1Na di kaklinge Dyékob, i mà Dyosif, nun sbung fali dnagit trigu di Idyif, manan di dad ngaan lagi, “Tan kè duenyu là mngabal i kakaanito?
2Lingegu nun bong fali di Idyif. Salu gamu gito ditù du mayad gamu, du fye là ito mati malnus.”
3Taman i sfalò twege Dyosif, salu di Idyif du mayad fali.
4Kabay i twalila, i dnagit ku Bénhamin, là fagin Dyékob, du likò kenen ken nun sasè gaslokan.
5Na du nkel i kbitil di banwela Kanaan, én i duen dad ngà Dyékob salu di Idyif, magin i dee dad dademe to, du mayad ale fali.
6Na du Dyosif i gubirnador di banwe Idyif, kenen i fabli fali di kdee dad to di dademe banwe. Na di kakel i dad flanekan, lkuad ale di munan, du mafè ale kenen.
7Na di kite Dyosif dale, nilean ku simto ale, bay flingu i laan ale dilè. Na too faltê talù di dad flanekan ani, manan, “Tanè gufduyu?” Na tmimel ale, manla, “Fdu gami di banwe Kanaan, na salu gami dini du mayad fali.”
8Na balù nilè ale Dyosif, làla kenen dilè.
9Na gafaldam Dyosif i dad knan di muna, gablà di dale, na manan di dale, “Ise kè duenyu salu dini du gamu i dad gal meye, na neyeyu ku nun gumlungay i banwemi ani, du fye fnisanyu gami.”
10Tmimel ale, “Amumi, tabyà di ge, ise gami sa dad gal meye, bay gami dad lifanam. Alò gami salu dini du mayad gami fali.
11Kdeemi ani saflanek, satu i màmi. Ise sa ku meye gami i gumlungay i banweyu, bay gami sa dad fye to.”
12Man Dyosif, “E là, là agu faglut i manyu. I duenyu salu dini, du neyeyu ku tan gumlungay i banwemi.”
13Kaklingela ani, manla, “Di muna, i dad lifanam ani, sfalò lwe gami saflanek di satu mà, na mnè kenen di banwe Kanaan. Na i sangal twalimi ditù kenen di saféd i màmi, na satu flanekmi tamati.”
14Na man Dyosif di dale, “E, glut i mangu, gamu sa dad to gal meye.
15Kabay ani i nimògu, du fye gadègu ku glut i manyu ku là. Fagu di dagit i harì, mangu di gamu, là gamu fakay mulê di banweyu, silang ku i twaliyu salu dini.
16Falohgu satu di gamu mulê, du nngén kenen, bay fbilanggùgu i dademe di gamu, kel i kgadègu ku glut i manyu. Ku là glut i manyu, mangu fagu di dagit i harì, gadègu kadang, gamu sa salu dini duenan, du neyeyu ku tan i gumlungay i banwemi, du fye fnisanyu.”
17Di kagmanan ani bnilangguan ale tlu duh.
18Di kakubu tlu duh man Dyosif di dale, “Too nun klikògu i Dwata, taman là gamu sa fnati ku nimenyu i mangu.
19Ku glut i manyu, satu di gamu bnilanggù fa dini, na i dademe mulê, na mebe i fali bnayadyu, du fye là mati malayyu di kalnus.
20Kabay tooyu fagin i twaliyu samfulê di deg, du fye gadègu ku glut i gmanyu deg. Na ku glut, làta gamu fafati.” Na naginla i gman Dyosif ani.
21Kafnge én, stulen i saflanek, manla, “Ani kè i balas di gito di mgimoito di flanekito Dyosif. Du di kafakdon na di kafnin di gito tabeng, na balù teen ito i kaflayaman, là ito flinge. Ani duenan nun kaflayam ani kel di gito.”
22Na man Rubén, “Mangu gamu di muna, nangyu fatduk, bay làyu agu fanlinge. Taman ani i duenan nun kaflayamito, du mdà di kfatin.”
23Na glabat Dyosif i kdee kastulenla ani gine, bay làla gadè dun, du nun to mubad i talùla Hibru di ku Dyosif, na lê nun mubad i taluan, i talù dad to di Idyif di dale.
24Kafnge én, tnagakan ale du fan mngel, mdà di bong klidù nawan. Na di kagtaluan lêman, samfulê di dale. Nalék Dyosif Simyon ftagak di bilanggù, na fbakusan di muna i kdeela.
25Di fan kdà i dad flanekan mulê, dek Dyosif i saligan, manan, “Fananoam dad sakula fali, na fuléam i filakla, bay bunim di gsen tah i saku i kat satu dale, na banlém ale bnatula di kagula.” Na nimen i lifan Dyosif i dekan kenen.
26Kafnge én, lulen i dad flanekan i falila di dad dongkila, na mdà ale mulê.
27Na kakella di gukudangla di satu butang, satu di dale mukal i sakun, du fankaanan i dongki, na teenan i filakan di tah i sakun.
28Na tlon i dad flanekan, manan, “I filak bayadgu i fali tagani sa di tah sakugu ani, tafulê di deg.” Kaklingela ani makto i nawala, na too ale likò na stulen ale, manla, “Tan i gamu fandam i mgimò Dwata di gito ani?”
29Kakella di gumnè i màla di Kanaan, tulenla kenen i kdee mgimò di dale di klola ditù di banwe Idyif, manla,
30“I gubirnador di Idyif too faltê talù di gami, na dnalaman gami, gami salu ditù kun, du neyemi i banwela, du fye fnisanmi.
31Kabay tnimelmi, ‘Ise gami i dad gal meye, du landè sasè duenmi salu dini.’
32Tnulenmi kenen, sfalò lwe gami saflanek, na satu i màmi. Satu i twalimi tamati, na i sangal twalimi ditù kenen di saféd i màmi, déén di banwe Kanaan. Ani gmanmi di kenen.
33Kabay man i gubirnador di gami, ‘Ani i nimògu, du fye gadègu ku glut i manyu ku là. Satu di gamu bnilanggù dini, na i dademe gamu mulê, na mebe gamu fali bnayadyu, du fye là mati malayyu di kalnus.
34Kabay faginyu dini i twaliyu, du fye gadègu ise gamu i dad gal meye, bay glut i gmanyu, na landè sasè duenyu salu dini. Na fulêgu di gamu satu flanekyu, na fakay gamu mayad dini di banwe Idyif.’ Én gman i gubirnador di gami.”
35Kafnge én, di kukal i dademe dad saflanek i sakula, teenla di kat satu sakula i filak bayadla i fali. Na di kitela i filak, Dyékob na kdee dad ngaan too ale likò.
36Na man i màla, “Fagu di gamu, tatì lana i dademe dad ngàgu. Tamati Dyosif, na Simyon tatnagakyu ditù di Idyif, na ani lêmanyu kayè ku faginyu Bénhamin. Tooyu agu banlé kaflayam.”
37Na tmimel Rubén i maan, manan, “Mà, nang ge mlidù, agu sa mifat ku Bénhamin. Na ku làgu kenen gebe samfulê, fakayam fnati i lwe dad ngàgu lagi, bay toogu nebe kenen samfulê di ge.”
38Kabay man Dyékob, “Làgu faloh i tingàgu lagi ani magin gamu. I twegen tamati, na kenen alò i gdè. Du ku nun sasè gaslokan di dalanyu, én gamfati deg di bong klidù nawagu kenen.”
