Hechos 2:8-38

⁸¿Chaꞌta kꞌu riꞌ chiqajujunal keqato kechꞌaꞌt pa taq ri qachꞌaꞌtem oj alaxinaq wi riꞌoj?

⁹Yey lik pa ukꞌiyal tinamit oj petinaq wi. Chiqaxoꞌl e kꞌo e aj Partia, e aj Media y e aj Elam. Yey e kꞌo ri ejeqel Mesopotamia, Judea, Capadocia, Ponto y Asia,

¹⁰Frigia y Panfilia, Egipto y pa taq ri luwar re Libia chwach pana ri tinamit Cirene. Yey e kꞌo ri e petinaq Roma; chikixoꞌl waꞌ e kꞌo e aj judiꞌabꞌ y e kꞌo ne ri na e ta aj judiꞌabꞌ kitaqem lo ri kꞌutunik ke raj judiꞌabꞌ.

¹¹E kꞌo e aj Creta y ri e aj Arabia. Yey chiqajujunal riꞌoj kaqato kechꞌaꞌt pa qachꞌaꞌtem puwi taq ri kꞌutubꞌal re runimal uchuqꞌabꞌ ri Dios» kechaꞌ.

¹²Konoje kꞌut lik kaminaq kanimaꞌ che y na kakiriq ta chik saꞌ ri kakichꞌobꞌ puwiꞌ, jekꞌuwaꞌ kakibꞌiꞌij chikiwach: «¿Saꞌ keꞌelawi waꞌ?» kechaꞌ.

¹³Yey e kꞌo kꞌu jujun chik kechꞌamin ke y jewaꞌ kakibꞌiꞌij: «Laꞌ keqꞌabꞌarik» kechaꞌ.

¹⁴Ekꞌuchiriꞌ, ri Pedro xtakꞌiꞌik junam kukꞌ ri junlaluj chik taqoꞌn y lik ko xchꞌawik, jewaꞌ xubꞌiꞌij: «Achijabꞌ alaq aj judiꞌabꞌ y onoje ri alaq jeqel wara Jerusalem, tape alaq chi utz ri kanqꞌalajisaj che alaq.

¹⁵Ma e chiwach ralaq, waꞌ waꞌchijabꞌ keqꞌabꞌarik, noꞌj ¡na e ta uꞌanom riꞌ! Ma kꞌa e ne bꞌelejebꞌ ora laꞌ che wa anim.

¹⁶Janipa wa kata alaq y kil alaq woꞌora, waꞌ e ri ubꞌiꞌim chi kan ri qꞌalajisanel Joel ojertan, echiriꞌ jewaꞌ xubꞌiꞌij:

¹⁷“Che taq rukꞌisbꞌal qꞌij” kubꞌiꞌij ri Dios, “kantaq bꞌi ri Wuxlabꞌixel pakiwi konoje ri tikawex che ruwachulew. E taq kꞌu ri miꞌal alkꞌoꞌal alaq kakiqꞌalajisaj ri Nutzij. Ralabꞌo kakilo janipa ri kankꞌut chikiwach; yey e ri nimaq winaq, pa wachikꞌ kakil wi janipa ri kanqꞌalajisaj chikiwach.

¹⁸Chupa taq kꞌu riꞌ laꞌ la qꞌij, pakiwi ri e waj chak ixoqibꞌ y achijabꞌ kantaq bꞌi ri Wuxlabꞌixel chaꞌ jelaꞌ kakiqꞌalajisaj ri Nutzij chikiwach ri tikawex.

¹⁹Chwa ri kaj kankꞌut taq kꞌutubꞌal re nuchuqꞌabꞌ yey waꞌ na jinta ilitajinaq wi y che ruwachulew kanꞌan kꞌutubꞌal rukꞌ kikꞌ, rukꞌ aqꞌ y rukꞌ mayul re sibꞌ.

²⁰Ekꞌu ri qꞌij kuꞌan qꞌequꞌm uwach yey ri ikꞌ kuꞌan kaq uwach pachaꞌ kikꞌ; waꞌ e kuꞌana echiriꞌ ya kopon ruqꞌijol ri Qanimajawal. Waꞌ wa jun qꞌij lik nim y na jinta kꞌo kajunimax wi ruchomalil.

²¹Y konoje kꞌu ri kakikoj kibꞌ chwach ri Qanimajawal re kebꞌukolobꞌej, riꞌ kekolobꞌetajik” xchaꞌ.

²²»Achijabꞌ alaq aj Israel, tape alaq janipa wa kambꞌiꞌij che alaq woꞌora: Ri Jesús ri aj Nazaret, Rire e ri Jun taqom lo chixoꞌl alaq ruma ri Dios. Lik etaꞌam kꞌu alaq ri xuꞌan ri Dios ruma ri Jesús chixoꞌl alaq, waꞌ e ukꞌiyal milagros y taq kꞌutubꞌal re ri unimal uchuqꞌabꞌ ri Dios.

²³Yey ri Dios lik uchꞌobꞌom chi uloq y retaꞌam suꞌchak xuya ri Jesús paqꞌabꞌ alaq. Ekꞌu ralaq xchap bꞌi alaq y xtaq alaq ukamisaxik chwa cruz kuma winaq na jinta Rutzij Upixabꞌ ri Dios kukꞌ.

²⁴Pero ri Dios xukꞌastajisaj loq y xresaj chupa rukꞌaxkꞌolil ri kamik, ma ri kamik na jinta uchuqꞌabꞌ puwi Rire y ruma riꞌ, Rire na xkꞌojiꞌ ta puqꞌabꞌ ri kamik.

²⁵»Rojertan xubꞌiꞌij kan ri rey David puwi ri Cristo: Riꞌin kanwil ri Wajawal xaqi e laꞌ kꞌo chinuwach. Ruma kꞌu kꞌo Rire pa nuwikiqꞌabꞌ, na jinta kꞌana kayuchꞌuyuꞌn weꞌin.

²⁶E uwariꞌche ri wanimaꞌ lik xkiꞌkotik y ruchiꞌ nuqul xbꞌixon rukꞌ kiꞌkotemal. Ekꞌu riꞌin, tobꞌ ne wetaꞌam kinkamik, e laꞌ kꞌo chi ri nukubꞌam pan nukꞌuꞌx che;

²⁷ma Rilal na kinya ta kan la chikixoꞌl ri ekaminaq, yey na kaya tane la luwar kaqꞌay rucuerpo ri aj chak la, ri jun lik uyaꞌom ribꞌ paqꞌabꞌ la.

²⁸Rilal xkꞌut la chinuwach ri bꞌe re kꞌaslemal. Ruma kꞌu xaqi Lal kꞌo la wukꞌ riꞌin, kanojisaj la ri wanimaꞌ che kiꞌkotemal xchaꞌ.

²⁹»Hermanos, paqatzij wi lik usukꞌ kankuxtaj waꞌ che alaq: Ri rey David ojertan, xkamik y xmuqik, y kꞌa qꞌalaj ne chiqawach riꞌoj waqꞌij ora pa kꞌo wi rumuqubꞌal.

³⁰Yey ri rey David e jun qꞌalajisanel; xretaꞌmaj kꞌu riꞌ ri Dios rukꞌ jun tzij xujikibꞌaꞌ uwach che rire: “Chikixoꞌl taq ri awalkꞌoꞌal, kayaktaj lo ri Cristo chaꞌ kuꞌan Rey y katzꞌuyiꞌ pakꞌaxel riꞌat.”

³¹»Yey ri rey David xchꞌaꞌtik e pachaꞌ rilom chi rukꞌastajibꞌal ri Cristo echiriꞌ xubꞌiꞌij: “Na kakanaj ta kan Rire chikixoꞌl ri ekaminaq y na kaqꞌay tane rucuerpo.”

³²Ekꞌu waꞌ wa Jesús ri xukꞌastajisaj ri Dios che ri kamik; yey waꞌ lik qatzij, ma qonoje riꞌoj xqilo.

³³Lik kꞌu xyak uqꞌij echiriꞌ xtzꞌuyiꞌ puwikiqꞌabꞌ ri Dios. Yey xyaꞌtaj che Rire kutaq lo paqawi riꞌoj ri Santowilaj Ruxlabꞌixel, ri ubꞌiꞌtisim lo ri Qaqaw Dios chiqe riꞌoj. Y ekꞌu riꞌ waꞌ ri kil alaq y kata alaq.

³⁴»Ma na e ta ri David ri xaqꞌan chilaꞌ chikaj, pero e rire ri xubꞌiꞌij: Ri Dios Qajawxel xubꞌiꞌij che ri Wajawal: “Chat-tzꞌula pa nuwikiqꞌabꞌ,

³⁵y chawoyeꞌej na ri qꞌij echiriꞌ kebꞌenuya ri tzel kebꞌilow awe chuxeꞌ rawaqan” xchaꞌ.

³⁶»Tape alaq onoje ri alaq aj Israel, ma lik chirajawaxik ketaꞌmaj kꞌu alaq: Wa Jesús ri xkamisaj alaq chwa cruz, e chaꞌtal lo ruma ri Dios re kuꞌan Qajawal y Kolobꞌenel» xcha ri Pedro chike.

³⁷Ekꞌuchiriꞌ xkita waꞌ, lik xok bꞌis chikikꞌuꞌx y jewaꞌ xkibꞌiꞌij che ri Pedro y chike ri jujun chik e taqoꞌn: —Hermanos, ¿saꞌ kꞌu riꞌ kaqaꞌan riꞌoj? —xechaꞌ.

³⁸Y ri Pedro xubꞌiꞌij chike: —Tzelej tzij alaq chwach ri Dios y chijujunal alaq kꞌulu alaq pa rubꞌiꞌ ri Qanimajawal Jesucristo ri bautismo re kuybꞌal mak alaq y jelaꞌ kakꞌul na kꞌu alaq ri Santowilaj Uxlabꞌixel, waꞌ e sipanik re ri Dios che alaq.