1Duen te iketelu he tuig te kedhadì ni Belshazar, duen en maan nelewasan ku.
2Dutun te kebpekelawas ku neehè ku he edhitindeg a ziyà te kilid te Wahig he Ulai he ziyà te miberengbeng he inged he iyan is Susa he ziyà te prubinsya he Elam.
3Ne zutun duen neehè ku he meemahan he kerehidu he edhithitindeg diyà te veyvey zutun te wahig. Duen din dezuwa he sungey he memelayat. Piru hein netegteǥaad nekedtimpa haazà su mid-iseg mebmelayat is sevaha.
4Neehè ku he ebpemenungey haazà is kerehidu ziyà te minsan hendei he lugar. Ne wazà duma he langgam he ebpekepeengked kandin. Ne wazà ebpekelikey kandin. Umbe ebeelan din en ke hengkey is egkesuatan din te ebaal ne nehimu haazà he mekeǥeǥehem.
5Ne zutun te kedtengtengi ku kayi ne netekewtekew a te zuen nekeuma he kambing he ebpuun diyà te edsenlepan. Midhipanew zin is kelibutan he kenà ebpeketanà is menge paa zin diyà te tanà tenged te keǥaan din. Duen nekeviza he sungey zin su ziyà te pid-elangan te menge mata zin.
6Ne mibeyaan din sikan is meemahan he kerehidu he edhithitindeg diyà te veyvey zuen te wahig, he zuen din dezuwa he sungey, ne migamit din is taman te egkehimu zin te kedtebeka zin kayi.
7Tenged te utew zin kegkepauk, wazè din engkezi te edtebek haazà is kerehidu taman te nengerupù sikan is dezuwa he sungey zin. Ne zutun kenè en ebpekesukul haazà is kerehidu. Nepiley haazà ne midtekutakan duen te kambing. Ne wazà neketavang kandin.
8Ne mid-iseg pa is kegkemekeǥeǥehem duen te kambing. Ne hein utew en sikandin mekeǥeǥehem, nerupù sikan is sungey zin. Piru midtuvuan haazà is nerupuan te heepat he nekeviza he menge sungey he ebpeketezù diyà te nekedseselekawà he vahin te kelibutan.
9Is sevaha zuen te heepat he sungey, midsubpang te zeisey he sungey. Heini he sungey nehimu he mekeǥeǥehem diyà te zivavà, wey ziyà te edsilaan, wey minsan diyà te mekempet he tanè he Israel.
10Minsan diyà te langit nekeuma is kegkemekeǥeǥehem din ne mibpen-ulug din is duma he menge linimbag diyà te langit wey is menge vituen, ne midtekutakan din heini.
11Mid-isip din he lavew sikandin he mekeǥeǥehem te Pengulu te menge linimbag diyà te langit. Impeengked din is andew-andew he kebpemuhat diyà te valey te Megbevayà, ne midèdeetan din is baley te Megbevayà.
12Minsan pa te iyan heini kerepasan din, intuǥut he mezizalem te gehem din is menge linimbag diyà te langit wey is andew-andew he kebpemuhat. Bali wazà diyà te kandin is tutuu, ne mibmelempusen sikandin diyà te menge vaal zin.
13Ne zutun nezineg ku is dezuwa he velinsuǥuen he ebpelelaǥà. Mid-insaan te sevaha he velinsuǥuen haazà is duma zin te, “Sengemenu keluǥayad is kegkeul-ulaha zuen te impelewasan he iyan: is kebpeengkezi te andew-andew he kebpemuhat, is kebeǥaya zuen te valey te Megbevayà, wey is kedtekutaki te menge linimbag diyà te langit?”
14Ne midtavak kandin haazà is sevaha he velinsuǥuen te, “Egkeulaula heini seled te 2,300 he meselem wey mahapun ne emun egkeipus, edlumpiyuwan sikan is baley te Nengazen.”
15Ne zutun te kedtengtengi ku zuen te mibpelewasan kedì wey ked-isip-isip ku ke hengkey is kehuluǥan din, netekewtekew a te zuen midhitindeg diyà te etuvangan ku he henduen be te etew.
16Ne nekezineg a te laǥeng te etew he ebpuun te Wahig he Ulai he edhenduen te, “Gabriel, iseysey nu ziyà te kandin is kehuluǥan duen te nelewasan din.”
17Ne hein mid-uvey kayi te kedì si Gabriel, midluhud a tenged te kegkahandek ku. Piru migkaǥi sikandin te, “Sikew is etew, kinahanglan he egkesavut nu sikan is nelewasan nu, he mehitenged te huziyan he timpu.”
18Ne zutun te kebpekidlalag din kedì, neewaan a te tanud is edlangkeb diyà te tanà. Piru migewezan e zin wey impeenew.
19Ke sikandin te, “Egkeǥiyan ku sikew ke hengkey is egkehitavù te huziyan he timpu emun edsilut en is Megbevayà tenged te pauk din. Iyan ibpaalung te neehè nu, is egkehitavù te huziyan he timpu.
20Sikan is kerehidu he zezuwa is sungey zin, ne iyan ibpaalung dutun is menge ginhedian te Media wey Persia.
21Sikan is kambing, iyan ibpaalung dutun is ginhedian te Grecia, ne sikan is dekelà he sungey ziyà te pid-elangan te menge mata zin, ebpaalung te nehuna he hadì.
22Sikan is heepat he sungey he midlepew hein nerupù sikan is nehuna he sungey, ebpaalung te heepat he ginhedian te Grecia he egkevahinbahin. Piru is menge hadì dan, kenà ebpekeiring is kegkemekeǥeǥehem dan duen te nehuna kandan he hadì hein wazè pa mevahin haazà he ginhedian.
23“Diyà te huziyan he menge andew te kedhadì kayi he menge hadì, dutun te timpu he utew en dekelà is salè dan, ne edhadì is sevaha he mesipala wey limbungan he hadì.
24Egkehimu sikandin he mekeǥeǥehem, piru kenà ebpekerepeng te kegkemekeǥeǥehem duen te hadì he nehuna kandin hein wazè pa mevahin haazà he ginhedian. Egkeinuinu is menge etew te edhimuwen din he kebpendezaat, ne melempusen sikandin diyà te minsan hengkey he ebeelan din. Edèdeetan din is mekeǥeǥehem he menge etew wey is pinilì he menge etew te Megbevayà.
25Tenged te ebilidad din egkehimu sikandin he melempusen te kebpenlimbung din. Ebpegalbu sikandin, ne mahabet he menge etew is ebpenhimetayan din he kenè din en ebpetizeenan. Edsukulan din minsan is Pengulu te menge pengulu. Piru ziyà te huziyan he timpu edezeetan sikandin, kenà pinaaǥi te ǥehem te etew, kekenà, pinaaǥi te gehem te Megbevayà.
26“Daniel, tutuu is migkaǥi ku kenikew he mehitenged te kebpeengkezi te meselem wey mahapun he kebpemuhat. Piru kenè nu en dèpa tudtula heini su egkeuǥet pa egkehitavù.”
27Ne kegkepasad kayi, siak si Daniel, midluyahan a wey nezeruwan a te nepipira he andew. Ne kegkeulii kedì, midlikuan ku te edterebahu is insarig kedì te hadì. Piru kemulu a egkeliveǥi zuen te nelewasan ku. Mereǥen heini he edsevutan.
