Eclesiastés 3

1

2

3

4

5

6

7

8

9

10

11

12

¹Ibmar-imaklegega bela e-wachi nikad. We-napneggine, ibmar-imaklegega bela e-ibagan nikabalid:

²Gwaluleged-e-iba nikad, burgwileged-e-iba nikabalid. Ibmar-gwag-digleged-e-iba nikad, ibmar-gwag-ungeleged-e-iba nikabalid.

³Oburgwileged-e-iba nikad, onuguleged-e-iba nikabalid. Ibmar-earileged-e-iba nikad, ibmar-sobleged-e-iba nikabalid.

⁴Boleged-e-iba nikad, alleleged-e-iba nikabalid. Dule-burgwisadba wile-itoleged-e-iba nikad, yeer-itogedba gwirleged-e-iba nikabalid.

⁵Akwamar-osamakleged-e-iba nikad, akwamar-weleged-e-iba nikabalid. Angaagwar-imakleged-e-iba nikad, degimaloye-sogleged-e-iba nikabalid.

⁶Ibmar-imaklebienad-e-iba nikad, ibmar-imaklebisulid-e-iba nikabalid. Ibmar-saboleged-e-iba nikad, ibmar-mileged-e-iba nikabalid.

⁷Ibmar-esirmakleged-e-iba nikad, ibmar-makleged-e-iba nikabalid. Sunmaklesulid-e-iba nikad, sunmakleged-e-iba nikabalid.

⁸Sabguleged-e-iba nikad, isdar-dakleged-e-iba nikabalid. Bila-onoleged-e-iba nikad, neg-bogidik-naguleged-e-iba nikabalid.

⁹Ar dule arbaedgi alamaknaiguedi, ¿ibu-nued egi nikue?

¹⁰An daksad, Bab-Dummadi dulemarga arbaed-dummad uksad, adi, arbaedgi alamaknai gumalagar.

¹¹Bab-Dummad e-iba-sogedba bela ibmar-yeerdakle imaksad. Deginbali, dule nabir epenne-ibmar-gusmalad-magar-itogega, degi, yoedse-ibmar-guoed-magar-itogega imaksabalid. Degi-inigwele, dule, bela Bab-Dummad negasailagi-ibmar-imaksad, degi, yoedse-ibmar-imakoed wissulid.

¹²An wisdo, dule na dula-gudiidgine wergudiguedba, degi, ibmar-nued-imakdiguedba, bur ibmar-nued-baidi, sated.

¹³An wisbalid, nabir-masgundiguedi, nabir-gobdiguedi, degi, dummad-arbasadgi-yeer-itodiguedi, Bab-Dummad dulega uksabalid.

¹⁴Amba an wisbalid, bela-Bab-Dummad-ibmar-imaksadi, degisadegu gued. Na e-ibmar-obinnisadgi ibmar-baid geg nasikleged, geg bar osulolebalid. Bab-Dummad bela deyob imaksad, adi, dulemar e-dobekwaa nanamalagar.

¹⁵Emi ibmar-bukwadi, bato dikasurgus bukwad. Ibmar-gunonikoedi, bato gudiid. Bab-Dummad gannar-ibmar-guega imaked.

¹⁶We-napneggine ibmar-baid an daksabalid: Igar-itolegedgi, igar-isgana imakleged. Igar-innikigwad-imaklegedgi, igar-isgana imakleged.

¹⁷Geb an binsadsunnad: “Bab-Dummad dule-nuedga igar itogoye, degi, dule-isganaga igar itobaloye. Ar ade, bela-ibmar-guedga, igar-itoleged-iba nikaye. Bela-ibmar-imaklegedga igar-itoleged-iba nikabarye.”

¹⁸An dulemargi binsasbalid: “Bab-Dummad dule-wilubdaknaiye, adi, dulemar na magar itomalagarye, emarde, ibdurganyob gumarye.

¹⁹Dulemar ibdurganmaryob bergumarmogad. Ebobela ega igar yopira maid. Ebobela na yopira burgwemalad. Ebobela dulagudiguega bunnodigued abeged. Degisoggu, dule ibdurgangi obinsulid. Ar napiragwa, bela wemar gwen nabirsulid,

²⁰degi, bela napa-urba megmaloed. Bela napagi danimalad, bela gannar napaga binyemarbaloed.

²¹”¿Ar doa wissunna, dule-e-burba niba naddae? ¿Ar doa wissunna, ibdurgan-e-burbadi neg-urba aideddae?”

²²An daksasunnad, dule, e-arbaedgi-wergudiguedba bur ibmar-nued-imaked sated. Ade, arbaed-igar ega uklesad. E-burgwisad-sorba ibmar-guoed-dakega, ¿doa we-dule-burgwisad gannar-dagega imakoe?