Ezequiel 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Tayta Dios cayno nimaran:

²«Runa, gamga Israel runacunata tincuchiypa cayno willapay:

³‹Tayta Diosga caynömi nin: « ‹Fiyupa jatuncaray ancami Libanuman chayasha. Älancunata quicharcuptin caruyajmi aypasha. Tucuy-niraj culur lümayojmi caycaran. Sedru guerupa ñawin aywajtami charisha.

⁴Nircur chay ñawin aywajtaga paquirir apacusha. Nigusyanticunapa nasyunninman chayaycachirnami aypalla nigusyanticuna tiyashan siudäman lantaycusha.

⁵Nircorga nasyunniquipita muruta acrarcurnami murusha. Aypalla yacu chayanan mayu cantuncho camarisha caycaj chacramanmi murusha.

⁶Chay muru wiñamushpan ticracuriran rämasapa lantaman. Mana ata carpis rämancunaga wiñar macyaraycaran anca caycashan cajman. Sapincunapis mas ruriman sapichaycaran. Chay lantaga chillguir fiyupami rämasapayaran.

⁷« ‹Chayno juc jatuncaray ancapis caycaran. Chaypis casha jatuncaray älayoj y lümasapa. Chaymi chay lantapa sapenga chay anca caycashan cajmanna yaycuycaran. Rämancunapis chay anca cajmanna macyaycaran mas achca yacuta ashishpan.

⁸Chay lantaga aypalla yacu chayanancho y alli allpachömi lantaraycaran. Chaychöga alli caycaran fiyupa rämasapayänanpaj, wayunanpaj, cuyayllapaj lanta cananpaj.›

⁹«Nogapa jutëcho ninqui: ‹Caynömi Tayta Dios nin: « ‹¿Chay lantaga allichuraj wayonga? ¡Manami! Rimir caj ancami sapintapis rachirenga. Chaura wayuyninpis marpucäconga. Mana callpacuypa, wallca runallawanmi sapinpita achurenga. Chaura chillguiycaj rämancunapis ushajpämi chaquicäconga.

¹⁰¿Juc-läman witircachir lantaptin cawangachuraj? ¡Manami! Inti yagamunan caj-läpita wayrämushanmi chaquirachenga. Chillguinanpaj alli caycashanchömi ushajpaj chaquicäconga.› »

¹¹Mastapis Tayta Dios nimaran:

¹²«Tincuchiypa willapashayqui imapaj cashantapis tantiyashanta mana tantiyashantapis mä tapuy chay mana wiyacoj runacunata. Chay runacunata ninqui: ‹Babiloniapa raynenga Jerusalenman chayaycur Judäpa rayninta, yanapajnincunatapis prësu charisha. Nircur Babiloniaman apacusha.

¹³Nircorga Judäpa rayninpa famillyanpita jucta acraran. Paywan parlacurnami jurachiran Babiloniapa raynin mandashannölla cumlinanpaj. Israelcho caj mas rispitädu, mas yachaj runacunatapis llapanta apacuran.

¹⁴Chaynöpami Judá nasyonga Babiloniapa munayninchöna ricacuran. Contran jatariyta munarpis manana camäpacurannachu. Chaura rayga parlacushannölla cumlinanpaj caycaran.

¹⁵Chayno parlacushanpis Judäpa raynenga Babiloniapa rayninpa contran ricacuran. Chaymi Egiptuman cachata cacharan, cawallucunata, suldärucunata mañacamunanpaj. ¿Gamcuna riguinquichu llullaparcur paycuna cawaycajlla gueshpinanpaj cashanta? ¿Conträtuta rurar parlacushanta mana cumlëga cawanmanchuraj?

¹⁶¡Manami! Babiloniapa rayninwan parlacushanta manacajman churar mana cumlëga Babiloniachömi wañonga. Judächo ray cananpaj churaj rayta mana wiyacushanpitami chayno wañonga. Noga Tayta Diosmi chayno në.

¹⁷Babiloniapa raynin pillyaj yaycuptin, siudäman yaycur aypalla runacunata wañuchiptin, Egiptupa faraonnenga washänanpaj manami cachangachu suldäruncunatapis, ni aypalla runatapis.

¹⁸Judäpa raynenga parlacushanta cumlinanpaj aunircurpis mana cumlirmi manacajman churasha. Chayno rurashanpitami payga wañonga.

¹⁹« ‹Noga Tayta Diosmi jurashpä në: Judäpa raynenga manacajmanmi churasha jurar nogata aunimashanta. Paycunawan conträtuta rurar parlacushätapis manami cumlishachu. Chaypitami paycunataga castigashaj.

²⁰Wascawan lasyaypami charishaj Babiloniaman apachinäpaj. Chaychönami imanir nogata mana wiyacamashantapis tapushaj.

²¹Mas jinyu caj suldäruncunaga guërrachömi wañonga. Cawaycar quëdajcunanami machiypa-machir gueshpir aywaconga. Chayrämi gamcuna musyanquipaj noga Tayta Dios nishäga rasunpa cumlishanta.

²²« ‹Noga Tayta Diosmi në: Nogapis sedru guerupa ñawin wiñaycajta paquirishämi. Mas allinnin caj rämapa ñawintami paquirishaj. Nircur quiquëmi lantashaj mas altunnin puntaman.

²³Israelcho caycaj puntamanga mas altunninmanmi lantashaj. Chaycho alli wiñaptin rämanpis jatunyar mashtacanga, sumaj wayonga. Alli sedru gueruna canga. Chay yörapa chaquinchöga tucuy-casta animalcunami tiyanga. Rämancunachöpis gueshtata ruranga tucuy-casta äbicunami.

²⁴Chauraga jircacho caj yöracuna llapanmi musyanga noga Tayta Dios cashäta. Nogaga alli-tucoj caj yöratami sajtarë. Nircorga tacshannin manacaj cajtanami jatunyächë. Nogami chaquirachë berdiraycaj yöratapis. Chaquisha caycaj yöratana yapay chillguichë. Noga Tayta Diosmi chayno në. Nishätaga llapantami cumlëpis.› »