ኤፌሶና 4

1

2

3

4

5

6

¹ሄዋ ዲራው፥ ታኒ ጎዳው ኦꬂያ ዲራው ቃሼቴዳዌ ፆሳይ ሂንቴና ፄሴዳ ፄሳው ቤሲያ ዴዑዋ ሂንቴ ዴዓናዳን፥ ታኒ ሂንቴና ዎሳይ።

²ኡባ ዎዴ ሂንቴ ሂንቴ ሁጲያ ካዉሺያዋንታ፥ ኣሺኬቱዋኔ ዳንዳያንቻቱዋ ጊዲቴ፤ ኢቱ ኢቱዋ ማዲያዋን ሂንቴ ሲቁዋ ቤሲቴ።

³ሂንቴና ኢቲፔ ጋꬂ ቃቺያ ሳሮቴꬃን፥ ጌሻ ኣያናይ ሂንቴንቶ ኢሚያ ኢቲፔቴꬃ ናጋናው ሚኒቴ።

⁴ፆሳይ ሂንቴና ፄሴዳ ሂዶታይ፥ ሂንቴ ዴማና ጊዴ ናጊ ኡቴዳዌ ሜፂ ኢቱዋ ጊዶዋዳን፥ ኢቲ ኣሳቴꬃይኔ ኢቲ ጌሻ ኣያናይ ዴዔ።

⁵ኢቲ ጎዳይ፥ ኢቲ ኣማኑኔ ኢቲ ፂንቃታይ ዴዔ።

⁶ኡባ ጎዳይ፥ ኡባ ባጋና ኦꬂያዌ፥ ኡባ ጊዶን ዴዒያዌ፥ ኢቲ ፆሳይ፥ ኡባ ኣዉ ዴዔ።

⁷ሺን ኪሪስቶሲ ኢሜዳ ኢሙዋዳን፥ ኑኒ ሁጲያን ሁጲያን ዱማ ኢሙዋ ኣኬዶ።

⁸ሄዋ ዲራው፥ ፆሳ ማፃፋይ፥ «ኢ ፑዴ ꬎቃሳ ኬሴዳ ዎዴ፥ ኦሞዴቴዳዋንታ ኣፌዳ፤ ኣሳዉካ ኢሞታ ኢሜዳ» ያጌ።

⁹ያቲና፥ «ፑዴ ኬሴዳ» ጊያዌ ዋጊያዌ? ኢ ኮዪሮ ዱጌ ዎꬌዳ፤ ሄዌ ሳዓው ሂርኪ ዉርሴꬃሳ ዎꬌዳ ጊያዋ።

¹⁰ሃ ዱጌ ዎꬌዳዌ ባሬ ሁጴው ኣ፤ ሄ ኢ ኡባባ ኩማናዳን፥ ሳሉዋ ኡባፔ ꬎቂያሳ ፑዴ ኬሴዳ።

¹¹ኣሳው ኢሞታ ኢሜዳዌ ኣ፤ ኢ ኢቱዋ ኢቱዋ ዬሱሲ ኪቴዳዋንታ፥ ሃራቱዋ ቲምቢቲያ ኦዲያዋንታ፥ ቃሲ ሃራቱዋ ሚሺራቹዋ ቃላ ኦዲያዋንታ፥ ቃሲካ ሃራቱዋ ዎሳ ጎሊያ ካሌꬂያዋንታኔ ታማሪሲያዋንታ ኦꬂ ሱንꬄዳ።

¹²ኢ ሄዋ ጌሻቱ ኡባይ ኣማኒያ ኣሳ ኦሱዋ ኦꬃናዳኒኔ ኪሪስቶሳ ቦላን ኬፄታናዳን ጊጊሳናው ኦꬄዳ።

¹³ቃሲ ኑኒ ኡባይ ፆሳ ናዓ ኣማኒናኔ ኤሪና ቤቲያ ኢቲፔቴꬃኮ ጋካና፤ ኑኒ ኪሪስቶሳ ፖሎ ዲቻ ኬና ዲጪዴ፥ ዶንዛ ኣሳ ጊዳናዳና።

¹⁴ኑኒ ቤታን ያኔ ሃኔ ሾጬቲዴ፥ ባሬንቱ ጪሚያ ሃኖታን ኣሳ ባላ ኦጊያ ካሌꬂያ ጌኒያ ኣሳ ቲሚርቲያ ጫርኩዋ ኡባን ሱጌቲዴ፥ ሃዋፔ ሲንꬃው ናዓ ጊዳናው ቤሴና።

¹⁵ሺን ኑኒ ሲቆቴꬃን ቱሙዋ ሃሳዪዴ፥ ሁጴ ጊዲያ ኪሪስቶሳኮ ኡባባኒ ዲጫናው ቤሴ።

¹⁶ቦላ ጊዶን ዴዒያ ዱማ ዱማ ሻኮታይ ኣኒ ኢቲፔ ኦይቄቴዲኖ፤ ቃሲ ኩሜንꬃ ቦላይ ባሬው ኢሜቴዳሳ ኡባን ኢቱ ኢቱዋና ጋኬቲዴ፥ ኢቲፔ ኦይቄቲ ኡቴዳ፤ ሄ ዱማ ዱማ ሻኮታይ ኦꬃናው ቤሲያዋ ኦꬂያ ዎዴ፥ ኩሜንꬃ ቦላይ ሲቁዋን ዲጬኔ ባሬና ኬፄ።

¹⁷ሄዋ ዲራው፥ ታኒ ሃዋ ሂንቴንቶ ጎዳ ሱንꬃን ኦዳይኔ ማርካታይ። ሂንቴ ጎዒ ባዪና ቆፋ ቆፒያ ኣዪሁዳ ጊዴና ኣሳቱዋዳን ዴዖፒቴ።

¹⁸ኡንቱንቱ ዎዛናይ ꬉማኒ ዴዔ፤ ኡንቱንቱ ኣዪኔ ኤሬናዋንታኔ ኣዛዜቴና ዲራው፥ ፆሳይ ኢሚያ ዴዑዋፔ ሃኬዲኖ።

¹⁹ኡንቱንቱ ማታን ዬላ ጊያዌ ባዋ፤ ኡንቱንቱ ዎሹማው ካጄላናው ባሬንቱ ሁጲያ ኣꬂ ኢሚኖ፤ ቃሲ ቱናባ ኡባ ፓጪ ባዪናን ኦꬃናው ሎይꬂ ዮራቲያዋንታ።

²⁰ሺን ሂንቴ ኪሪስቶሳዋ ሄዋዳን ታማሪቤዪኪታ።

²¹ኣባ ቱሙ ሲሴዲታ፤ ቃሲ ቱማቴꬃይካ ዬሱሳን ዴዒያዋ፥ ኣፔ ታማሬዲታ።

²²ሂንቴ ካሴ ዴዒያ ዴዑዋ ኣጊቴ፤ ቃሲ ባሬ ጪሚያ ኣሙዋን ꬋዪያ ሂንቴ ኤጫ ኣሳቴꬃ ꬋዪሲቴ።

²³ሂንቴ ዎዛናይኔ ቆፋይ ኡባና ኦራፃናው ቤሴ።

²⁴ቱሙ ፂሎቴꬃኒኔ ጌሻቴꬃን ፆሳ ሌሚሱዋን ሜꬌቴዳ ኦራꬃ ኣሳቴꬃ ማዪቴ።

²⁵ሲሚ ዎርዶቶፒቴ። ኑኒ ኡባይ ኪሪስቶሳ ኣሳቴꬃን ኢቲ ኣሳ ጊዲያ ዲራው፥ ኣሳይ ኡባይ ባሬ ኢሻው ቱሙዋ ሃሳያናው ቤሴ።

²⁶ሃንቄቲቴ፤ ሺን ሂንቴ ሃንቁዋን ናጋራ ኦꬆፒቴ። ሂንቴ ሃንቁዋን ዴዒሺን፥ ኣዋይ ዉሎፖ።

²⁷ፃላሄው ፆዒያ ኢሞፒቴ።

²⁸ዉዒያ ኡራይ ሃዋፔ ሲንꬃው ዉዖፖ፤ ሺን ሄዋ ኣጊዴ፥ ሂዬሳቱዋ ማዳናው፥ ባሬ ኩሺያን ሎዖባ ኦꬂዴ ዳቡሮ።

²⁹ሂንቴ ሃሳያይ ሲሲያዋንታ ጎዓና ማላ፥ ኮሺያዋዳን ሜንꬄꬂያ ሎዖ ቃላይ ሂንቴ ዶናፔ ኬሶፔ ኣቲን፥ ኢታ ቃላይ ሙሌካ ኬሶፖ።

³⁰ፆሳይ ሂንቴና ዎዚያ ጋላሳው ሂንቴ ኣታሜቲ ኡቴዳ ፆሳ ጌሻ ኣያና ካዮዮፒቴ።

³¹ኢፂያ ሃኖታ፥ ዪሉዋ፥ ሃንቁዋ፥ ዋሱዋኔ ጫሻ ኡባ ኢታቴꬃ ኡባና ሂንቴፔ ꬋዪሲቴ።

³²ኢቱ ኢቶ ኬኪቴኔ ቃሬቲቴ፤ ቃሲ ፆሳይ ኪሪስቶሳ ባጋና ሂንቴንቶ ኣቶ ጌዳዋዳን፥ ሂንቴካ ኢቱ ኢቱዋ ኣቶ ጊቴ።