1लेश्शा जाक्शो ग्याइश्शा लाइक्चा पुंइसीशो यहूदा नु बेन्यामीन आस थर ङा मुरपुकीमी परमप्रभु यावे, इस्राएली आन परमप्रभु आ खिं सेल्ना सेल्न बाक्नीम देंशो लोव़ आन जोरी सत्रुमी नेंतेक्म।
2मिनु मेकोपुकीमी जेरूब-बाबेल, येशुआ नु खिं खिं ङा ठेयब मुर आन बाक्तीकेमी जाक्शा “गो आंइ कली यो गे नु गारशा, मेको खिं सेल्चा गेकी। गो यो गे इन खोदेंशो पा इन परमप्रभु कली ठेयब सेल्ना सेल्न बाक्नीकी। मिनु गो आंइ कली एक चाक्ब अस्सुर ङा पिप एसर-हददोन आ पाला रे गो यो इन परमप्रभु कली चढ़ेन चढ़ेन बाक्तक” देंतेक्म। येरमीया ४१:५; २राजा १७:२४-३३; २राजा १९:३७
3तन्न जेरूब-बाबेल, येशुआ नु इस्राएली आन लीशो खिं खिं ङा ठेयब मुरपुकीमी मेको आन कली “एको खिं गो इस्राएली आंइ परमप्रभु कली सेल्नीकी। एकेर गे इन पचा माल्शो मारेइ मबाक्ब। पारसी ङा पिप कोरेसमी आंइ कली अरेशो खोदेंशो पा, गो आंइ परमप्रभु यावे, इस्राएली आन परमप्रभु आ खिं आंमान सेल्नीकी” दे माइक्तेक्म।
4मिनु नोले मेको रागी ङा मुरपुकीमी यहूदी आन कली आन थुं तोक्शा गेम्तेक्म। मिनु मेको खिं मसेल्पाइक्चा कली हिंच कोंइताक्म।
5मिनु यहूदी आन गेय नेल्ल क्याम्पाइक्चा कली, मेकोपुकीमी दरवार ङा ठेयब मुर आन कली घूस गेम्तेक्म। मिनु मेकोपुकीमी पिप कोरेस आ सासन पची ना रे पारसी ङा पिप दारा आ सासन पची ना सम्म मोदेंशो गेय पना पन बाक्तेक्म। एज्रा ४:२४
6मिनु अहासूरसमी सासन पचा गोवा आ ङोंइती ङा बर्स, मेको रागी ङा मुरपुकीमी यहूदा नु यरूसलेम ङा मुर आन कली दोस गेशो ब्रेक्स का ब्रेक्शा सोइक्ताक्मी।
7मिनु बिश्लाम, मिथ्रेदाथ, ताबेल नु मेको आ वारच नेल्ल गारशा पारसी ङा पिप आरता-सास्त कली ब्रेक्स का ब्रेक्ताक्म। मेको ब्रेक्स अरामी आन लोव़मी ब्रेक्शो बाक्त। मिनु मेको आ अर्थ यो ब्रेक्शो बाक्त।
8पिप आ सोइश्शो रेहुम नु ब्रेक्तीक गेय पाइब शिम्शाइमी, पिप आरता-सास्त कली यरूसलेम आ पर्बम ब्रेक्स का ब्रेक्ताक्स।
9पिप आ सोइश्शो रेहुम, ब्रेक्तीक गेय पाइब शिम्शाइ नु मेको निक्शी नु गेय पाइबपुकी, निसाफ पाइबपुकी, पिप आ सोइश्शोपुकी, पारसी ङा ठेयब मुरपुकी, एरेक नु बेबीलोनमी बाक्ब सुसा एलाम ङा मुरपुकी
10नु नेल्ल क्येङा ठेयब मान पचा पुंइसीशो ओस्नापरमी ग्याइश्शा लाइश्शो मुर आन रागी रे ग्रुंइशा सामरीया सहर नु आ एर ओंथ नु युफ्रेटीस खोला आ आइक्ची हांबुमी वोइश्शो मुरपुकीमी ब्रेक्ताक्म।
11मेको सोइश्शो ब्रेक्स ङा लोव़ मार बाक्त देंशा हना “पिप आरता-सास्त कली युफ्रेटीस आइक्ची हांबुमी बाक्ब गेय पाइबपुकीमी इन कली ‘रिम्शो बाक्कीन’ देंनीम।
12पिप इन कली मार लोव़ तुइक्पाइक्चा दाक्नीकी देंशा हना, इन कली प्रोंइशा एको रागीमी जाक्ब यहूदीपुकी यरूसलेममी जाक्तेक्म। मिनु मेकोपुकीमी काइ मटीब नु मरिम्शो पाइब आन सहर कली लेंशा सेल्ना सेल्न बाक्नीम। मेकोपुकीमी मेको आ जग लेंशा सेल्शा, आ गारो यो प्रोव़ने थुम्चशो बाक्नीम।
13पिप इन कली मार लोव़ तुइक्पाइक्चा दाक्नीकी देंशा हना, मेको सहर कली लेंशा सेल्तेक्म नु मेको आ गारो प्रोव़ने थुम्तेक्म हना, मेकोपुकीमी पिप कली थाप्तीके, आन चेम्शो रे थाप्तीक नु आन रू ङा थाप्तीके मारेइ मथाप्नीम। मिनु मो पामेनु, पिप इन कली मरिम्शो दुम्ब।
14गो पिप इन गेशो जाइनीकी। मोपतीके सुइम इन कली मान मपशो कोव़चा मदाक्नीकी। मोपतीके पिप इन कली एको लोव़ तुइक्पाइक्चा कली लोव़ कुरब मुर सोइक्ताक्क।
15इन किकी पिपीमी ब्रेक्शा वोइश्शो ब्रेक्स माल्शा, कोव़ङीन। मेकेर मार ब्रेक्शो बाक्मे थित्नीनी। मेको सहरम काइ मटीब मुर बाक्नीम। मेकोपुकी पिप नु रागी कली मरिम्शो पाइब बाक्नीम। मोपतीके एको सहर कली खतम पोक्शो बाक्त।
16मिनु गो पिप इन कली मार लोव़ तुइक्पाइक्चा दाक्नीकी देंशा हना, एको सहर लेंशा सेल्तेक्म हना, नु मेको आ एर ओंथ ङा गारो प्रोव़ने थुम्तेक्म हना, युफ्रेटीस आइक्ची हांबुम इन के मारेइ अधिकार मलीब” दे ब्रेक्शो बाक्त।
17मिनु पिपमी “आं सोइश्शो रेहुम, ब्रेक्तीक गेय पाइब शिम्शाइ नु सामरीया सहर नु आ एर ओंथ नु ठेयब खोला आइक्ची हांबु बाक्ब इन गेय पाइब आन कली ‘रिम्शो बाक्कीन’ दे ब्रेक्नुङ।
18इन सोइश्शो ब्रेक्स आं कली रिम्शो पा पढेशा मेको आ अर्थ नेंपाइक्तीमी।
19मिनु गे इन देंशो खोदेंशो पा ब्रेक्शा वोइश्शो लोव़पुकी माल्पाइक्तामी। मिनु मार थिंसाक्व देंशा हना, मेको सहर ङा मुरुमी पिप आ सासन पतीकेमी मटिशो आ पर्बम शुश लोव़पुकी ब्रेक्शा वोइश्शो थिंसाक्व। मिनु साइ रे मोदेंशो मटितीके, पना पन पिशो बाक्तेक्म।
20यरूसलेममी सासन पाइब सक्ति पाइश्शो पिपपुकी बाक्तेक्म। मेकोपुकीमी युफ्रेटीस आइक्ची हांबु ङा रागी नेल्ल अधिकारम वोइश्शो बाक्तेक्म। मिनु मुरपुकीमी पिप कली थाप्तीके, आन चेम्शो रे थाप्तीके नु आन रू ङा थाप्तीके नेल्ल थाप्शो बाक्तेक्म।
21मोपतीके मेको मुर आन गेय तेक्चा माल्ब, दे मतीन। मिनु गो हुकुम मगेङा सम्म मेको सहर लेंशा मसेल्मेक्ल।
22गेपुकीमी मेको आ पर्बम इन पचा माल्शो गेय हेंथे मपने। पिप आ गेय रिम्शो दुम्पाइक्चा कली मेको मरिम्शो गेय तेक्चा माल्ब” दे लोव़ कुरब मुर सोइक्ताक्व।
23मिनु रेहुम, ब्रेक्तीक गेय पाइब शिम्शाइ नु मेको नु गेय पाइब आन ङोंइती पिप आरता-सास्त आ ब्रेक्स पढेमे चोटीन रेहुम नु मेको नु बाक्ब छुल छाल बोक्शा दोरोर पा यरूसलेम लशा, मेकेर ङा यहूदी आन आन सेल्तीक गेय नेल्ल ग्रा ग्रु तेक्तेक्म।
24मे नोले यरूसलेममी परमप्रभु आ खिं सेल्तीक गेय देक्त। मिनु मोदेंशो पा पारसी ङा पिप दारा आ सासन पशो बर्स निक्शी जाक्दीम सम्म मेको सेल्तीक गेय देक्शा लीत।
