Muqâqiŋ Dâŋ 5:1-23

¹Motec‐mae, go hazec râehuc maŋɋârâŋ â mumutâc dâŋnane manazemec.

²Go iŋuc ecmuo ine weniŋuc erâ juju biaŋne bâfuazo i mana taracmu, ehame dâŋmumugezi mamanagere fuŋne mutaniŋkeocmu.

³Manakic, boe sau ŋokacte dâŋzi baŋac iŋucne aŋacnehec eekac, e micticnezi wokemaŋ dâŋ muʒiziwehuc muekac.

⁴Irec go qanaŋ dâŋticnere manatec aŋacne eocmu, ʒâhec ine gorao kegoc hâtâne me sâqe bune râpene mictara irec sâc eocmu.

⁵Ŋokac iŋucnezi hâmoc haeo jowacgu raocmu, e hata ira hâcne raekac.

⁶Ŋokac e jujure hataoa mi juekac, erâ go hone manac mi ecnehaŋtec qâsorierâ kosa barasa raekac.

⁷Motec‐mae, no dâŋ gazakopac ʒi manarâ moc mi nikecguzejec.

⁸Go ŋokac iŋucne dic bacnehuc ficticnere motâc moc mi maickezemec.

⁹Sifu ecmuo ine ʒâŋe biŋegezi ŋic gâcne jaŋere maio wawahane eha socɋâri jaha juhuc ŋic jaŋere meo fetec mi akicguniŋmu.

¹⁰Ine hâcne, ŋic furune jaŋe moneŋ mafa wiacge gowac rohapie gie bahuc wiac hure‐fâremeŋ i gâcne jaŋere biŋe eocmu.

¹¹Wiac iŋuc fua‐gareme hâmozo erâ kio huse ehuc dâŋ kecʒiŋuc mucmu:

¹²“Jei, no mu bâtiŋ enarezo mupie wemocte qatarapo, ehuc uŋdâŋ‐jeŋic mi manapo?

¹³No qaqazufâc‐nane jaŋere dâŋ wemocte qikiŋnepo â ŋic wiac naza qazuc embiŋ jaŋere dâŋte hazec wâc wemocte mi râepo?

¹⁴No iŋuc ehuc ŋic ŋondeŋko juhape ututuŋ jaha mimi qaqa fai‐naneo fezo ewec.”

¹⁵Go gahacne ŋonâŋtao qohotahuc maŋge erao sawa râetec fozejec.

¹⁶Ŋokac gâcne jaŋehec juhuc naru motec bâfuac‐jopacmu jaŋe âgo egarehuc sâcne mi baficguniŋmu.

¹⁷Naru motecfâcge jaŋe soka‐fârerâ ŋic furune moc mi bafickehuc go gahacne sawa baficguhuc junʒepieŋ.

¹⁸Irec go ŋokacge naru ʒeŋoŋ jaha rotec ŋonâŋge ewec ehec bubiaŋ faio jaha juzepirec.

¹⁹Ŋokac e gâjoŋ sereŋ hawari biaŋ â totoc fara tacnezi âgo jauŋ egareme bubiaŋ manazemec, erâ e gore ecneha jauŋ bacgume manatec sâckezejec.

²⁰Motec‐mae, go wemocte ŋokac kosa jujune erao maŋge râetec foocmu, me wemocte ŋic mocte ŋokac hâpohuc susu‐ticne ro fâre ecmu?

²¹Manakic, Wofuŋzi wiac ebac eekomec i hone‐fâreekac, ehuc hata raekomec sâc ruc bagarehuc juekac.

²²Ŋic sindaŋne e sâqocne‐ticnezi wiwitic ecneha ira feme kiekac.

²³E jahacnao bâbâtiŋ gie sâcne mi baekacte hâmoocmu hâcne, â mutuc matacne juekacte ʒâŋeruŋko wâc huocmu.