Figoli 2:8-38

⁸Ponopa yikuva wuliwuli yufwi tukuvapikana kila mundu mukabila yetu? Yiva wuliwuli, vandu vosi tukuvapikana pavadeta kwa kabila shetu?

⁹Vamonga gati ya yufwi, Vapalisi na Vamedi na Vaelamu na vamonga venikaya va Mesopotamia na Yudeya na Pondu na mkowa wa Asia,

¹⁰na Fulugia na Pamfilia na Misili pamu na mwambu wa Libiya pabehi ya Kileni pamu na vahenja vamonga kufuma Loma,

¹¹Vayawudi na vandu yivalowokili mudini ya Vayawudi, vamonga va Kileti na Vahalabu. Twavosi yufwi tukuvapikana pavadeta kwa kabila shetu milandu mikomi ya Chapanga.”

¹²Vosi vayikanganika na kujuluvala kunu pavayidasha, “Ayi yiva na mana liki?”

¹³Lakini vamonga vakavadanileyi pavadeta, “Vandu ava valovela difwayi!”

¹⁴Petili awolukili pamu na vala lilongu na yumu, akandili kuvalandulila vandu kwa lishu likomi: “Valongu va Vayawudi na vosi yimwikala Yelusalemu, mupikanishi kwa finofu filongu fyangu.

¹⁵Vandu ava valovela ng'odu ngimu yimuyihola, mbona yiva malavila saa ndatu hela?

¹⁶Nakaka milandu ayi yawombili Yoweli mbuyi wa Chapanga:

¹⁷‘Majuva vala va mwishu, Chapanga akudeta, dandivamwayili Mfuki wangu vandu vosi. Vasongolu na vahinja venu davatungi milandu yangu, vafijana venu davaluluti umbuyi wa Chapanga, vavaha venu davaloti milotu.

¹⁸Hata kwa vandumindumi vangu valumi na vadala, danivamwayili Mfuki wangu majuva vala, na veni davatungi milandu yangu.

¹⁹Dagoli filangushilu kumbindi, na pasi pamlima danangushi filoja, dakuvi na mwasi na motu na lyosi tii,

²⁰Lijuva dalighalambuki lwisa, na mwesi dawubyuali kucha mwasi, paliveyi likali hela kufika lijuva lila likomi lya kwisa Bambu.

²¹Apa, mundu yaluva kwa litawa lya Bambu dalowuliwi.’

²²“Vayisilaeli, mpikanishi filongu afi! Yesu wa Nasaleti aveli mundu yalangushiwili kwa yufwi na Chapanga kwa mihilu na nangushilu, ya kuyikang'anika na ndambu Chapanga wavalangushili gati yenu kwa kupitila mweni, kucha wula wumumanyili.

²³Yaveli milandu ya Chapanga mweni, yayilatili kala, Yesu atayiwi mumawoku venu, mumuwulaghi kwa kuvalekela vandu va wafu vamuvangilili mulupingika.

²⁴Lakini Chapanga amshukushili munjifwa, kamlekesha kugoboliwa munjifwa kwanongwa akotoo kuwopiwa na njifwa.

²⁵Dawudi awombili milandu yimwilatili mundu yula: ‘Ndamuwonili Bambu pawulongolu yangu chipindi chosi, kava na nenga mwambu wangu wa mlilu dandikanyiki ha.

²⁶Ndima yangu yikusekilela, kandi lulimi lulumbilila kwa cheleli, na njimba yangu dayiikali yikushuvilila,

²⁷nongwa yuwi Chapanga dawuneki ng'odu nenga kumambi, wala kumlekishela mng'alili waku awoli.

²⁸Kunangusha deha sha unofu, yuwi dawumemeshi nenga cheleli pawuva pabehi na nenga.’

²⁹“Valongu vangu, ngudayila kuvawombela finofu milandu yimupatili mbuyi wetu mkomi Dawudi. Mweni asovili, vamsika na sembi yaki yiva pakaya yetu mbaka nalelu.

³⁰Dawudi aveli mbuyi wa Chapanga, yamanyili kucha Chapanga kamwilapila kucha yumu kufuma mulukolu lwaki dahali wutwa waki.

³¹Dawudi awonili kala milandu dagoli Chapanga kavawombela kushukuka kwa Kilistu Mkombola chipindi padetili: Vamleka ng'odu kumambi na mvili waki uwola ng'odu.

³²Chapanga amshukushili Yesu ayu munjifwa na yufwi twavosi ndi vatovilela va unakaka awu.

³³Mweni pakweshiwili kala na kuvikiwa mwambu wa mlilu, Chapanga katugayila Mfuki Mng'alili ndi ujangi wa Tati, ponopa Yesu katuyitila kala ayu Mfuki Mng'alili. Achi chimuchiwona na kupikana ponopa.

³⁴Mana Dawudi mweni, akwelili kumbindi ha, ila mweni adetili: ‘Bambu amuwombilili Bambu wangu: Uyikali mwambu wangu wa mlilu,

³⁵mbaka ndivagoli vachimdwama vaku vavi kucha chigoda cha kuvikila mawulu vaku.’

³⁶“Vandu vosi va Isilaeli nakaka vakudayiliwa vamanyi kucha ayu Yesu yivamuvangililili mulupingika, Chapanga amugolili Bambu na Kilistu.”

³⁷Vandu pavapikanishili afi, fyavasomili mundima, vavadashili Petili na vala vandundami: “Valongu tugoli wuli wuli?”

³⁸Petili kayangula, “Mupomeli sambi shenu na mubatishiwi kwa litawa lya Yesu Kilistu ili kila mundu awushiwi sambi na mupokeli Mfuki Mng'alili ndi fupu.