Ester 6

1

2

3

4

5

6

7

8

9

10

¹Pero tama e acbꞌar era e rey machi uyubꞌi awayan, y tamar era uyare tuaꞌ ataresna e jun tiaꞌ chꞌar tzꞌijbꞌabꞌir tunor lo que numuy xeꞌ más nojta ucꞌampibꞌir tama e lugar era tiaꞌ war acꞌotori e rey. Y de allí uyare tuaꞌ achena leer.

²Y tama e jun era utajwiobꞌ tiaꞌ quetpa chꞌar tzꞌijbꞌabꞌir tama e tiempo conda e Mardoqueo cay uchecsu que cꞌanix achamesna e rey Asuero umen e Bigtán y umen e Teres xeꞌ guarde espalda xeꞌ quetpobꞌ tuaꞌ ucojcobꞌ e ocher tama uyotot e rey.

³Entonces ojron e rey y che: —¿Tucꞌa tuanibꞌir y tucꞌa tattzꞌarsiaj cay uchꞌami e Mardoqueo tama tunor lo que cay uche tacaren? che e rey. Entonces ojronobꞌ uyajcꞌamparobꞌ y chenobꞌ: —Matucꞌa, chenobꞌ uyajcꞌamparobꞌ.

⁴Pues entonces tama e hora era warix oꞌchoy e Amán tama uyotot e rey tuaꞌ ucꞌajti tacar tuaꞌ achꞌubꞌna e Mardoqueo tama e nuxi teꞌ xeꞌ ustabꞌir umener. Entonces ojron e rey y che: — ¿Chi war axana tara patir? che e rey.

⁵Entonces ojronobꞌ uyajcꞌamparobꞌ y chenobꞌ: —Jax e Amán, chenobꞌ uyajcꞌamparobꞌ. Y ojron e rey y che: —Arenic tuaꞌ oꞌchoy, che e rey.

⁶Entonces e Amán ochoy y arobꞌna umen e rey cocha era y che: —¿Tucꞌa erer achena taca inteꞌ winic xeꞌ cꞌani intattzꞌi? che e rey. Entonces e Amán cay ubꞌijnu tama uyalma y che: “¿Chi canic cꞌani uyajcꞌu e tattzꞌarsiaj e rey? O ¿nen canic?” xeꞌ che e Amán tama uyalma.

⁷Y tamar era ojron y che: —Pues e winic lo que cꞌani atajttzꞌa umen e rey

⁸ucꞌani tuaꞌ abꞌujcsena taca inteꞌ nuxi bꞌujc xeꞌ cay alapi net, y ucꞌani tuaꞌ ataresna incojt chij xeꞌ cay turuanet tujor xeꞌ ayan inteꞌ ujojbꞌibꞌ ujor bꞌan cocha cay acꞌampes conda turet tamar.

⁹Y entonces e bꞌujc y e chij ucꞌani tuaꞌ ajcꞌuna inteꞌ ajcꞌampar xeꞌ más nojta ucꞌampibꞌir tuaꞌ asutpa ubꞌujcse e winic xeꞌ cꞌani atajttzꞌa umen e rey, y de allí e ajcꞌampar era ucꞌani tuaꞌ uxantes tujor e chij tama tunor or e chinam, y ucꞌani tuaꞌ aꞌru taca inteꞌ nuxi nuc y che: ‘Pues bꞌan cocha era achena taca inteꞌ winic xeꞌ cꞌani atajttzꞌa umen e rey,’ che e Amán.

¹⁰Entonces e rey quetpa de acuerdo y tamar era uyare e Amán cocha era y che: —Pues ajnien quiqui chꞌama e bꞌujc y e chij, y chen bꞌan taca cocha war aware taca e Mardoqueo xeꞌ chꞌajnarir tuaꞌ e Israel xeꞌ war aturuan tama uyocher niotot. Y machix tuaꞌ awacta nien inteꞌ ojroner tama tunor lo que arobꞌna amener, che e rey.

¹¹Entonces e Amán uchꞌami e bꞌujc y e chij, y cay ubꞌujcse e Mardoqueo, y de allí cay uxantes tujor e chij tama tunor or e chinam, y war aꞌru axin taca inteꞌ nuxi nuc y che: “Bꞌan cocha era achena taca e winic xeꞌ cꞌani atajttzꞌa umen e rey,” che e Amán.

¹²Pues conda cꞌapa uchiobꞌ e xambꞌar, e Mardoqueo sutpa ixin tuaꞌ aturuan tama uyocher uyotot e rey, y e Amán sutpa ixin tuyotot war aquetpa tzajtaca ut y quetpa jobꞌor ut.

¹³Y conda cꞌotoy cay uchecsu tunor lo que numuy taca uwixcar Zeres y taca tunor e winicobꞌ xeꞌ war atzay uwira ubꞌa tacar. Entonces jaxirobꞌ ojronobꞌ y chenobꞌ: —Pues jay machi uyubꞌiet amanxujres ut e Mardoqueo, motor que jax taca inteꞌ xeꞌ chꞌajnarir tuaꞌ e Israel, entonces chequer que jax net xeꞌ tuaꞌ iquetpa manxujresbꞌir umener, che uwixcar y e winicobꞌ era.

¹⁴Pues warto oꞌjronobꞌ e Amán, conda cꞌotoyobꞌ e manobꞌ tuaꞌ e rey tuaꞌ uqꞌuechiobꞌ axin esto tama e wiar xeꞌ ustabꞌir umen e Ester.