Proverbs 5:1-23

¹Fakag, mu tiyan’um ma ga motoyil ko gonop rog nge nangan’.

²Ma aram e ga ra nang rogon ni ngi i par pangim ni bfel’, me yag ni m’ug ko thin rom ni gab llowan’.

³Thin u dap’ilugun le’engin be’, e rayag nib athib ni bod e honey ma pi kiss rok e rib munguy ni bod e gapgep ni olive,

⁴machane bay i tomur, me pagem ndariy ban’en rom kemus ni mo’oy nge amith.

⁵Ra fekem nga’ar ko fayleng ko yam’; re kanawo’ ni be yan riy e kanawo’ ni sor ko yam’.

⁶Der ma par u daken e kanawo’ ni sor ko yafos; machane yug ma yanyan, ma dernang ko mang e be buch.

⁷Pifakag, mmotoyilgad ngog e chiney, ma dab mu paged talin bingyal’ e n’en ni gu be yog.

⁸Mu pired u orel ko mitney e bpin! Dab mu chugurgad nga taga’ mab rok!

⁹Fa’an gimed ra rin’, ma bugwomed ni immoy e ra yan ngak boch e girdi’, ma gimed ra yim’ ni kagmed bpagel nga pa’ e girdi’ ni der ma runguy be’.

¹⁰Arrogon, pi milekag e bay ra feked e gubin e fla’ab romed, ma tin kammu’gad i marwuliy e bayi milfan ngak be’.

¹¹Bayi chugur ni ngamum’ ma ga be gel’gel’, ni yi be longlonguy e ufin u dowam kem’ay ngabang,

¹²ma bay mu ga’ar, “Mang ni da’ug fol? Mangfan ni dagpag be’ nge yal’uwegneg?

¹³Da’ug motoyil ko pi sensey rog. Ma da’ug tiya n’ug ko tin u rogned.

¹⁴Ba tomgin mu gu pir’eg nike ma’fag u fithik’ e girdi’ ni yo’or.”

¹⁵Mu yul’yul’ ngak le’engim ma go’ ir e nge t’uf rom.

¹⁶Bitir ni pifakmed yug boch e ppin e dariy gamingrad ngom.

¹⁷Bitir ni pifakam e ngar ilalgad ngar ayweged gur, gathi milekag.

¹⁸Ere nge fel’ u wun’um le’engim me par e felfelan’ rom ko re pin ni kam la’ay —

¹⁹ma ba pidorang nib sumnguy fel’ngin ni bod e deer. Ngam par ni gab felfelan’ nga fel’ngin; mu pag nge longbiyem e t’ufeg rok.

²⁰Fakag, mangfan ni ngam adag yug reb e bpin? Mangfan ni nge unan’um nga fel’ngin le’engin be’?

²¹I SOMOL e be guy gubin e tin ga be rin’. Demturug e gin ga be yan ngay ma be yaliy.

²²Pi denen ko pi’in kireb e ba wup. Yad ma aw ngalan e nug ko kireb rorad.

²³Yad ra yim’ ni bochan e darir t’ared lanin’rad. Feni gel e pinat rorad e ra suruyrad i yan nga low.