EP̱ASUS 4

1

2

3

4

5

6

¹Wakan aha/ jin tana habuus gom Tap̱a mo yuḵkina um mo mmoshuwa shum bway ki mii kun ha me’d mo ka yuḵ jin yuḵkunu um mo be

²ka ris mii kun dhunu is ki gwa’d mo dhali ki mii ma ’thup e mo, ki bwa jin ’kuc̱u ki ’kari’th mo, mmothonkina uma thon me’di ’ko’d ka rem ’kup mo e mo/en mo

³mmoganankina um ’ba/ mo mmohal mo jin gamu gwo me’d e Shi/in mo eya deḵ jin deḵu/ gi mo ma ḵu’th is mo.

⁴Buŋgwar isi ṯal ’de/ mo dhali Shi/ini ṯal ’de/ mo jasi me’d jin ’kokunu mo mmoyuḵ um mo e mo ma ’teŋ kap̱en ’de/ mo, a’di jin ta’da yuḵ bum jin yuḵkunu mo,

⁵ki Tap̱an ṯal ’de/ mo dhali moŋgam gwo isa ’de/ mo dhali monṯal ’de/ jin cuc̱uwa cuc̱ mo,

⁶ka Arumgimis ’de/ mo dhali Ababa gi ana ’baar mo, a’di jin diki’da p̱owa ris mo ’baar mo dhali eya ris to ’baar mo dhali e bwaman ana ’baar mo.

⁷Hili a’the c̱ikunu ana ka ’deṯe/ ’deṯe/ mo isi ki mombar to jin c̱in ma Ḵrisṯẖos ki me’d mo.

⁸Wakan a’di okunu gwo mo ki: Ki a’di shinki bway momis mo tani a’di suski’da risa buhany uni gun bu’thkunu mo dhali a’di c̱iki to kun c̱inu ki me’d mo e ’kwani mo.

⁹(E gwo jin onu mo ki: A’di shinki bway momis mo, a’di ta ’pemen gwo gi wakata moye? Jasi ki a’di si’da/ thulki’d mo ka luŋgu’b isi moŋ’kulga/ gi mony’cesh mo.

¹⁰A’di jin thulki’d mo tani ta a’di si’da/ jin shinki bway momis mo ap̱owa ris mo gun si’dasi’d mo ki a’di midi ’taki ’tu’da ris to ’baar mo.)

¹¹Dhali tom piti kun c̱ina a’di ki me’d mo annihe/ be. Ki kun tiya mini ’taki ta uni kun dhunu ki she/ mo dhali kun tiya mmota imanc̱i gwo ma Arumgimis jin onu is mo dhali kun tiya mmota imanc̱i gwom ’borga/ mo dhali kun tiya mmota imanhila hil eya ḵaniisa mo dhali kun tiya mmota imanṯor gwo mo

¹²gom to gun ’tumu ’pen mo gom ’kwani kun dhunu ki she/ ki dhelel dhelel mo goma ṯu’c jin minu mii mo, dhali goma nyaŋ jin minu nyaŋ buŋgwar is ma Ḵrisṯẖos mo,

¹³ntagi ana ’baar mo mina ḵu’th is mo e mo jin gamu is me’d mo gi moŋgam gwo is mo dhali monyiṯẖ Ya/ ma Arumgimis mo eya ’bap̱ jin ’bap̱u/ mo ntagi mom bar gi tur piti jin ’tu’dkunuwa Ḵrisṯẖos mo.

¹⁴Wakan ki ana mina ’taki ’koki ’ko mo mmota uc̱i naskina/ mo ki ana minu ’koki ’dash mo dhali wuṯul mo dhali ḵal mo ka ris ’tham gi gwon thus ki eŋ ’kwani kun korakor mo ka maḵ buni kun takina uni mo eya he’k e jin he’kkina uni ka gany mo.

¹⁵Dhali mii gwan e i is mo mmoṯor gwoŋ gana/ e mo/en mo ki ana mina mii ca mo eya ris ’twaŋkal kuku/ mo e a’di mo, a’di jin ta’da ’kaŋ’kup̱ mo, a’di jin ta’da Ḵrisṯẖos mo be.

¹⁶’Peni a’di mo tani buŋgwar ka ’bimpil gamki is mo dhali c̱u’th ’kup̱i monṯal ’de/ mo ka ris gwocor mo, uni kun thip̱kina thip̱ gom a’di mo, ka ris yilsaŋ gi buŋgwar is ka ’deṯe/ ’deṯe/ mo ’kon mo mmomiiya ṯu’c ki ’dantar mo mmoca buŋgwar is mo dhali mmonyaŋa nyaŋ ki is piti e mo/en mo be.

¹⁷Shwane/ aha/ karkina gwom pem mo dhali bah gwom pem mo e Tap̱a mo ki um mini mii ’koki ’ko mo me’d jin ’kona ’kwani kun ’koki ta ’Kwani Yahuuda/ mo e mii ma dum buni gun ’kona uni ki p̱e’th mo.

¹⁸Uni tan ma dum buni a’tum ka ’tum mo mmo’ko ki dar gi momish gwo ’ban mo, mmo’ko ka pije/ ’peni mondiki/e ma Arumgimis mo haali/ gom miim p̱us buni kun ’kokin e uni mo goma dum buni gun ’bi’thkin ki ’bi’th mo.

¹⁹Uni warkin ki enthus mo dhali uni c̱iki is buniŋ gana/ mo e mii kun ’kanuwa ḵanthi/ mo, mmopur bwa mo mmoboṯka ris mii gun ’dap̱u/ e ki she/ ki she/ mo be.

²⁰Wakan um ’koki da/ara Ḵrisṯẖos mo be.

²¹Ṯoshka/ ki um ciḵ gwo gom a’di mo dhali ki um ṯorkunu gwo mo gom a’di mo me’d gwoŋ gana/ jin di’d eya Yesus mo.

²²Dhuyi aris miin dhamom bum ’pen ka pije/ mo, uni gun cila miim bum kun miina um kadhamo/ mo dhali kun p̱u/kin mo e mo ma he’k e ki e kun ’dap̱u/ mo

²³dhali tayi this mo e shi/in gi bwam bum mo

²⁴dhali hithi miin this mo, a’di jin uḵkunu mo mmowa e ka Arumgimis e mo ma ḵar/eŋ gana/ mo dhali moŋḵogu mo be.

²⁵Wakan dhalki ana dhuna ris gwon thus ’pen ka pije/ mo, dhali dhalka ris ’kwani ’baar mo ka ’deṯe/ ’deṯe/ o gwoŋ gana/ e uni gun nyaḵa uni ’ko mo haali/ ana tana to isa ’de/ ka rem ’kup mo be.

²⁶Ka nyor di’d mo tani hili dhalku/ miinthus ki mii mo. Dhalku/ ki dhala tente/ iya jis mo ka nyor buma du mo.

²⁷Dhali dhalku/ embula ’borga/ ki c̱i mo gom tap̱a ma ruma ’cesh mo.

²⁸Dhalku/ ki dhal a’din ’di/ bway mo mmodi mo mmoḵwal to mo, hili dhalki a’di dhal mii e i is mo mmomiiya ṯu’c mo, mmomiiya ṯu’c ki isi miim pa ki me’d piti mo, wakan ki a’di midi ’taki mish to c̱i mo gom uni gwansan kun mini mii ta gi to mo.

²⁹Dhalku/ ki dhal gwon thus bway mo mmop̱u’du/ ’peni ’twam bum mo, hili jasi a’di jin ’boro’d gom gwo jin yedhuwa ye’th sho’k mo, a’di jin midi ha me’d ki embul yan mo ki a’di midi ’taki c̱iya ’the ki uni gwansan kun ciḵki gwo mo be.

³⁰Dhali dhalku/ ki jwakaṯ Shi/in Dheleladhelel ma Arumgimis mo e a’di jin ’dap̱kunu um ’twa/ mo goma tee gi wanuwa wan ’ba/ mo be.

³¹Dhalka ris mii kun ḵa/aḵa/ ’pen mo dhala nyor jin deḵki’da deḵ mo dhala nyor jin miinu mo dhali cuuwa/ jin ’theru/ mo dhali mo ma thu’th ’pen jin thudhu mo mmodhu ’pen ka pije/ mo ’peni um mo nyaḵka ris mii kun dup̱a dup̱i e mo,

³²dhali tayi gi bwaŋkush ka rem ’kup̱ mo ka du kun ’ka’da’ka’d mo mmodhala mure/ gi miinthus ’pen ka rem ’kup̱ mo me’d mii jin dhalkin ma Arumgimis uma mure/ miinthus bum ’pen mo eya Ḵrisṯẖos mo be.