Buka Linge 141:1-10

¹Nina linge David. Lord, Inau tu hologho, mu mina kurutigho, ge ko varongohiu mai, u kene ngangata nimua na hahanga.

²Ko holopangotia nigua na kokoeliulivuti te vagha na ghaiuruuru, tu nia sukaghi vanigho, na limagu te talu datoa te vagha na mane sukaghi tana nulavi.

³Ko taghaoi na bosagu Ghe Lord, mo ko kaputighi na ghidugu.

⁴Ko bei lubatiu gea, ge ku ghanaghanai na lei totobo dika, puku paipabira kolu tana lei gehegehe te mua uto, puku haidu kolu itadira te malumu vanira na lutu hahi.

⁵Lubatira nina vure God, ge kara lioliogha, na pukuna na righitaoni papabe, ke vagha kara rutu vaniu ke, mo ko bosa togholuvura, na pukuna na kikinima na kiukisuna. ko bei lubatiu ge ku nighi hughu. Inau tu mua mautu na kokoeliulivutiani didira na gehegehe mana nilabudira te dika.

⁶Kara nia rabo horu vaho tua tana vatu, didira na lei mane nagho, vaho ge kara rongovighi vakodoi na bosagu, ma kara sodoa ga na togotogo.

⁷Te vagha na tinoni puku leghai, te maghuraa na pari, ge soni tatei na vatuvatu, ke vagha ghua keri, na hulidira na lei tinoni dika, kara havukaghi tana matani na lei gilu, tara mua kuku ni tavughiadira.

⁸Inau tu kenea itamua na hahanga, ghe Lord, Ighoe a nigua na puipungisi na tako ni rerebe, Ko bei lubatira ge kara taghalaghinia na volagu.

⁹Ko volau ta didira na taripiti, mi tana talu dilai vaniu, gaira tara gehegehe dika.

¹⁰Lubatira tara lutu dika, ge kara tumu haghe lokana didira na vugho heghedira, Mo ko lubatiu inau ge ku ghogho keha.