HEREVA LADA-ISIDIA 5:1-23

¹Natugu e, egu aonega ba hakede henia, taiamu ba hakala, egu lalo-parara enai;

²kara balaheni ba badinaia bona bibinamu ese aonega bae gimaia totona.

³Badina be bada-ranuna na lebulebu hahinena bibinana amo e hetuturu dobimu, bona ena hereva digarana ese dehoro digarana e hereaiamu;

⁴a dokona ai ia na idita, muramura iditana na heto; bona mai ganona, isena ruaosi e segedia darena na heto.

⁵Aena ese mase e diho heniamu, mase gabuna e lao heniamu dalana ai e rakamu;

⁶mauri dalana nahuana na se tohoamu; e raka kava raka kavamu, to ena dala asi dibana.

⁷Natu e, a kamonai henigu; udugu herevadia basio rakatanidia.

⁸Hahine unuhetomana na dauhai ba rakaia hanai, ena ruma iduarana basio raka henia kahi;

⁹ikwahimu na haida ese bae abi bona emu mauri laḡanidia na asi edia hebogahisi taudia ese bae abi oho na garina;

¹⁰idau taudia ese oi goadamu amo bae goada bona emu hekwarahi anina ese idau tauna ena ruma baine hanamoa na garina;

¹¹ela bona emu mauri dokona ai ba ḡanaḡana, gorere ese hidiomu bona tau-animu baine ha-ore negana ai.

¹²Una negana ai baoto: Mata-hakani na inai heniava, bona lalogu ese sisiba herevadia e dadaraidiava;

¹³e hadibagu taudia eredia asina kamonaiva, bona egu hahediba taudia asina hakala henidiava;

¹⁴mokona na dika vaitani hebou taudia bogaragidiai.

¹⁵Sibomu emu ranu gabuna amo, sibomu emu ranu gurina amo, ranu ba inua.

¹⁶Emu ranu baine lohilohi rohoroho eiava ariara ai baine aru lao a?

¹⁷Lasi, baine mia sibomu emu; idau taudia ida basie inua hebou.

¹⁸Emu ranu lohilohina baine namo; eregabemu ai o adavaia hahinena na ba moalelaia.

¹⁹Ia na dia hahinena namo-hereana na heto, eiava-miara raho-namona na heto. Ena lalokau ba moalelaia nega iboudiai; ena uraheni ese lalomu baine hahonua hanaihanai.

²⁰Natugu e, anina be dahaka lebulebu hahinena boma ura henia lalo-dika? Badina be dahaka anara hahinena ba rosia?

²¹Badina be tau ta ena kara na Iehova ese e itadiamu; Iehova ese ena dala iboudiai e itadia taomu.

²²Kara havara tauna na ena kara havara ese e idoaiamu, ena kara dika ese e ḡuiamu.

²³Matana asi ihakanina dainai e masemu; ena kavakava bada-herea dainai e boiomu.