Ecclesiastes 3

1

2

3

9

11

12

¹Waday naitoding ay timpo para sin amin ay maam-amag isnan labaw di daga.

²Waday timpo ay kaianakan ya kateyan, panmolaan ya pan-gabotan.

³Wada abey timpo ay panpesean ya pan-agasan, panadaelan ya pangisaadan.

⁴Wada pay di timpo ay pan-ogaan ya pansiyekan, panladingitan ya pansalaan begew si ragsak.

⁵Waday pantopogan si bato ya pangiwalangan, timpo ay pankawean ya adi pankawean.

⁶Waday timpo ay pan-anapan ya timpo ay somaldengan ay man-anap. Waday pan-idolinan ya pan-iwasitan.

⁷Waday timpo ay panbisngitan si bado ya timpo ay pandaitan. Waday pankalian ya timpo ay gominkan.

⁸Waday timpo ay pangipailaan si layad ya pangipailaan abe si liget. Waday timpon di gobat ya timpon di talna.

⁹Sino ngin di gon-oden di ipogaw sin amin ay obla na?

¹⁰Inan-anap ko sin nemnem ko din maipanggep sin nadagsen ay ipaoblan Diyos si ipogaw.

¹¹Inkeddeng baw Diyos di amin ay mapasamak sin kosto ay timpo da. Ngem olay mo waday inigto na sin nemnem tako maipanggep si timpo ay eng-enggana, adi tako pay dedan maawatan din oblan Diyos manipod sin logi na engganas gedeng na.

¹²Isonga kanak en iwed di maymayat si amagen di ipogaw mo adi et manragsak ya ganasena di biyag na.

¹³Mangan ya man-inom tako koma ya ganasen tako din amin ay bongan di boway tako, tan regalon Diyos dana.