Ghamatendo 2:8-38

⁸Ebali lelo, chila imunu mna twetwe kowahulika wolonga chokaye?

⁹Wamwenga twolawila Paritiya, Midiya na Elamu, wamwenga wolawila Mesopotamiya, Yudeya, Kapadokiya, Ponto na isi ya Asiya,

¹⁰Na wamwenga wolawa Firigiya, Pamfiliya, Misiri na kaye tsa Libiya tsili habehi na Kirene, wamwenga wetu wolawila Roma,

¹¹na Wayahudi ne iwanu iwengile mne dini ya Chiyahudi, wamwenga wolawila Kirete ne Arabiya. Twetwe wose twowahulika wolonga ipfinu pfikulu pfayatendile Imulungu kwa lugha tsetu iwenyegho.”

¹²Wose wakangawala, wapfuka, weghutsa, “Achi nacho choni?”

¹³Lekeni iwanu wangi wawabetsa, walonga, “Iwanu wano wapatika!”

¹⁴Kuya Petiri kema nawo iwatumighwa wala kumi na yumwe, kandusa kuwalongela iwanu awo kwa kukemelela, “Wayahudi weyangu, na mwemwe mwose yamkala hano Yerusalemu, mleke niwalongele, namwe mtegheletse ghoya chanilonga.

¹⁵Iwanu wano ng'awapatike bae ka pfamlonga. Sambi saa tatu nemitondo!

¹⁶Achino ichilawile chicho chayalongile Yoeli, nabii we Imulungu,

¹⁷‘Imulungu kolonga, mne matsuwa gha utsighilo nitsowamwaghila iwanu wose Ghumuhe ghwangu. Iwana wenu na neghe tsenu watsopeta mbuli yangu, iwasongolo wenu watsakona ghamaono, ne iwabala wenu watsolota tsindoto.

¹⁸Hata iwatumwa wangu pfipfila, wose iwamale ne iwapinga nitsowamwaghila Ghumuhe ghwangu mne matsuwa agho, nawo watsopeta mbuli yangu.

¹⁹Nitsotenda pfihulo uchanya kulanga, ne ipfinu pfa ukukangawatsa muisi, kutsakuwa na idamu, ghumoto na hosi tito.

²⁰Litsua litsoghaluka kuwa chisi, na lwetsi lutsakuwa ludung'u ka idamu, aho ng'ana lipfike litsuwa lila likulu lye utunitso we Imtwatsa.

²¹Ne imunu wowose iyatsolomba kwa taghwa lye Imtwatsa katsokombolighwa.’

²²“Iwanu we Isiraeli, mtegheletse imbuli ino! Yesu wa Natsareti tsakakala imunu yane uwetso iyalangusighwe kuna mwemwe kwe pfihulo, pfinu pfa kukangawatsa ne ipfitango pfatendile Imulungu kuna mwemwe kubitila yeye, ka mwemwe iwenyegho pfammanya.

²³Kulawa mwanduso Imulungu imwenyegho tsakabama Yesu aghoghighwe na mwemwe, namwe mumkoma kwa kuwaleka iwanu wehile wamuwambe mna msalaba.

²⁴Lekeni Imulungu kamtsiliula Yesu, kamkombola kulawa mne usungu we lifwa kwaapfila ng'aidahike bae lifwa limwohe.

²⁵Mana Daudi tsakalonga pfino mbuli tsa Yesu, ‘Tsanimwona Imtwatsa hambele hangu matsuwa ghose Kwaapfila yeye ka habehi hangu Sitsohighisika bae.

²⁶Apfo, ghumoyo ghwangu ghwodeng'elela, lulimi lwangu lolonga kwa kudeng'elela, na lukuli lwangu lutsokala kwa lolelo,

²⁷kwaapfila ng'utsondeka kutsimu bae, ng'utsomleka bae Mwenzeluka wako yole mne likabuli.

²⁸Kunilangusa inzila ye ughima, kutsonimemesa ndeng'elo kwaapfila kwa hamwe na nene.’

²⁹“Wandughu, ndekeni nonge mwatsimwatsi mbuli tsa aba wetu mkulu Daudi. Yeye kafa, katsikighwa na likabuli lyake lyabahano mbaka leloli.

³⁰Lekeni kwaapfila Daudi tsakakala nabii we Imulungu, kamanya ka Imulungu kelaha kuna yeye ka ang'amtendile mtsukulu wake yumwe yawe imndewa ka pfayakalile Daudi.

³¹Daudi tsakalongola kughona agho ighatsotendighwa ne Imulungu, apfo kalonga mbuli tse ukutsilihuka kwa Kiristu Mkombotsi, hala hayalongile, ‘Ng'alekighwe kutsimu bae, wala lukuli lwake ng'alolile bae.’

³²“Imulungu iyo yamtsilihule ayo Yesu, na twetwe twa iwakalangama we chinu acho.

³³Naye Yesu henulighwe na kwikighwa lubali lwa kujilo lwe Imulungu, kabokela Ghumuhe Mwenzeluka kulawa kwa Aba wake ka pfayatulongele. Kuya katughalila Ghumuhe ayo, na acho chicho chamchona sambi na kuchihulika.

³⁴Kwaapfila si Daudi bae iyasolighwe kughenda kulanga, ila yeye kalonga, ‘Imtwatsa kamlongela Imtwatsa wangu, ukale hano hane ubali wangu wa kujilo

³⁵mbaka niwatende wehile wako wawe hasi ha ghamaghulu ghako.’

³⁶“Apfo iwanu wose wa Isiraeli wobamighwa wamanye ghendo, Imulungu kamtenda ayu Yesu imumuwambile mna msalaba yawe Imtwatsa na Kiristu Mkombotsi.”

³⁷Iwanu hawahulike agho, ghawahoma ghendo mmoyo, wawaghutsa Petiri na iwatumighwa wangi, “Ndughu tsetu, lelo tutendatse?”

³⁸Petiri kawedika, “Chila imunu yatsileke nzambi tsake, mbatitsighwe kwa taghwa lya Yesu Kiristu, na Imulungu katsomleghusilani nzambi tsenu. Namwe mtsobokela laghano lye Imulungu, iyo Ghumuhe Mwenzeluka.