EP̱ASUS 2

1

2

3

4

5

6

¹Dhali a’di dhuki um ki e mo, ki um kun ’kokin mo mmowu mo gom gwon dhaŋ mo dhali miinthus mo,

²e uni kun iikina um ’thissa/ mo mmobaṯẖkina um ya gi mony’cesh yan mo dhali mmobaṯẖkina um miin tap̱a gi mom’bi’th kun p̱wanu/ e mis mo, jin ta shi/in c̱aan jin di’d mmo/um mo e iya/ gi iman/ush gwo ha e mo be.

³Ibwaman uni gwansan mo tani ana ’baar mo ’kokina mo nṯwa/a/ mo e em bana mo kun dhuna ana ki ’thir ’thir mo gom buŋgwar is bana mo, mmobaṯẖ bwa en’dap̱ mo gom buŋgwar is mo dhali bwa mo, dhali wakan ana ’kokina mo ki buyem pa mmota uc̱i ma nyor mo me’d ’kwanin tiya kun ta ’kwani en’thi/ mo be.

⁴Hili Arumgimis a’di jin ta pa ki pa e momiimii mo, ’peni dhan mo/en jin enkina a’di ana mo tani

⁵isi kani ki ana ’kokina mo mmowu mo e gwon dhaŋ bana mo tani a’di ki dhu ana mo mmo’ko ki e mo mmonṯal ’de/ mo nyaḵka Ḵrisṯẖos mo (Ka ’the mo tani um woṯẖkunu mo be),

⁶dhali a’di ki cu ana mis mo nyaḵki a’di mo dhali a’di ki dhu ana mmonyaḵ ’ko ki a’di mo e mo kun ’kon e momis mo eya Ḵrisṯẖos jin ta’da Yesus mo be

⁷ki she/ yil gunn kun mini p̱u’du/ mo tani a’di midi ṯor dhan pam piti jin tana a’di ka ’them piti jin molu bar mo e bwaŋkush piti mo ’kup̱ ki ana mo eya Ḵrisṯẖos jin ta’da Yesus mo be.

⁸Haali/ ka ’the mo tani um woṯẖkunu mo ki moŋgam gwo is mo be. Dhali yansan ta mii jin miina um ki is bum mo yisa. A’di ta to jin c̱in ma Arumgimis ki me’d mo be.

⁹Yisa, haali/ gom to jin miinu mowa, isi ciki/ jin mina wathin ’deŋ kamu/ diki kar ’ba/ ki ca mo.

¹⁰Haali/ ana tana kuma ṯu’c piti mo kun uḵkunu mo eya Ḵrisṯẖos jin ta’da Yesus mo gom mii ma ṯuca ’borga/ mo, uni gun thosonkin ma Arumgimis nṯwa/a/ mo ki ana mina ’taki ii e uni mo be.

¹¹Wakan kayi gwo e mo ki um ’thissa/ ta ’kwani kun ’koki ta ’Kwani Yahuuda/ e buŋgwar is mo kun yuḵkunu gway ki ku gi ’kon ka munyjal yis i e mo ki uni gun yuḵkunu ki uni gun ’ciṯẖuwa munyjal yis mo, a’di jin miikunu e buŋgwar is ki me’d gi ’kwani mo be.

¹²Kayi gwo e mo ki um ’thissa/ me’dyin um ḵwa/kunu bwa mo ’pena Ḵrisṯẖos mo, dhali um ta ku gi ’kon ka pije/ ’peni ’peŋkuman bampa/ ma Israyiil mo dhali um ta ’kwani kun moli gwo jin gamu me’d mo jin onu is mo. Um daran gi mo ma ’teŋ kap̱e/ mo dhali um daran ga Arumgimis gana/ mo e mony’cesh mo be.

¹³Hili shwane/ eya Ḵrisṯẖos jin ta’da Yesus mo tani um kun ’thissa/ si’dkin mo kagahara mo tani um suskunu mo mmo’dish mii is mo ka bas ma Ḵrisṯẖos mo be.

¹⁴Haali/ a’di ta moŋḵu’th is bana mo, a’di jin dhuki ana mmonṯal ’de/ mo dhali jin ’tuḵki mo ma goŋ jin ḵwa/u bwa mo ’peni mo jin tanu ’kup̱ mo

¹⁵mmop̱uukina a’di e buŋgwar is piti mo gwoŋḵan jin c̱inu mo dhali jin ’kwarkunu mo, dhali jin onu mo ki a’di midi ’taki uḵa uḵ e is pitiŋ gana/ mo wathin ṯal ’de/ jin ta jin this mo e mo gi unin su/ mo, wakan a’di karki mo ma ḵu’th is mo.

¹⁶Dhali wakan si’da/ a’di midi ’taki mii mii jin gwamkunuwa gwam mo gom am mo dhali um mo eya Arumgimis mo e buŋgwar isa ’de/ mo ki cwany’ciṯẖan dhul mo. Wakan a’di ki dil mo jin tanu ’kup̱ sho’k mo ntagi ’pemen mo be.

¹⁷Dhali a’di p̱u’dki’d mo dhali c̱i gwo gom moŋḵu’th is e um mo, um gun ’thissa/ si’dkin mo ki si’d thus mo dhali moŋḵu’th is e uni gwansan kun ’dishkina ’dish is mo be.

¹⁸Haali/ e a’di mo tani aman dhali um takina gi bway mo e Shi/ina ’de/ mo eya Baba mo be.

¹⁹Wakan um doḵ/e yisa ’kokin mo mmota ’kwani kun ’kon ka pije/ mo walla ’kwani kun ’kon ki ’kus mo ’peni bampa/ mo, hili um ta ku gi ’peŋkuman bampa/ mo nyaḵki uni kun dhunu ki she/ ki dhelel dhelel mo dhali um ṯal ma waḵa ’de/ mo eya ṯa/ ma Arumgimis mo

²⁰jin nyaŋkunu mo ap̱o/ mo jin ḵa’bkunu mo jin ta uni kun dhunu ki she/ mo dhali imanc̱i gwo ma Arumgimis kadhamo/ mo. AḴrisṯẖos jin ta’da Yesus mo, a’di ki is pitiŋ gana/ a’di ta’da ’kaŋ’kup̱ gi dhan wosh gi ’penabi mo be.

²¹E a’di mo tani aris mo ’baar mo kun re’du mo tani gam me’d imonṯal ’de/ mo dhali cu mo mmota gu’b gi mondheleladhelel e Tap̱a mo be.

²²E a’di mo tani um si’da/ inyaŋkunu mo e a’di jin ta monyc̱a’b ma Arumgimis e Shi/in mo be.