Eclesiastés 6

1

2

3

4

5

6

7

8

9

10

11

12

¹We-napneggine, dulemar-abargi we-boni nue-nika an daksad:

²Bab-Dummadi, abar-dulemarga ibmar-bukidar uked, mani-bukidar-nikuega imaked, deginbali, dule-nug-odummogega imakbalid. Degidbali, we-dulemar na ibmar-abegedba nikued. Degi-inigwele, Bab-Dummad, we-dule e-ibmar-nikuedgi-werguega imaksulid, aka dule-bamalad e-ibmargi-werguega imaked. Weyob-ibmar-guedi, gwen nabirsulid, boni-dummad dakleged.

³Ar dule-gwensak mimmigan dulatar-nikadibe (100), degine, birga-undar-gudii gusbardibe, ar ibmar-nuegangi-wergudigussuli-burgwisale, yogasaar-diglesale, an sogdo, bur mimmi-gwensak-burgwar-aidenonikir, bur we-duleba nuedye.

⁴Ar we-mimmi-burgwar-aidenonikid gwen neg daksasulid, degine, negsichigi megidapid. Deyob negsichigi-megidapidgi gwen bar egi binsaledsurbalid.

⁵We-mimmide, gwen dad-ibeler-daksasulid, gwen neg-wisgussulid.

⁶Degi-inigwele, we-mimmi, dule birga-milibo-gudigusadba (2,000), degi, gwen-ibmar-nuegangi-wergussur-gusadba, bur bogidikid nue-nikusad. ¿Ar bela dulemar bergunonikile, burgwed-negse bela naedsemarsursi? Bela naedsemalad.

⁷Dulemar mas-gunnegala arbaedginbi alamakdidamalad, degi-inigwele, e-ukuddi gwen bergusurbalid.

⁸Ar dule-binsaed-ibed, ¿ibuginbi dule-binsaedsulidgi-obinsisunna? Ar dule-wileged, nabir-bonigan-abin-gwisgudiidgi, ¿ibi-nued egi amimosunna? Ar e-bogwad na yopira bonigangi obindimalad.

⁹Ibmar-sanakwa-daklegedi, ibmar-ulubginbi-abelegedba bur nuedid. Ar we-ibmar gwen nabirsurbalid.

¹⁰Ibmar-gudiidi bato e-nug nika gudiid, ar bato wisgulesad, we, dule gue. Deginbali, dule, gege dule-bur-eba-niga-gandikidbogwa urwed.

¹¹Gadi-sunmaklegedgine, yogasaar sunmakleged. Ar we-ibmargi, ¿ibu-ibmar-nued egi amilesunna?

¹²Degisoggu, we-napneggi wis sikwas-gudiidgine, dule wissulid, ibu ega nued noe. Degisoggu, we-napneggi, unnila sikwas-gudigued, gwen nabirsulid. Ar dule-gudiid, burwa-goleyob sikwas-buu nasoed. Ar dule burgwisad-sorba, ¿doa ega sogosunna, igi neg guoye?