Erubasa 5:1-23

¹Mama, purungi nu pemineǥa is menge lalag ku he egkezumahan te ketau,

²su wey nu ikepaahà is hustu wey kedlalag he egkezumahan te ketau.

³Is lalag te vahi he mengungumpadi meemis pa te teneb, ne is kegkaǥi zin ebpekevihag iring te idhamham he lana te ulibu.

⁴Piru ziyà te egkehuziyanan is igketaǥak din diyà te kenikew iyan is keseengan wey kemereǥenan.

⁵Emun eduma ka kandin ne edumahan ke zin diyà te lugar te menge minatey; is dalan he ed-ikulen din ne ebpekepehendiyà te kemetayen.

⁶Wazè din seǥipaa is dalan pehendiyà te untung. Bulegkù is dalan he ed-ikulen din, ne wazè din heini metueni.

⁷Umbe, menge anak, pemineǥa a keniyu wey pezumdumahi.

⁸Likayi niw is bahi he mengungumpadi, minsan is ked-uvey zà diyà te ǥemawan te valey zin ne kenè niw ul-ulaha.

⁹Su emun ebeelan niw heini, egkaawà is dengeg niw ne egkaangken heini te zuma, ne edhimetayan kew te menge etew he wazà kegkehizu.

¹⁰Ne is langun he ketiǥeyunan niw wey is duma pa he hineǥuan niw egkuwaan te menge lumelengyawà.

¹¹Ne ebpekezag-es kew emun edserupatey kew en, ne egkeǥuǥus en utew is lawa niw.

¹²Ne ebpekekaǥi kew te, “Geina iyan te igkeepes ku zà is kebmensuwa kedì; geina iyan te midsupak ku is indawey kedì.

¹³Wazè ku pemineǥa is ebpemenurù kedì.

¹⁴Umbe, iyan nepengkusan ku is hapit a egkepeel-elezi ziyà te etuvangan te nevurun he menge etew.”

¹⁵Iring te ed-inum ka te wahig he ebpuun te sekezuwè nu, iyan nu zà daan hileveti is esawa nu.

¹⁶Kenè nu ituǥut he egkehimu ka he iring te serebseb he minsan hentei zà he vahi is ebpekekuwa wey ebpekeinum duen.

¹⁷Kinahanglan he para zà heini keniyu te teleesawa; ne kenè niw heini peǥezami te zuma.

¹⁸Umbe, lipey ka pinaaǥi te esawa nu, ne verakat he tuvazi sikandin te Megbevayà.

¹⁹Mekempet sikandin wey ebpekahalin te ǥehinawa su iring is kekempet din te nati he selazeng, umbe zeyzey ke mewili ka kandin wey layun nu egkeisip is kebmahal zin.

²⁰Mama, kenè nu iyan isipa is bahi he mengungumpadi. Kenè nu iyan egkesuati is esawa te sengememaama.

²¹Su egkaahà te Nengazen is langun he menge vaal nu. Ne minsan hendei ka ebpevayà ne egkeehè ke zin.

²²Is mezaat he menge ulaula te lalung he etew iring te litag he ebpekehiket kandin.

²³Ebpatey sikandin tenged te kebpezumdumahi zin te mezaat he suat te lawa zin. Is ketutulebungi zin iyan ed-uwit kandin pehendiyà te penlevengà.