Acts 2:8-38

⁸Nthakenh rernem angka ingwerek-ingwer angkerreyel? Anantherr renh-rnem aweyel, rernemarl angka anwekantherr-apenyarl angkeyel.

⁹Ingwer-rnem Parthia-areny-arl, Media-areny-arl, Elam-areny-arl, Mesopotamia-arenyarl, Judea-arenyarl, Cappadocia-arenyarl, Pontus-arenyarl, Asia-arenyarl,

¹⁰Phrygia-arenyarl, Pamphylia-arenyarl, Egypt-arenyarl, Libya-arenyarl, Cyrene tawen-they arrer, ingwer-rnem apmer Rome-they apetyek.

¹¹Ingwer-rnem Jew lyerteny-rneman, ingwer-rnem Jew akely-penh-rnem, Crete-areny, Arabia-areny. Rernem angkerreyel, ‘Akngey rlterrk inngan.’”

¹²Rernem ywarn iterrek. Ingwer-rnem angkerrenh, “Ilek-arrpantey nhenhan?”

¹³Ingwer-rnemel renh-rnem arrkernelhilenh, terangk rernem angkerrerl-anenty-arrpantey.

¹⁴Peter ra kwertengerl 11-pel-itwek rtnenh. Ra aketh innga renh-rnem ilek, “Atyenh-rnem, arrantherr ingkerrenh Jerusalem-areny atyeng mwantyel awelhenherr-arey, atharl arrekantherr ilem.

¹⁵Arrantherr apmwel-areth iterreyel terangk-rnem-arrpantey ilerl-anemel. Nhenhan ingwepenh arwarl, nthakenh terangk irrey-angenh ingwepenhan.

¹⁶Akngey-kenh angkakert Joel ra awank-akerr anenh.

¹⁷Akngey angkek ikwer-angkwarr: ‘Arlta ingkern ikwerel atha ingkerrenh-anem Itnweng atyenh antheyenh ingkerrenhekek. Ikwer-penh awey arrekantherrel-rnem kwey arrekatherrel-rnem angka atyenh ileyenh. Ayeng artwa akely-rnem arrekantherrenh-warl aremirreyenh, artwa ampwernem-warl-then, rernem altyerr areyenh.

¹⁸Atha artwa warrkenh-rnem-then arelh warrkenh-rnem-then Itnweng atyenh anthem. Angka atyenh ingwer-rnem-warl rernem ileyenh.

¹⁹Athanem ingwerek-ingwer lwewarrerneyek alker-itwek-then, ahern-itwek-then. Rernem rwa lherrm areyenh, kwert-then, arrkngethen.

²⁰Ingkeny ra ingwemernt irreyenh, alkent ra rnter-rnter irreyenh, arrkngapeny. Ikwer-penh Ingkart ra apey-alpeyenh rlterrk ilkwakert.

²¹Arlta ingkern ikwerel, Ingkartel renh-rnem arntarnt-areyenh, rernemarl renh ayernenty, ra renh-rnem arntarnt-aretyek.’ Alakenh-anyem Joel-kenh pip-itwek aynteyel.

²²Artwa Israel-kenh-rnem, arrantherr atyeng awelhenherr-arey, atharl arrenhantherr ilem, Jesus Nazareth-areny ikwer. Akngey rantey Jesus ikwer inkwerelhek, renh rlterrkilemel, ilek-ilek-angkwarr ra mpwarayntetyek. Kel arrantherr arek rarl ilek-ilek mpwarek.

²³Akngey ra arrwekel-antey iterrek, Jesus arrekantherr-warl thwenetyek, ingkerrenhek katy ilwetyek. Ra arrekantherr-warl kel thwenek. Arrantherr artwa apmwernem-warl-then artwa ahelengkw-rnem-warl ahayiwek, rernem renh ipmek atwetyek, rernem renh arwerl iylpeyl-atherrek atanthek.

²⁴Akngeyel renh angkep arrpemarl itethilek, rlterrk ikwerenh-akertel. Arrewaly-rnem awenng-itwek aynteyel. Rernem ywarn-antey ament akemirreyenh. Jesus ra awenngel ayntenh arrpemarl. Akngeyel renh akemelhilek, rlterrk ikwerenh-akertel.

²⁵Atyetyart David-el ingkwernek pip-warl arrwekel-antey Jesus-arl aremirreyenh. Ra alakenh-anyem ingkwernek: ‘Ingkart ra atyeng-itwek arrer aneyel. Artwa ingwer-rnem ywarn atyeng arrkernelheyenh, ayenh ilpertiletyek.

²⁶Ayeng irrkngerney-anem aneyel, Akngeyekant-anem ayeng inkwerelhemel. Ayeng alhewer-anem anayntem, rarl ayenh arntarnt-areyel.

²⁷Ingkartel ayenh iwerl-alhey-angenh awenng-itwek. Ra ayenh arntarnt-areyenh, awenng-itwek, ayenh iwerl-alhey-angenh, ngarl atyeng ilkelheyel.

²⁸Ra ayenh akalty-anthek, arraty-angkwarr anetyek, ayeng aknganekarl iteth aneyenh. Ra ayenh irrkngerney anthek, atyeng-itwek intem-antey aneyenh.’”

²⁹Peter angkek arrpemarl, “Atyenh-rnem, angka David-kenh ayeng arraty angkeyel. Ra ilwek, rernem David renh awenng-warl akwernek. Aleyan awenng ikwerenh aynteyel-antey.

³⁰David ra Ingkart-kenh angkakert anenh. Ra iterl-arek, Akngeyelarl renh alhelek, artwa anyent ikwer-rnem arrernetyek, ra atyetyart ilkwa anetyek.

³¹David ra iterl-arek, Ingkartel angkep anyent impen akemelhileyenh. Ra ilek, Akngeyel renh awenng-itwel iwerl-alhey-angenh.

³²Akngeyel Jesus renh innga akemelhilek, arrewaly-penh itethilemel. Anwernantherr akalty, anwernantherr renh anngetherr aytaremel arek.

³³Jesus ranem alker-warl alpek, Akngey-itwek aney-alpek. Akngeyel Itnweng renh alhelek, renh anthetyek, Jesus ra Itnweng rlterrk anwenhantherr antheyel. Aleyan arrantherr areyel-anem, aweyel-anem, Itnweng renhey-antey.

³⁴David ra alker-warl alhey-angenh. Ra angka nhenh ingkwernek, ament ikwerenh-angkwarr-weny: ‘Ingkart angkek Ingkart atyenh-warl, “Atyeng-itwel ana!

³⁵Artwa apmwernem atha antengiletyek, rlterrk ilkwakertel, renh-rnem ywerrelhilemel, rernem ngkweng awelhetyek.” ’

³⁶Israel-kenh-rnem ingkerrenh, arrantherr nhenhek ingkerrenhel iterl-aretyek, Jesus irrkaty weth nhenhan arrantherr arwerl iylpeyl-atherrel atanthekarl. Akngeyel Christ arrernek, ra Ingkart arrekantherr ingkerrenhek anetyek.”

³⁷Angka rernem awek-penh, rernem ywarn iterremel-anem anenh. Peter-anem rernem ayernek, kwertengerl ingwer-rnem-then, “Nthakenh-angkwarr arrantherr irreman?”

³⁸Peter angkek, “Akngey-warl angkep irrenherr-arey, baptise inemel, itna Jesus-angkwarr, Akngeyelarl apmwa arrekantherrety iwem. Ikwer-penhan Itnweng Rlwart ra antelheyenh arrekantherr-warl, arrekantherr-itwek intem anetyek.