SALMOS 141:1-10

¹X̱ana' Dios, žḻiža' Le'. Da ka' gaze gákḻeno' neda'. Benle chi'a kate' wḻiža' Le'.

²Ben ga kwen da' ẕnnabla' ḻawo' Le' ka to žen ẕix̱. Wẕí' da' ẕchisa' ḻawo' Le' ka to biado' žota'-ba' ḻawo' Le'.

³X̱ana' Dios, wdape chi'i žoa'a nich bi nnia' to da' bi nak chawe'.

⁴Bi go'o latje se ḻaža'a gona' to da' ẕinnj nich bi gona' to da' bi nak chawe', na' nich bi gáwḻena' benne' wen da' ẕinnj ka' tẕen che lni chégake'.

⁵Cha' to benne' chawe' wsake'e neda', gaken chia' to da' chawe', na' cha' tiḻe' neda', gaken chia' ka to da' ẕlaḻe'e ẕix̱ dan' ẕgo'e yichja', na' nnábtezla' Dios gon chawe'e ḻe'.

⁶Kate' bíx̱jegak benne' blo ka' chegak benne' wen da' ẕinnj ka' ḻe'e ya'a yej ka', na' gákbe'egekle benách ka' nak chawe' da' ẕnnia'.

⁷Gáslasgak žit chegak benne' ka' žoa'a yežw ba chégake'. Gá'ngaken ka bcheko yo ka' gan ža'n beže.

⁸Che ḻen ẕwia' gan zo' Le', X̱ana' Dios. Žx̱en ḻaža'a Le'. Bi kwej yichjo' neda'.

⁹Bwia neda' nich bi sen do yeḻj chegak benne' wen da' ẕinnj ka' neda', na' nich bi chejchaza' ḻo da' wlékgake'.

¹⁰Ben ga chejchazgak benne' wen da' ẕinnj ka' ḻo do yeḻj da' wlékgake', x̱ak tia' neda' ga na' dot cháwe'do'.