Prabebs 5:1-23

¹Wal det sabibala bin kipgon tok, “Main san, yu lisin en teiknodis langa main sabibalawei en brabli gudwan wed,

²wulijim yu garra sabi hau blanga jidan gudwei, en enijing yu tok garra shoum najalot pipul yu sabibala.

³Maitbi naja men waif mait tok langa yu garram brabli switbala wed jis laik shugabeig. Im switinimap yu brabliwei en im kiskisbat yu en meigim yu wandim im,

⁴bat bambai na im garra libum yu en meigim yu jidan brabli nogudbinji garram loda pein.

⁵Det gel garra lidim yu blanga dai. Det wei blanga im garra go streit langa greibyad.

⁶Im nomo jinggabat blanga im laif, en im nomo sabi det wei weya im oldei bulurrumbat, im rong.

⁷“Wal main san, yu lisin langa mi na. Yu nomo tjakidawei detlot wed weya aibin oldei dalimbat yu.

⁸Yu kaan go gulijap langa detkain wuman. Yu nomo go gulijap langa det dowa langa im haus.

⁹If yu go deya wal najalot pipul garra rabishim yu en olabat garra gedim det rispek yubin abum basdam, en maitbi det hasbinwan garra kilim yu ded wen yu stil yangbala.

¹⁰En afta ola streinja pipul garra gajim yu ebrijing, nomeda yubin dum adwek blanga gajim detlot enijing, bat dei garra deigidawei detlot ebrijing na,

¹¹en yu garra kraikrai en abumbat loda pein en yu bodi garra binijap.

¹²En yu garra tok, ‘Wotfo ai nomo bin len? Wotfo ai nomo bin larram det sambodi dalimbat mi blanga dum rait ting?

¹³Ai nomo bin lisin langa ol main titja. Ai nomo bin teiknodis langa olabat.

¹⁴En mi jidan lida langa olabat en mi sheim miselp na.’

¹⁵“Wal yu garra laigim yu waif brabliwei en yu garra jidan trubalawei langa im.

¹⁶Wal im brabli nogud blanga yu wen yu faindim biginini brom najawan gel.

¹⁷Wen yu biginini olabat growap, yu wandim olabat blanga album yu, nomo detlot streinja pipul.

¹⁸Yu garra jidan brabli hepiwan garram yu waif en jidan brabli gudbinjiwei garram im du.

¹⁹Im brabli purdiwan gel jis laik det reinbo. Im laigim yu brabliwei, en larram im meigim yu jidan brabli hepiwan en im na garra oldei holdim yu gulijap.

²⁰Main boi, wotfo yu wandim gibit miselp langa najawan gel? Wotfo yu wandim silipsilipbat garram naja men waif?

²¹YAWEI det trubala God oldei luk ebrijing yu dumbat en im oldei lukinat weya yu oldei go.

²²Det nogudbalawei blanga nogudbala pipul im laiga trep. Det nogudbalawei blanga olabat garra taiyimap olabat wulijim roup.

²³Olabat garra dai, dumaji olabat nomo bin sabi hau blanga jidan gudbalawei. Olabat nogudbalawei garra deigim olabat langa greib.”