1Ngang eman chon fötek pokiten ai angang ngeni ach Samol, üa mochen pese ngenikemi pwe oupwe manaueni eu manau mi fich ngeni ewe kö seni Kot.
2Oupwe tipetekison fansoun meinisin, oupwe tipepwetete o mosonotam. Oupwe echenifengenikemi ren ämi songomangfengen lefilemi.
3Oupwe fokun achocho le tümwünü ämi tipeeufengen lon ewe Ngünmifel ren ewe kinamwe mi rifengenikemi.
4Mi wor eu chök inis me eman chök Ngün, usun a pwal wor eu chök apilükülüköch Kot a köri ngenikemi.
5Mi wor eman chök ämi Samol, eu chök lükülük, eu chök papatais,
6oua pwal eäni eman chök Kot, ewe Semen aramas meinisin, i a nemeni mettoch meinisin, a angang ren mettoch meinisin o nonom loch meinisin.
7Iwe, iteiten eman me eman leich sia fen angei ewe lifangen ümöümöch lon aükükün ewe lifang Kraist a ngenikich.
8Iei usun mine a mak lon ekewe Toropwe mi Pin: “Lupwen a feitä won ewe chuk mi fokun tekia, a emwenatä chomong chon oola lon an we mwich a pwal ngeni ekewe aramas lifanger.”
9Iwe, met wewen “a feitä”? Wewen pwe a akomwen feitiu lon ekewe leni mi alolol epin fanüfan.
10Ewe eman mi feitiu pwal i chök ewe eman mi feitä asen ekewe läng meinisin, pwe epwe amasoua unusen läng me fanüfan.
11I ewe mi “ngeni aramas lifanger”. A filätä ekoch pwe repwe soukünö, pwal ekoch repwe soufos, pwal ekoch repwe chon asoulängala aramas, nge pwal ekoch repwe soumas me sense.
12A föri ei pwe epwe amolöchü nöün Kot kewe aramas meinisin fän iten ewe angang souläng ra wisen föri, pwe repwe apöchökülätä ewe inisin Kraist.
13Iei usun oukich meinisin sipwe achufengenikich pwe sipwe eufengen lon ach lükü Jesus pwal lon ach sileöchü ewe Nöün Kot. Sipwe eäni tipen mwän lon manauach, pwe sipwe tori ükükün ewe unusöchün Kraist.
14Mürin sisap chüen sokuni sokun semirit, sisap chüen chüwölüwölfeil ren no kana o mamaanfeil ren enienin asepwälin än chon likatuputup afalafal, ir ätekewe mi emweningaua ekoch aramas ren ar tunochofona.
15Nge ren ach kapas wenechar fän tong sipwe fokun mämäritä lon mettoch meinisin ngeni Kraist, i ewe möküren mwichefel.
16Fan an nemenem ekewe sokopaten kifetin ewe inis meinisin ra masfengen, nge unusen ewe inis a kochufengen ren ekewe kirupun lekupukup meinisin mi wor ren. Iei usun lupwen eu me eu kewe kifetin inis a föri wisan, unusen ewe inis epwe mämäritä o püsin pöchökületä ren tong.
17Iwe, fän iten ach Samol üa fönöökemi pwe ousap sopwela le manaueni manauen chokewe mi nom lon rochopwak, pun ar ekiek a lomotongau,
18a rochopwak lon letiper. Resap etikich le manaueni ewe manau mi fö Kot a ngenikich, pun ra fokun tiparoch o tipeförea.
19Resap mefi säw. Ra fangatä püsin ir ngeni mocheisou me sokun föför mi limengau meinisin, nge resap mochen ükütiu seni.
20Nge mine oua kaiö usun Kraist esap iei usun.
21Enlet, ämi oua fen rongorong usun i, oua pwal kaiö ewe let mi nom lon Jesus, pokiten oua chon tapwela mürin.
22Iei mine oupwe likitätiu ekewe föför oua föföri lupwen oua manaueni ewe manauen lom, iei ewe manau a katala ren an kewe mochenia mi atuputup.
23Letipemi me ekiekimi epwe fokun söfösefäl,
24oupwe fokun angei ewe manau mi fö mi för lon lapalapen Kot o pwäla lon eu manau mi enletin pwüng me pin.
25Iei mine ousap chüen kapas chofona. Oupwe eäni kapas wenechar ngeni pwimi kewe souläng, pun kich meinisin kifetin ewe inisin Kraist.
26Are oua song, ousap mwüt ngeni ämi song epwe emwenikemiilong lon tipis! Ousap amwöchü ämi song tori akkar epwe tuputiu.
27Ousap mwüt ngeni Tefil an epwe sotunikemi pwe oupwe tipis.
28Eman mi sosolä me lom epwe ükütiu le solä, nge epwe achocho le angang pwe epwe wor met epwe lomot ngeni püsin i, epwe pwal tongeni alisi ekewe mi wöüngau.
29Esap wor kapas mi ngau epwe towu seni lon awemi, pwe kapas mi mürina chök, sokun kapas mi afefetai aramas o alisiir lon ar osupwang, pwe chokewe mi rongorong ngeni repwe feiöch ren.
30Ousap achouala Ngünmifel, ewe Ngünün Kot, oua pwau ren tori ewe ränin än Kot epwe angasakemi.
31Oupwe atoaua senikemi sokun koum, chou me song. Ousap chüen akürang ngeni aramas ika turunufaser, ousap pwal chüen oput eman aramas.
32Nge oupwe eäni kirikiröch o leluköch lefilemi, oupwe amusamusfengen usun chök Kot a amusala ämi tipis ren Kraist.
