ESRA 4

1

2

3

4

5

6

7

8

9

10

¹A Iuda bona Beniamina taudia inaidia na e kamonai hari noho-hedoa amo vada e lou mai taudia ese Iehova, Israel Diravana, ena dubu e haginiava;

²bena idia ese Serubabele bona iduhu kwaradia dekedia ela, e hereva henidia, eto, Mani emui kara ai na umui ida dubu baita haginia hebou; badina be ai ese emui Dirava a toma henia dihomu, umui heḡereḡeremui, bona a bouamu danu, Esarahadon, Asuria pavapavana, ese e mailaimai bona ina gabu ai e hanohomai negana amo ema bona harihari.

³A Serubabele bona lesua bona iduhu lohiadia oredia Israel ai ese e haere henidia, eto, Umui na asi emui ḡaukara ai emai ai, emai Dirava ena dubu ihaginina ai; a ai sibomai ese baia haginia, Iehova, Israel Diravana, ena, King Kurese, Parasa pavapavana, vada e haḡanimai heḡereḡerena.

⁴Bena tano taudia ese Iuda taudia lalodia e ani bona e hagaridia, una ḡaukara ai;

⁵bona hahealo taudia haida davadia e kara, edia ura ḡaukarana bae laoa ahu, Kurese, Parasa pavapavana, ena dina iboudiai, ela bona Darauese, Parasa pavapavana, ena lohia negana.

⁶Bena Ahasuero e lohia matama negana ai, idia ese hahebade pepana e torea, Iuda bona Ierusalem inoholaidia taudia ihahebadelaidia.

⁷Aratasasta e lohiava negana ai, Bisilama bona Mitredata bona Tabele mai bamodia oredia ida ese Aratasasta, Parasa pavapavana, e tore henia. Edia revareva be Aram revarevadia bona gadona amo e torea.

⁸Rehumu, tuari oreana biaguna, bona Simisai, itorena tauna, ese Ierusalem ihadikana revarevana ta na King Aratasasta e tore henia.

⁹Rehumu, tuan oreana biaguna, bona Simisai, itorena tauna, mai bamodia oredia ida, hahemaoro taudia, lohia taudia, heitatao taudia, bona Parasa bona Ereke bona Babulono bona Susa taudia (unu na Elam taudia),

¹⁰bona lohia badana bona herea-daena Osonopara ese e laohaidia Samaria hanuadia bona Sinavai Badana unukahana basileiana orena lalodiai e hanohodia besedia oredia, ese revareva e torea.

¹¹E siaia revarevana lalonai e tore herevadia bini: Revareva King Aratasasta ena: Emu hesiai taudia, Sinavai Badana inikahana basileiana ai e nohomu taumai, ese a hahenamo henimuimu.

¹²Harihari oi, pavapava taumu, ba diba, hari Iuda taudia oiemu amo dekemai ema na Ierusalem vada ela. Idia ese una daḡedaḡe bona kara dika hanuana ma e haginia loumu; maḡu na be ha-oreamu, bona ruma badidia e banidia.

¹³Oi pavapava taumu ba diba, ina hanua na bema haginia lou bona maguna bema ha-orea, bena idia ese heaiva eiava kohu davadia eiava tax basie heni, bena oi pavapava taumu emu taḡa na baine maraḡi.

¹⁴Ai ese pavapava ena ruma damenana a animu dainai, dia namo ai ese hanua pavapavana ihahemaraina baia itaia; taunabunai ina hereva a siaia vasimu, oi pavapava taumu ihadibamu,

¹⁵bena senemu sisigadia bukana ai bae hetahu. Una sisiga bukana ai ba davaria bona ba diba, ina hanua na daḡedaḡe hanuana, pavapava bona basileia ihadikadia ḡauna. Nega gunadia amo taravatu idadaraina karadia vada e tubu ia lalonai; una dainai ina hanua na e habuaia tari.

¹⁶Oi pavapava taumu a hadibamumu, ina hanua bema gini lou bona maḡuna bema ore negana ai, oi na asi emu ḡau ta, Sinavai Badana inikahana basileiana idoinai lalonai.

¹⁷Hanua pavapavana ese ena haere e siaia. Haere na binai: Revareva Rehumu, tuari oreana biaguna, bona Simisai, itorena tauna, mai bamodia oredia Samaria bona Sinavai Badana enekahana basileiana orena lalodiai e nohomu edia: Na hahenamo henimuimu.

¹⁸Dekemai o siaia mai revarevana na vairagu ai vada e duahia hedinarai.

¹⁹Bena na hahedua, bena vada e hetahu; vada e davaria una hanua ese nega gunadia amo hanua pavapavadia vada e tuari henidia, bona ia lalonai daḡedaḡe bona taravatu idadaraina karadia vada e kara.

²⁰Pavapava herea-daedia ese Ierusalem vada e lohiaia; Sinavai Badana enekahana basileiana idoinai ese heaiva bona kohu davadia bona tax na idia e henidia.

²¹Taunabunai ba hahedua, unu tatau ese edia ḡaukara bae hadokoa, bona hanua na basie haginia lou, ela bona lau ese hahedua herevana ta ma baina gwauraia.

²²Nahuamui ba toho, ina kara ai basio manoka. Anina be dahaka ina hekwakwanai ḡauna na baine tubu badabada, hanua pavapavana ihadikalaina.

²³King Aratasasta ena revareva herevadia na Rehumu bona itorena tauna Simisai mai bamodia ida vairadiai e duahi hedinarai; bena idia na Iuda taudia Ierusalem ai dekedia ela haraḡa, bona mai goadadia bona mai siahudia ida edia ḡaukara ai e hadokodia.

²⁴Bena Dirava ena dubu Ierusalem ai iḡaukaralaina e doko vaitani, ela bona Darauese, Parasa pavapavana, ena lohia laḡanina iharuana.