese unai kara dekena amo Beniamina taudia hanua dekena amo idia veria. Israela taudia 30 bamona be Beniamina taudia ese idia alaia.

³²Beniamina taudia be idia ta ta dekenai idia herevahereva, idia gwau, “Iseda vairana dekenai idia heau noho, bona ita kwalimu noho, guna ita karaia bamona.” To Israela taudia be idia herevahereva, idia gwau, “Do ita heau koikoi, vadaeni laolao dala dekenai Beniamina taudia do ita veridia mai, idia ese hanua do idia rakatania momokani.”

³³Vadaeni Israela taudia edia orea badana be Bala Tamara dekenai idia lao, unuseni idia gini hegaegae noho. To Israela taudia haida, guna Gibea hanua hunia dekenai idia hagegea, bona unuseni idia naria noho, be edia hunia gabudia nadi badadia dekena amo idia heau mai haraga.

³⁴Unai neganai Israela tuari taudia goadadia 10,000, Israela orea ibounai dekena amo abia hidi taudia ese Gibea hanua idia tuari henia. Tuari be auka herea, bona Beniamina taudia idia diba lasi edia lusi negana be kahirakahira.