1Ascan un nocon Ifo yonoshonaiton ua cunu muran iquimanifo. Ascacun uhuun yoramishtichin ua nicasharacapun. Un mato cayacafi shinanmapai. Upa Diosin mato catonni man Jesucristo tanasharanon. Ascacun nan mato amapaiyai cuscan acahuun futsafoan mato oinquin nocon Ifohuunoa shinansharanonfo.
2Ascashu, —Tsoa futsacai ua cuscaramaran, —ishon shinanyamacahuun. Ascatamarocon icoincain futsafohuun ramapaicahuun tsoa ahuuatama icahuun. Funaquima manasharacahuun. Futsan chaca huamisi cuscan huafiaiton ahuun noiquin ahuun shinanchacayamacahuun.
3Diospan Yoshin Sharahuunshon Jesús icoinra huaa futsafo fu isharacahuun. Unimayanan isharatanancahuun. Nantishotapiquin nanscasi huatanancahuun.
4Ascano Jesús icoinra huafosi Diospan yorafoquin. Ascan nonfin ahuun caya muma cuscarafoquin. Diosin ahuun Yoshin Shara fustiton. Afin noco cuna non Jesús icoinra huacun noco imapaiyai cuscan non tapia. Noco yoiyotiani cuscan Cristo oaitian noco inanshquin. Nan fustifin non manasharamisiquin.
5Nanfin nocon Ifo fusti. Nan fusti non icoinra huaiton noco nimapacutiro. Non unu muran iquimamushon non yorafo ismano Upa Dios ahuun furumun Yoshin Shara fustiton noco iquitiro.
6Nocon Dios fustifin. Nan icoinra huafoan nocon Upaquin. Arus fustitofin nantifi noco iquimisiquin. Ascashu nantifi non ahuuna inon noco amapaiyai cuscan non anon. Nantishotapiquin nantifi nocofu rafucacaini. Aafin nantifiton nocon niaifo fustiquin. Ahuunoashu fusti nantifi non itiro.
7Ascafiata Criston nantifi nan non icoinra huafoti afi futsa futsa huaqui noco imapaiyai cuscan huafain noco ima non ahuunshon icoinra huashon futsafo non shara huanon.
8Ascano Diosin tsain Cristohuunoa cununi isca huaquin, “Mai anoashu Apa Dios ari nasonitian nan icoinra huafoti ato numani afanan Satanás aton ifo inonma. Ascatama Jesús tanasharanonfo. Nantianri nantifi ahuun yorafo imapaiyai cuscan ato imani ahuunoashu shara huatananonfo,” ishon cununi.
9Ascashon cunuquin isca huani, —Cristo afanan Apa Diosin icari nasoiran, —ishon aqui cununi. Nannori cununi non tapitiro Apa Diosin ari cataima iquisi na mai ano fotoyoni noco cuscara iishquin. Ascashu fasi omitsiscayoni.
10Apa ariashu mai ano fotoyoni. Nanton nai ari icafo yafi mai anoafori ato finoinnifoanna. Ascatan nan nai ariafo futan mai anoafoan ato ifo iishquin.
11Nantonfin noco catonpacuni noco amapaiyai cuscan ashu non shara huatananon. Ascashon afu rafumisi futsafo ato imafain nocorifi nichini ahuunoa futsafo non ato tapimanon. Futsafori catonni afin yorafo yoipaiyai cuscan afohuunshon ahuun tsain shara ato yoinon. Futsafori catonni nan tsain shara ahuunoa yoinonfo icoinra huashcaquin. Futsafori catonni ahuun tsain shara icoinra huafo tapimafain ato cushusharanon ahuun tsain tanasharanonfo.
12Nantonfin nantifi ahuun yorafo itisharamanaquin ahuunoashu shara huatananonfo. Ascacufin finonmafain non Jesús tanasharaquin. Nofiri non pimamuaino nocon caya mutsisipa sharacoin itiro. Nanscarifiai non futsafo fu shara huatanaino Dioshuunoashu non mutsisipa sharacoin Jesús cuscara non itiro.
13Ascano nannorisi non icoinra huafain non Diospan Furunhuunoa tapinon. Ahuunoa tapitacai non afanan facu cuscara itiroma. Nan nocofunu mapo shara ya Jesús cuscaracoin non itiro. Ascashu nan Cristo noco imapaiyai cuscan sharacoin non itiro.
14Non ascatacai facufo cuscara afanan non itiroma. Futsan facufo ahuarafo yoiaiton icoinra huatiro. Futsan ato yosiaiton icoinra huafain futsari chipo ahuarafo yoia cuscan nanforifi icoinra huatirofoquin. Ascashon futsa futsatapafo icoinra huatirofo. Ascacun noncai paramisifoan noco yosipaiyaifo cuscan non icoinra huatiroma. Noco yoicaquin, —Un mia icon yosiaran, —ishon noco yoipaifiaifoan Diospan tsain anorimacun noncai ato icoinra huatiroma. Noco fuparapaicani.
15Noncai ascarama. Ascatama nan icoinra huaa futsafo noicoinquin non ato icon fustisi yoitiro. Non ascaifin finonmafain nocon Ifo Cristo cuscara non icacainicain.
16Ahuunoashu non ahuun caya muma cuscara itiro. Afin catontiro nonmain ahuu cuscaraquin. Ahuun curushhuunshon afin noco amapai cuscan non atiro shara huan tananshquin. Non noinainno non shara huan tanantiro.
17Ascano nocon Ifohuunshon un mato shafacafi yoinon. Icoinra huamafo icafo cuscan afanan ascayamacahuun. Nanfoanfin ipaitsi chaca shinanmisifoquin.
18Ascashu yoitimashunifo. Aton nomuranshocai shinansharatirofoma Diosin ato imapaiyai cuscan aashcaquin. Afocai afu rafumisifoma ato nimapacunon.
19Ahuara chacafosi huai fuyacanashucai afanan tsoa rafipaitiroma. Nanscaisiai fuyafo, —Nanscanonquin. Ahuara chaca finonpaiquin finonon, —ishon anori fusti shinanmisifo. Chaca fustisi shinancani. Nocofunufo aton ahuinma fu imisifoquin. Nanscarifi ainfofo aton funumafo fu icaifono. Nanscara chaca futsa futsatapafo huamisifo. Tunuyamacaicani. Fasi finonmafain chaca huapaicani.
20Nanfoanfin nansca huamisifoquin. Ascafia Cristocai mato anori yosimisima.
21Ascatama Jesushuunoa mato ahuun tsain iconcoin yosiaiton man man nicamisi.
22Ascano mato yosimisi isca huaquin, —Marifi man man chaca huapaoni. Chaca fustisi man fuchipaipaoni. Nan chacafoan mato parafafaini. Afanan afo fuchipaiyamacahuun. Afo potacoincahuun, —ishon mato yosimisi.
23Ascacun man shinanpaoni cuscan afanan shinanyamacahuun. Natian shinansharacoinpacucahuun. Jesús shinain cuscan huafain maton nomuran marifi shinancoincahuun.
24Diosin sharacoin fusti cuscara funa shara icahuun. Jesús mato nashoni maton chaca soashonano Upa Dios cuscara shara man inon.
25Nonfin Cristo ahuun yorafoquin. Ascacun afanan chaniyamacahuun. Mato fu icafo icon fustisi yoifafaincahuun. Non icoinra huafofin Cristo ahuun caya muma cuscaraquin. Ascano noco murannoashu futsa chanicun ahuunshon nantififain non mutiro.
26Man mua sinai matsiriscacahuun. Man ascayamaino man chaca huatiroquin. Ascacun fari cataima matsicahuun.
27Man sinai unuyamacaiyaiton Satanás mato yonotiro. Man sinafiai matsiriscaitocai mato chaca huamatiroma.
28Ratoran futsan mato murannoashu yomutsoaiton a yoisharacahuun afanan yomutsononma yonoquinsharacahuun ahuun rafanan fiishcaquin. Ascan nan ahuara futsa yopaitonfin man inantiroquin.
29Ahua chaca yoitamarocon shara fustisi yoifafaincahuun. Man ato yoiaiton nicacashon futsafoan nan tsain shara nicaquin nocon Ifo finonmafain tanasharatirofo.
30Diospan ahuun Yoshin Shara matoqui nichini matofu rafupacunon Jesucristo oaitian afu man ipanon. Ascacun ahuunshon tapitirofo non Diospan yorafocun. Ascano man natian icai cuscan aquin Diospan Yoshin Shara ahuun nomuran omitsiscamayamacahuun.
31Ascacun futsafohuunoa shinanchacayamacahuun. Tsain isininpaton iyamacahuun. Sinayamacahuun. Sinacani mucayamacahuun. Futsa roayamacahuun. Chaca futsa futsatapafo shinanyamacahuun.
32Ascatamarocon mafin ranan noinancahuun. Nantifihuun ramapaicahuun. Upa Diosin Cristohuunshon mato rauhua cuscan huafain nanscarifiai rau huatanancahuun.
