Hechos 2:8-38

⁸Zeꞌ ¿lac guc nu rac rnii dey de riidz guledz tub ga la den?

⁹Gun ii yuꞌ mbecy nu bruu zañ lugaar. Yuꞌ mbecy nu bruu Partia, yu nu bruu Media, yu nu bruu Elam, yu nu bruu Mesopotamia, yu nu bruu Judea, yu nu bruu Capadocia, yu nu bruu Ponto, yu nu bruu Asia,

¹⁰yu nu bruu Frigia, yu nu bruu Panfilia, yu nu bruu Egipto, yu nu bruu de lugaar ni Libia nu yuꞌ par lo Cirene. Dela zeꞌ bruu de mbecy nu yuꞌ ii. Nunu gazaꞌ de mbecy nu bruu Rom nu rcyiiñ laab ii. Yuꞌ de yu nu nac mbecy Israeel nese nu gul laa dey, nunu yuꞌ gaꞌ de yu nu byac mbecy Israeel.

¹¹Nunu gazaꞌ mbecy nu bruu Creta, mbecy nu bruu Arabia. ¡Dela zeꞌ bruu tub nac ga den, tees dela den reñ na coz ily ni Ñgyoozh nu riidz na! ―na dey.

¹²Dela mbecy bdzoꞌw laa dey, nunu guton la dey yuꞌy. Se nu rgugyiꞌ ziꞌl dey lo losaꞌy yuꞌy: ―Zeꞌ ¿lac yaruu de nu nii? ―rnii dey.

¹³Tees yuꞌ gaꞌ mbecy canu rgubdzaa dey. Orzeꞌ nay: ―¡Ni ricy dey gun rzugy yu! ―na dey.

¹⁴Orzeꞌ wes su Bed nu deꞌ zir de trotub aposht gazeꞌ nu brugyiꞌ ye la rniiy. Orzeꞌ nay: ―De ru mbecy Israeel, gal nu dela de ru mbecy nu yuꞌ gyedz Jerusaleeng, rlagy ñi gad lagy der de coz nu rac ii, nunu nap bzuub gyidag der de coz nu ne̱e̱.

¹⁵De mbecy ii walab nu rzugy dey gal nu rnii too de ru. Gyiib gaa zi or napor yuꞌn na. Walab i or gzugy mbecy.

¹⁶Sinu na ricy yac ñi coz nu pcaa Joeel, yu nu mnii por cuen ni Ñgyoozh. Ñgyoozh nam:

¹⁷Ornu bi yad lazh tiem, ya̱ rica̱ Espiriit ne̱ ni de lo la mbecy. Orzeꞌ dela de yu nguzh ni dey, gal nu dela de fiñ nguzh ni dey, gnii dey por cuen ne̱. De yu feñ gyicya̱ nu deꞌ lo dey de coz nu gac. Nunu de yu bel lat pcaal dey rica̱ nu gad lagy yu de coz nu gac.

¹⁸Laab tiem zeꞌ rica̱ Espiriit Yon ne̱ ni yu nu ricy coz nu rne̱e̱, nunu rica̱ꞌm ni de biñ mñaa nu ricy de coz nu rne̱e̱. Orzeꞌ gnii dey por cuen ne̱.

¹⁹Ya̱ gyicya̱ zañ coz ily baa. Zeꞌ lo yu gyicya̱ coz par nu gad lagy mbecy la tiem. Shu reñ; grib gyi; nunu grib dzeeñ nan.

²⁰Gyet cow lo doo. Zeꞌ lo beey gyet ña gal na reñ. Dela ndeꞌ gac ñii anzir nu shuub dzi nu bi pcui̱ par nu gyicy ya̱ gyel fushtiz ne̱. Dzi zeꞌ tonaꞌ la dzi ily. Nunu dzi zeꞌ tonaꞌ la cyit gac.

²¹Nunu dela mbecy nu nish baa lo̱ nu gloo mbaña̱ dey, de yu zeꞌ gruu mbañ yu, nam. Ni pcaa Joeel gulas.

²²’De ru mbecy Israeel, bzuub gyidag der de coz nu ne̱e̱ na. Ñgyoozh naal la briic mi nu gad lagy der nu Jesuuz, biñ nu pcyiiñ Nazaret, bduꞌ gyim riiñ ni Ñgyoozh nu nac de coz ily nu bicy mi lat de ru. Ñgyoozh bicy mi nu bicy Jesuuz zañ coz ily. Bicy mi nusuriidz. Bicy mi zañ coz par nu gad lagy der cyu nac mi.

²³Tees Ñgyoozh nil nese gulas bi mne̱ꞌ ic mi, coz nu gyicy mi. Nunu bi gud lagy mi nu gyet lag mi yaa der. Orzeꞌ de ru gua nu der mi pres. Gazeꞌ nu bicy der nu de mbecy nu wagyicy yac de leey ni Ñgyoozh biit dey mi lo cruuz.

²⁴Tees Ñgyoozh bicy mi nu byabañ mi. Bloom mi lat de mbecy gut, gun zeꞌ nu yuꞌ mbecy gut wac soow ñi lom.

²⁵Gun Dabi laab mi bzat yu ornu pcaay: Ya̱ rad lagya̱ nu zaab zu gala Ñgyoozh lo̱. Zub mi par yaa be̱e̱, gun orzeꞌ mas lac ruꞌ wagyicy deet mbecy nuy ya̱.

²⁶Ndeꞌ nu tonaꞌ la gusu cyit lagya̱, nunu mne̱e̱ riidz nu rnii mbecy nu zu cyit lagy. Nunu drish lo̱ lo Ñgyoozh nu nac cuerp ne̱.

²⁷Gun ru wazaan ru nu gyiyeeñ lardo̱o̱ lat de mbecy gut. Ni wazaan ru nu gadz cuerp ni mbecy yon nir.

²⁸Ru mniir lo̱ mod nu gyicya̱ par nu cui mbaña̱. Ya̱ tonaꞌ la chesu cyit lagya̱, gun nac nur ya̱, pcaa Dabi.

²⁹’Der bicy na, naal la za de riidz ii. Gyitoo bel ni den Dabi gut yu. Orzeꞌ pcach dey yu. Nunu baa niy rzac den ñi mas gal dzi na.

³⁰Tees Dabi guc yu tub mbecy nu mnii por cuen ni Ñgyoozh. Gud lagy yu nu Ñgyoozh mniim nu waded la nu lat ca na tub nez yu, ruu biñ nu pcuim nu gac Shuaan den gal nu ub yu guc yu rey nu byub ic den.

³¹Ndeꞌ nu Dabi gud lagy yu coz nu gyicy Ñgyoozh. Mniiy nu biñ nu pcuim nu co mbañ de mbecy nim gat mi. Orzeꞌ gyabañ mi. Mniiy nu lardoom wayiyeeñ ñi lugaar zeꞌ nu ryeeñ de mbecy gut, nunu mniiy nu cuerp nim wadz ñi.

³²Mi zeꞌ laab Jesuuz. Bicy Ñgyoozh nu byabañ mi, nunu de̱ ya̱ bzaac urlo̱ la̱ de ndeꞌ.

³³Na Ñgyoozh bicy mi nu zub mi zeꞌ nu zub biñ zub lo zir par dela. Zub mi par yaa beem. Orzeꞌ Ñgyoozh Uz mi briic mi Espiriit Yon nim ni mi zeꞌ. Gal nu mniim, ni bicy mi. Na dela coz nu rzac der ii, nunu dela coz nu reñ der ii, dela nii bruuñ gal lom.

³⁴Gun Dabi walab ub yu gup yu gyibaa gal nu gup Jesuuz. Sinu ub lay mniiy ornu nay: Ñgyoozh nam rab mi Shuaan na: Bzub par yaa be̱e̱, seꞌ mbecy zub lo zir,

³⁵Lat nu gyicya̱ nu gyicy ru gan de losaꞌ yuur, nam, na Dabi.

³⁶’Ndeꞌ nu dela mbecy Israeel rlagy ñi nu gad lagy dey nu Jesuuz, biñ nu biit dey lo cruuz, Ñgyoozh bicy mi nu nac mi Shuaan den, nunu nac mi biñ nu bloo sum nu co mbañ den ―na Bed.

³⁷Ornu güeñ de mbecy de riidz zeꞌ, orzeꞌ tonaꞌ la bicy dey sentiir nañ lardooy. Gazeꞌ nu na dey rab yu Bed nu deꞌ zir de aposht: ―Der bicy na, ¿la coz rlagy ñi nu gyicy de̱? ―na dey.

³⁸Orzeꞌ na Bed rab yu dey: ―Mne̱ꞌ der dela de cyi nu ricy ru, nunu dela der bzu nis der par nu gabe nu nac der mbecy ni Jesucrisht, gun orzeꞌ gyicy sulagy Ñgyoozh de cyi der, nunu gazeꞌ nu cuic mi Espiriit Yon nim ni der.