Aposel 2:8-38

⁸Boyewak yecha batawa maji noti majiga eecha meejito?

⁹Nota Patia ma, Midia ma, Ilam ma. Nota Mesopotemia nosapek heechir. Nota Judia nosap, Kapadosia nosap, Pontas nosap, Esia nosap,

¹⁰Prisia nosap, Pampiia nosap, Isip nosap, Sairini nosap Libia nosap har tawey, nota heechi ya tawa. Ma kaw Rom akaman heechi yar.

¹¹Nota Ju ma kaw. Nota shebo shebo tar ma kaw Ju ma yechi boboyen herin eena hiki siitiichichu. Ma kaw ye Krit nosap heechi yar. Ma kaw ye Arebia heechi yar. Wowak, nota meejitawey, yecha noti majik God riita harapa otiir boboyek bato.”

¹²Hikisha tari, somoyetari, yecha awasen awasen wohe maji batar. “Boy boboyek otiitawak eeta maji eecha bato?”

¹³Worek, akar ma ye hiki siitiichichar ma yenya wokwoyarek wohega wor, “Yecha wain ukun aniga beyatar.”

¹⁴Worek, Pita rii 11 aposel yechaka eecha siitiichi harapa aya ma mima yenya uwa batar, “Ju ma, kwo Jerusalem akamak tawey, ada bana majin napa wagetey tanak, napa meeji ta.

¹⁵Kwo eecha hik tawey, diita ma ye saka beyatawak. Dii eeta niyega nedii.

¹⁶Wowak Piirapet Joel rii eeta boboyen eecha wor:

¹⁷‘God rii eecha wor: “Komas nedii adapa diita boboyen otiikiita: Ada eeji spiriten eyey yenya gwotiipowkiita. Gwotiipownak, kwoti yikapwa ye maji piirapet yecha batawaga eechaba batakiita. Anapa saniga saniga boboyen kwoti hadiiyey ma yenya mukuchikiita. Kwoti apokosaba ma yepa wa sukwi yakiita.

¹⁸Ayo, kata nedii ada eeji Spiriten eeji wakasa man eeji wakasa miman yenya gwotiipowkiita. Gwotiipownak, yecha eeji maji sawukiita.

¹⁹Ada harapa boboy mayakan howuk nerek otiikiita. Ada nosapen eechaka harapa boboy mayakan otiibakiita. Pi, hirika, he ye eecha takiita.

²⁰Ya niy siikiita. Niiwiika siipa nayim siik piga siikiita. Komas Harapa Ma riiti nedii yakiita.

²¹Eeta nedii kata ma ye Harapa Ma riiti hin habatanak, riipa yenya yesokwa yichikiita.’ Wowak, piirapet Joe rii eecha wor.

²²“Isrel ma, kwota diita maji na meeji. Ada Nasaret Jisas riina bato. God riita riina hisiirek, riita harapa nyegerabo tar boboy mayakan otiir. God riita otiirek, riita harapa siirenoboka eecha otiir. Kwotak otiir kwo hechi hikitar.

²³God riita riiti inyakak mapo hikichi otiirek, Jisas riina kwoti tapak how tar. Riina how harek, kwota riina sowakwor. Kapasek otii tar ma yecha riina mek ji siitii chir.

²⁴Harek, God riita riina awasen yesokwar. Otii yesokwarek, Jisas riiti kapa meeji tawa boboyen ha tawa boboyen riita kwoyavar. Ha tawa eem eeta riina neekikasakech.

²⁵Devit riita diita Jisas riiti majin eecha wor: ‘Ada hecho Harapa Ma rii adaka tawa. Riita eeji mama yepak tawa. Tawak ada akiikasakech.

²⁶Eena eeji inyaka wopu eeta kwoya hikitu. Ada maji batawey, an wopu sato. Ada mabak tawey, ada yihapakatawak Harapa Ma riin kowutu.

²⁷Miita eeji mayin ha tawa eemek saka yeechi heechikiitawak. Miita miiti hehar otii tar Kepi Ma kwopa siitawa eemek saka yeechi heechikiitawak

²⁸Miita eechaba eechaba takiitawa nobo ana mukuchir. Miita adaka eecha tanak, eeji inyaka iipa kwoya hikitakiita.’

²⁹Pita rii kawka eecha wor: “Yaka kumwoy, ada noti wayega Devit riina kwona maji geenyik bakiita. Rii harek, eeta chirek, riiti tiiriimo apa notaka tawa.

³⁰Rii eeta piirapet. Worek, rii God riita riina wochar majin hiki siitiichir. God riita riina wochar, Devit riiti neja por anapa otiiniga aka tabo yima siikiita. Riita tarebaga riiti neja riipa eechaba siikiita.

³¹Devit rii mashi her eeta boboyen God riitapa komas eecha otiikiita, rii Kraist saniyeechi sokwa tawa boboyen eena wor: ‘Riina ha tawa eemek saka yeechi heechirek. Riiti maba saka kwopa siirek.’

³²Diita Jisas riina God riita otii saniyeechi yesokwar. Eecha otiirin, nota her.

³³Riina God riita riiti mama yepak yesokwa yichir. Yesokwa yichi riita riina Holi Spiriten har. Riina wocharin eena har. Ma mima akar majin batawey, no hecho apa riita nona gwotii tawey, kwota meeji taweyn, hechaweyn eena hawa.

³⁴Devit riita diita majin wori, rii hevenek takasakech. Rii eecha wor, ‘Eeta God rii eeji Harapa Ma riina eecha wor, “Eeji mama yepak diika na yi.

³⁵Yichanak, miiti o ana pichawa man ada otiiniga yepa miiti yatii seechitar worebega eecha siikiita.’”

³⁶“Worek, eyey Isrel ma mima sa hiki ta eeta Jisas riina kwota mek ji siitiichiri, God riita otiirek, rii eeta Harapa Ma siir. God rii otiirek, rii eeta Kraist.”

³⁷Ma mima ye diita maji meejirek, yechi bii harapa nomoyar. Nomoyarek, yecha Pita riina anadii aposel yenya eecha woher, “Yaka kumwoy, nota boy shecha otiik?”

³⁸Pita rii awasen wor, “Kwota eyey noti kapasek boboyen na kayek heechi Jisas Kraist riiti hik na uku yeetii ta. Wonyak, kwoti kapasek boboyen rii kwoyava yakiita. Wonyak, kwota God riita ha tawa boboyen, eeta Holi Spirit eena yakiita.