1Yey nases wa̱deil daGuyaws peinan, o yey aguyeimiy silma̱nin amisinap beibwein, peinan bo idaweids va̱gan bitanekes ansinap bwanabwein waseg.
2Awoum kwaya̱pams, kadiloka kuma̱nums-wan, kwaptuleimiy, kusiwa̱youbs o kuvna̱ses simiyas.
3Kutawtouns va̱gan bukusesus ninoumiy katanok-wan, Kululuwan Yowbad waseg, mamagina bod katanok, niwal waseg woun katanok-wan, son Kululuwan-vak katanok-wan. Bo idaweids va̱gan danamis bitaseinis katanok-wan.
5DaGuyaws gog anmwa̱net, dasimounids katanok, o dakabaptays katanok-wan; Yowbad anmwa̱net, babaw ya̱kids Tamads, Takaleiwag youda babaw wasigeis, Tabunin youda babaw; e, youda babaw wasigeis nises.
7Bo isiwyoubuds katanok katanok ya̱kids, mamagina Kelis ivgen isekeids.
8Livan nises mamagina: “Mitiya̱mun neimwen nein wanakaew, bo iyous antameiliws babaw, itokes inawes nakabkaleiwag waseg, mo ivgen nasiwa̱youb inagamag wasigeis.”
9(Silawun livan towen: ‘Beimwen bein wanakaew,’ peinan wanmugwana neibus neim watinowa singay.
10Mtowen neibus neim, wankuyeim mo imwen ilisow liba̱lab in-o wanakaewa singay; mo ikadilok ven babaw wasigeis, va̱gan bisesuna bikalileiwag.)
11Nasiwa̱youb itam gamag wasigeis, sinap ikatipel isekes ma̱wana, mwasanin imlavags takanaweins aygan, mwasanin palopits, mwasanin takaweins livan bwanabwein, mwasanin tamtakavateins alen, mwasanin takatimlakays.
12Va̱gan kid bikimtuwes tayakelesiys bitawtouns silma̱nin nawotet o bikatimweis Kelis won bitawtoun.
13Mo bivag dasimounids bimlavag katanok-wan, babaw ya̱kids; nanouds katanok, bitakakina-wan Yowbad Natun; adsinaps bo bikadilok, mamagina Kelis ansinap tonen, peinan ansinap ikadiloka youda babaw wasigeis.
14Kweiboug adsinaps ma̱wana gamagals, nitaliganes takatidividavs sikaleiwag kweitan kweitan mo isunasun nanouds. Nagein gog bo imatuw adsinaps.
15Tut nagein adilivans mounid, siwa̱youb waseg, ikatimweis adsinaps mo imatuw, mo tanekes datoveks Kelis, mamagina kunun waseg tayakelesiys ya̱kids, o ya̱kids mamagina won tonen, antuvas babaw wasigeis, o won wuliyougwan katanok katanok ya̱kids, tamlavags woun katanok mo iwotet bwein, ikatimweis siwa̱youb waseg, mo ivakaein.
17DaGuyaws waseg gunakaleiwag mamagina, “Awoum beivag amisinap ma̱wana tasiyas tadadubs.” Ninous makava dadub; nag ikakins mwamovan Yowbad, peinan kates keikay mo ibol ninous.
19Nag ivag asimwasin wamatan Yowbad; sivines kid sinap singay kalbaleb o bikibik, bipwa̱kits waseg.
20Tage Kelis nag ikatimlakeids sinap ma̱wan.
21Adok towen waseg nukuliganes sinapun Yeisuw; kusimounids ansinap mounid waseg.
22Mapuna towen, kadiloka kupiyaves sinap kweiboug kalbaleb; peinan vikeiyan iyagageimiy; o ikatidev ninoumiy.
23E kweiboug sinap kupiyaves, kuninuways gog sinap kweivaw mo bukumlavags mamagina kweivaw gamag yakamiy; amisinap ma̱wana Yowbad ansinap mounid o didumwal.
25Kadiloka kupiyaves livan yaweid; tage bukulivans mounid wasigeis simiyas, peinan babaw ya̱kids wuliyougwan Kelis ya̱kids.
26Kukin bikapasal nuwam, awoum beivag amsinap kalbaleb. Awoum biveiyov mukwavikun. Awoum kwavvikuna ee... beiboug; awoum. Awoum kutam Seitan nakaleiwag waseg.
28Tavveinaw, kadiloka bipiyev sinap kalbaleb; tage naman waseg bweina biwotet beibwein mo biban inawotet anagin, va̱gan mo bivagein bisekes tasiyas tasimavs.
29Awoum livan kalbaleb bisunap wawdoumiy, awoum. Misinaka livan bwanabwein bukuliva̱nes va̱gan tasiyas tanganegs bikatimweis asisinap bivakaein, mo bitawtouns, ma̱wan sivines.
30Awoum bukuyagages nanon Yowbad Kululuwan Towen Bwanabwein. Mtowen waseg, Yowbad bo ilivtuwanids ya̱kids, va̱gan bitakakins igaw mo bikatinabweids.
31Kupiyaves sinap kalbaleb; awoum dibamiy bimouvit; awoum bukwavikuns, awoum bikapasal nuwamiy, awoum kutawyages simiyas.
32Tage kadiloka kusiwa̱youbs beibwein, bikalin nuwamiy simiyas wasigeis, igaw simiyas biyablebeimiy, kadiloka kunumlaves, peinan Yowbad, Kelis waseg, bo inumlev amisinap kalbaleb yakamiy.
