Atos 2:8-38

⁸Karireapõkõ amarokõ repe. Yrome yna omiry waro amarokomo!

⁹Taro ynanase, Paratiapõkomo, Metiapõkomo, Erãopõkomo, Mesopotamiapõkomo, Juteapõkomo, Kapatoxiapõkomo, Põtupõkomo, Aziapõkomo,

¹⁰Piritiapõkomo, Pãpiriapõkomo, Ejitupõkomo, Xirenepõkomo (Ripiapõ Xirene), Romapõkomo,

¹¹Arapiapõkomo, enara. Toitoine Kereta poe aehtyã ynanase. Imehnõ Arapia poe aehtyã roropa ynanase. Toitoine juteu tõ ynanase. Toitoine juteu poenopuhpõkõ ynanase. Moxiaro etãko ynanase yna omiryae toto exiryke. Morararo nase moxiamo tõmirykõme exiryke etãko toto Ritonõpo kypyno xine exiry poko, tykase toto.

¹²Moroto toh kynexine tõsenuruhkarykõ poko. Toepohnohse toto. —Oty moro? tykase toh tõturupose.

¹³Yrome imehnomo a tounohse toto, —Moxiã aetỹtyã rokene, tykase toto. Toetỹse tokarose toto a.

¹⁴Morarame Peturu tooehse 11mãkõ maro. Opore tõturuse imoihmãkomo a, —Etatoko pahne Juteapõkomo, Jerusarẽpõkõ roropa.

¹⁵Oty katohme, “Toetỹse,” ãko matou yna poko? Etỹtoh zano pyra nase. Xixi onuhpyra ro nase. Etỹpyra ynanase.

¹⁶Yrome pake Ritonõpo nymeropohpyry Joeu a sero poko. Ynara tykase,

¹⁷“Nono atakurohkary moe pyra ahtao ynara tyrĩko ase, ãko Ritonõpo. Juzenu ekarõko ase oya xine. Morarame omũkuru tõ oẽxiry tõ roropa jomiry ekarõko mana. Nuasemãkomo a osenepõko ase. Tãhpomãkomo a oturũko ase aosenety xine.

¹⁸Ỹ, ypoetory pona emero Juzenu aropõko ase, orutua kõ pona, nohpo tõ pona roropa.

¹⁹Morarame jomiry ekarõko toh mã rahkene. Tyoro sã tyrĩko ywy kapu ao, nono po roropa, õsenuruhkatohkõme, munu te, apoto te, orexĩto konõto.

²⁰Xixi zarumãkapõko ase. Nuno kamirarame exĩko mana munu samo. Morarame okynã pyra ynymenekahpyry oehnõko ropa mana, tuisamehxo, ẽmepyry kure moroto ahtao.

²¹Morarame ‘Tuisa oenupunako ypoko,’ karyhtao oya xine ynymenekahpyry a, enupunãko mã rahkẽ opoko xine, tykase Ritonõpo,” me tymerose Joeu a Ritonõpo omi poe.

²²—Etatoko pahne orutua komo, juteu tomo. Jarao nexiase Jezu Nazarepono. Ritonõpo zamaro ynororo kynexine. Morara exiryke tyjamihtanohpose eya kurãkõkara kurãkatohme ropa eya. Zuaro ro matohu?

²³Pake Ritonõpo zuaro kynexine, Jezu exixihmapotoh waro. Toxixihmapose oya xine, zehnotokomo a. Moro waro Ritonõpo kynexine Jezu orihpyra ro ahtao. Yrome, “Ah nexixihmã toto,” tykase Ritonõpo.

²⁴Mame tõsemãkapose ropa ynororo Ritonõpo a. Jũme orihpynỹpo sã toehse ropa ynororo typoremãkapory se pyra toexiryke toorihtopõpyry a.

²⁵Ynara tymerose kytamurukomo a, Tawi a, Jezu omiryme, Ritonõpo omi poe, “Papa, kokoro rokẽ oenẽko ase ymaro. Torẽtyke pyra ase, yjamihtanohneme oexiryke.

²⁶Tãkye ase opoko. Kure mase Papa. Oeahmãko ase ypyno oexiryke. Torẽtyke pyra ase, jorikyryhtao ro urumekara oexiryke.

²⁷Toorihse jahtao jekepyry onymotanohpopyra mase omũkuru nymyryme jexiryke.

²⁸Jẽsemãkapõko ropa mase, orihpỹme jehtohme. Tãkye rokẽ jyripõko mase oẽmyty eneryke ya,” me tymerose Tawi a Jezu omiryme.

²⁹—Wekyry tomo, topohme oturuxi amaro xine. Pake kytamurukõ Tawi toorihse. Ekepyry tonẽse. Ekepyry esary mõto mana seroae ro.

³⁰Yrome Tawi urutõme kynexine Ritonõpo zuzenu omi poe. Zuaro ynororo Ritonõpo omi poe, Kyrixtu typaryme exiry waro. Tuisa konõtome Kyrixtu exiry poko tuaro roropa, tymyakãme aexiry waro.

³¹Ritonõpo omiry waro Tawi kynexine. Jezu ẽsemamyry ropa waro roropa kynexine. Morara exiryke morara tykase ynororo, “Zuzenu onynomopyra Ritonõpo mana aorihtyã esao. Ekepyry motara roropa mana,” tykase ynororo.

³²Tõsemãkapose ropa Jezu Ritonõpo a. Ynanenease. Morara exiryke ourutorỹko ynanase.

³³Seromaroro Jezu tuisamehxo tyrise Ritonõpo a. Ritonõpo maro mana. Pake Ritonõpo tõturuse eya, “Juzenu ekarõko ase oya,” tykase Ritonõpo. Mame Tuzenu tokarose Jezu a rahkene. Morara exiryke senohne enẽko matose. Õmirykõae Ritonõpo omiry etãko matose.

³⁴Kapu aka onuhpyra Tawi ekepyry kynexine. Jezu rokẽ tõnuhse. Ynara tymerose roropa Tawi a, “Ritonõpo tõturuse Kuesẽkomo a, ‘Oporohko seino, japotunuru wino, tuisame oexiryke,

³⁵oepetõkara ke anamotomatohto ya,’ tykase Ritonõpo Tumũkuru a.” Morara tymerose Tawi a pake.

³⁶Izyraeu tomo, tuaro ehtoko. Jezu mokyro onexixihmahpyrykomo. Tuisame tyrise ynororo Ritonõpo a Kuesẽkõme aehtohme, tykase Peturu eya xine.

³⁷Morarame toemynyhmase toto Peturu omiry etaryke tyya xine, —Morara ahtao oty rĩko ynanah? tykase toto Peturu tomo a, tõturupose.

³⁸Peturu a tozuhse toto, —Oorypyrykõ irumekatoko Jezu omipona oehtohkõme. Osẽpurihkapotoko Jezu Kyrixtu omi poe, oorypyrykõ korokatohme Ritonõpo a. Mame Ritonõpo nekarory apoĩko matose. Zuzenu kurã apoĩko matose.