Epeso 4

1

2

3

4

5

6

¹Eau Guiau ena tauauaugu, ea awanori‐laowa omi abo au laukomakomani emi abalaulau eai arinai se eogahaimiu wa,

²ma nuatudobidobiuioimiu eo ma iilalolomiu, eo emi nuatoatoa se laulau mo, au hainuatuuioimiu gadosisi boeana eai,

³au aipate Earua ena nuaheoiesega abo au sogohi loni ena abaaudidinimiu eai.

⁴Tauna esega mo, eo Earua esega mo, doha hinage se eogahaimiu wa edi eogahaimiu sunuma esega mo boeana eai;

⁵Guiau esega mo, eo sunuma esega mo, eo bapatiso esega mo.

⁶Eaubada hinage tatao gamagamagari Tamadi esega, ia tatao gamagaridi i saetawatawaidi, eo ia tatao gamagaridi i nuhuridi eo ia ginauri gamagaridi boeadi eai ie mia.

⁷Na, ita gamagarida esau ana, esau ana, ainauia se leamao enada Keriso ena ainauia nonoina se heaigonogonoaieda.

⁸Arinai i ene, “Ia i awasae ewa eai, tauauau gamagaridi i toaidi i woealaedi, ainauia abo i mosedi tatao aridi eai.”

⁹(Na, si ene i awasae wa, arinai ta nuatui ia i dobibagunama wa tanoubu ubuna eai, e nige’e wa?

¹⁰Ia i dobima ia ede hinage i awasae, galewa gamagaridi i saetawatawaidi, ginauri gamagamagari bena abo i hemonaudi.)

¹¹Ia tatao headi i ainauiaidi aposotolo eai se lau; tatao headi peroveta; eo tatao headi, evanelia taulauguguiaena, eo tatao headi, taulaulausui eo taulaulauheata;

¹²hetabu tataodi bena abo se helolodumadumaesegaidi, eo heaeai paisoana bena abo se paisoaei, eo Keriso tauna bena abo se tarinisae:

¹³Ita gamagarida eda sunuma esega eo Eaubada Natuna ta nuatui wa, arinai abo ta hemala taulolodumaduma, i lau e Keriso ena monauboriboriri lailaina wa ita hinage abo gonogonoada;

¹⁴i lau, i lau e tabu ita merumeru, hari lauheata, hari lauheata se earusaeda se earudobeda, doha mana i eohoida, eo tatao mo edi sibasiba, eo edi lauheata borabora, arinai se weseida ita bena se boraida.

¹⁵Na riba mamohoina mo ta ribaribaei gadosisi boeana eai, ginauri gamagamagari aridi eai ta tubu ia boeana eai, ia wa, Keriso uruuruna ede;

¹⁶ia arinai tauna se ohihai se tubei komakomani eo se heoiesegai, eau esau ana paisoa eo eau esau ana paisoa, doha eau gamagamagari se paisoa komakomani abo tauna se ohihai arinai abo se helai, eo sibasiba arinai ie tubu gadosisi boeana eai.

¹⁷Teina ea heribamiu ta, eo Guiau boeana eai ea ribahemasarahaeawa, omi tabu au laulau doha Etene isi edi nuatu gaibu eai se laulau.

¹⁸Edi nuasibasiba se hemasigiri, isi edi supusupu debana eai Eaubada ena mauri se miamurimuriei paana ede nuamatadi se gibugibu;

¹⁹nuadi se tomatoma arinai nuadi se lau esegadumaduma baaea arinai, eo laulau biibii gamagamagari se lauwataidi ma adidiridi.

²⁰Na, omi Keriso nige se heatamiu doha meta:

²¹ena au ene ia au ataiei, eo i heatamiuo riba mamohoina eai Iesu boeana eai.

²²Tau beabea wa, emi laulau nabada wa au lauhaidi au gabahesuaradi, ia i baaea doha nuaboeamiu eai i boraboraimiu;

²³omi nuamiu earuadi bena se heharihariudi;

²⁴eo tau harihariuna au lui, iaede se hetubu Eaubada ana ao eai, laulau dudurai mamohoina eai wa eo tabuna eai.

²⁵Arinai riba borabora au gabahesuara, tau esau esau, ma helena‐taumia, riba mamohoina mo taba se ribaei, paana ita tau esega eauna udoi udoi ede.

²⁶Ena au ouyalayala tabu emi laulau se baaea, tabu emi ouyalayala i otahai i lau e mahana i dui,

²⁷tabu diabolo ena sorasora au mosei.

²⁸Tauaiyahari tabu i aiyahari uio, na taba nimana eai i paisoa mo, paisoa mamohoi i paisoa, abo enana i abi, gonoana taudeha enadi i mosedi.

²⁹Tabu riba baaea esau awamiu eai i lulagema, riba lolodi mo, arinai tatao au riba hesibasibadi, eo riba wa tauataiena emi aba ainauiaidi.

³⁰Eaubada ena Earua Tabuna tabu u henuaamamna, ia debana eai heiheinoimiu se toreyao, i lau e abihemauri asubenana i lagema.

³¹Kalapi gamagamagari, eo siaiau, eo ouyalayala, eo heasiwolewole, eo arina baaea, au gabaudoiedi, eo nuatu baaea gamagamagari,

³²esau, esau au abiloloei, ma nuabigabigamiu, emi baaea au hainuatugabaedi, doha hinage Eaubada Keriso debana eai emi baaea i nuatugabaedio.