1Nahkay zla nahəma, nahəŋgalay kʉli ti kanjəhaɗumkabu lala aɗaba Melefit àzalay kʉli ti, awayay ti kə̂grum nahkay. Ahəŋgalay kʉli ti nu Pol ya a daŋgay bu azuhva tʉwi goro ya nəgri ana Bay geli ni.
2Nəɗəm nahəma, həŋgrumoru ahàr a haɗ e kiɗiŋ gekʉli bu, njəhaɗum kuɗufa, ɓesʉm zlam ya tə̀gri ana kʉli ni, ndumkabu, wayumvu.
3Kìgʉma akaɗa mis bəlaŋ àna tʉwi ga *Məsuf ge Melefit a. Nahkay ti zum njəɗa ti *kanjəhaɗumkabu àna sulumani gayaŋ.
4Aɗaba mam, leli ndam ga Yezu mìgia akaɗa mis bəlaŋana, nahkay vu geli biliŋ. Məsuf ge Melefit ti naŋ bəlaŋ. Nahkay ti ere ye ti Melefit àzalaki leli ga məgriani ana leli ni ti bəlaŋ daya.
5Bay geli ti naŋ bəlaŋ. Məfəki ahàr ti ka naŋ naŋ bəlaŋ. *Məbaray àna slimi gayaŋ, baray gani nani ti bəlaŋ.
6Melefit ti naŋ bəlaŋ, naŋ Bəŋ geli ɗek, agur leli ɗek, agray tʉwi e leli bu ɗek, anjəhaɗ a məɓəruv geli bu ɗek daya.
7Ay ti Krist àvia zlam sulumani gərgərana ana ku way way do geli a ɗek akaɗa gayaŋ ya awayay na.
8Pakama gani àbu məbəkiani a Wakita ge Melefit bu nahkay hi : « Àcəloru agavəla, àgəs mis ga njəɗa, àvia zlam ana mis a daya. »
9Ay ma ya tə̀ɗəm « àcəloru agavəla » ni ti awayay aɗəmvaba mam ? Awayay aɗəmvaba wuɗaka Krist àcəloru agavəla nahəma, àsləkabiya agavəla, àra ka haɗ a.
10Nahkay bay ya àra ka haɗ a ni ti àcəloru agavəla ca-ca e melefit vu day naŋ gani bəlaŋani ni. Àgray nahkay ti mə̂zum bay, mə̂gur zlam eley eley do ɗek.
11Naŋ gani àvia njəɗa ana mis ga magray tʉwi gərgərani àna naŋ a : mis ndahaŋ tìgia ndam *asak a, mis ndahaŋ ndam mahəŋgaray *pakama ge Melefit, mis ndahaŋ ndam məhioru *Ma Mʉweni Sulumani ana mis, mis ndahaŋ ti ni *ndam məbi slimi ana ndam ge Krist ahkay do ni ndam macahi zlam ana tay.
12Krist àgray nahkay ti, ti mis nday nani tə̂jənaki ndam gayaŋ ga magray tʉwi ge Melefit lala. Ndam gayaŋ ni ti akaɗa vu gayaŋ, awayay ti tə̂ŋgət njəɗa, tâŋgoru kama kama.
13Leli ɗek emigi akaɗa mis bəlaŋ ; nahkay ti aməfumki ahàr ka Wur ge Melefit ka ahar bəlaŋ, aməsərum naŋ ka ahar bəlaŋ daya. Emigi akaɗa mis məndəhani. Nahkay emigi akaɗa ge Krist ni, ere ye aməhəcikivu ana leli ni ti àbi.
14Ka sarta gani nani ti leli amələbi akaɗa ga bəza ni va bi. Nahkay ndam magosay mis ya təcahi zlam gatay ana mis ni etisliki mijiŋkia leli ke divi a va do. Nday gani tawayay tijiŋkia leli ke divi a ti akaɗa ga aməɗ akaba yam ya təzoru *slalah ga yam eley eley do ɗek ni, ay ka sarta nani ti etisliki va do.
15Ka gani nani ti aməɗəmum ma ge jiri, amawayumvu, amoru kama kama àna tʉwi ya magray ni ɗek, ti mîgi akaɗa ge Krist, naŋ ya ka ahàr geli, agur leli ni.
16Leli ndam gayaŋ ti akaɗa vu gayaŋ. Tamal vu ge mis majakwakabani lala, zlam ga vu gayaŋ ni ɗek tagray tʉwi gatay lala ti vu ni ɗek aɗək lala daya. Leli day nahkay : tamal mawayumvu, ku way way do agray tʉwi ya Melefit àvi ni lala ti amoru kama kama àna sulumani.
17Ere ye ti nawayay nəhi ana kʉli ni ti nəhiki ana kʉli àna slimi ga Bay geli. Ma gani nani ti nihi : Kànjəhaɗum akaɗa ga ndam ya tə̀fəki ahàr ke Melefit do ni va ba. Nday nahəma, majalay ahàr gatay ti masakani.
18Nday ti akaɗa nday a ləvəŋ bu, tə̀sər araŋa do ferera. Kè meleher ge Melefit ti nday ndam mirkwi, tə̀ŋgət sifa gayaŋ ya avi ana mis ni ndo. Nday nahkay ti aɗaba ahàr gatay ɓaŋ-ɓaŋ, tìci ma do.
19Nday gani mimili àki ka tay va bi, tə̀via ahàr gatay ana zlam magudarana ɗek, nahkay tagray zlam ya ti àɓəlay do simiteni ni ɗek kəlavaɗ, tìsliki məmbrəŋani koksah.
20Lekʉlʉm zla nahəma, manjəhaɗani akaɗa hini ti àrakaboru akaba ma ge *Krist ya tə̀cahi ana kʉli ni do.
21Pakama ya kìcʉm ni ti tə̀ɗəmki ka naŋ do aw ? Ere ye ti tə̀cahi ana kʉli ni ti manjəhaɗ gayaŋ do aw ? Zlam nday nani ɗek tagravu àna jiri ga Yezu ya àhi ana leli ni.
22Nahkay ti mbatumkaba majalay ahàr gekʉli a, ti kànjəhaɗum akaɗa gekʉli ya ahaslani ni va ba. Manjəhaɗani gekʉli ya ahaslani ni ti agudar mis, aɗaba nday ya ti tanjəhaɗ nahkay ni ti tawayay zlam ya tigi eri, tijiŋ tay ni ciliŋ.
23Gəsumkabá ti Melefit mâmbatikaba məɓəruv gekʉli ana kʉli a, ti kâjalum ahàr nahaŋ sulumani.
24Ahàr àɗəm kîgʉm mis mʉweni ya Melefit àgraya tay ka mawayay gayaŋ a ni, ti kânjəhaɗum àna jiri, kə̂grum zlam sulumani aɗaba lekʉlʉm ndam gayaŋ.
25Nahkay zla nahəma, kàsəkaɗum malfaɗa va ba, ɗəmumvu jiri e kiɗiŋ gekʉli bu sawaŋ, aɗaba lekʉlʉm ɗek kìgʉma vu a bəlaŋ.
26Tamal ti kə̀zumuma ɓəruv a nahəma, kàgudarum zlam àna naŋ ba. Wuɗaka fat àdiyu a ahay vu nahəma, kə̀mbrəŋuma məzum ɓəruv gekʉli na ;
27kə̀vumi divi ana *Seteni ge mesipet kʉli ba.
28Maslaŋa ya ti egi akal ahaslani ni ti mə̂mbrəŋ akal gayaŋ ni. Mâzay njəɗa ga magray tʉwi sulumani àna ahar gayaŋ gayaŋani ti mə̂ŋgət zlam ga məjənaki ndam talaga.
29Kagudarumi ma ana mis ba. Kəɗəmum ma nahəma, ɗəmum ma sulumani ya azoru mis kama ni sawaŋ. Ɗəmum ma ya àgəski məɗəmani ni, nahkay ma gani avi njəɗa ana ndam ya ti tici ni.
30Kə̀grum zlam ya ti ahəli ahàr ana *Məsuf Njəlatani ge Melefit ni ba. Məsuf gani nani ti Melefit àgrakia amal gayaŋ ke kʉli ɗek àna naŋ a, ga maɗafakiani kʉli ndam gayaŋ kà fat ya ti amara mahəŋgay leli ɗek ni.
31Zumaba ezir e kiɗiŋ gekʉli ba, kə̀zumumvu ɓəruv ba, kə̀ləgumvu ba, kìndivʉmvu ba daya. Kə̀grum cuɗay ba simiteni.
32Grum zlam sulumani e kiɗiŋ gekʉli bu, wayumvu, mbrəŋumfəŋa zlam ga bəza ga məŋ gekʉli ya tàgudari ana kʉli na kà tay a, nday day tə̂mbərfəŋa kè kʉli a, akaɗa ge Melefit ya àmbərfəŋa kè kʉli a ni. Àmbərfəŋa kè kʉli a ti àna tʉwi ge Krist ya àgray ni.
