Apostolo 2:8-38

⁸Ma dat par tikatikai da valongore davatane kada lavur tinata, di ga kava dat me?

⁹Dat a Partoi, ma ra Medoi, ma ra Elamitai, ma diat dia ki Mesopotamia, a Iudaia ma ra Kapadokia, a Ponto ma ra Asia.

¹⁰a Prigia ma ra Pampilia, a Aigipto ma diat marama ra papar a Libia maravai Kirene, ma ra umana vaira maro Rom, ma ra Iudaia, ma diat dia lolotu da ra Iudaia,

¹¹ma ra Kreta ma ra Arabia, da valongore diat par, dia varvai ta kada lavur tinata ta ra lavur dekdek na papalum kai God.

¹²Ma diat par dia kaian, ma i purpuruan ra bala i diat, ma dia tir vargiliane diat ba: Ava go?

¹³Ma ta umana dia varkulumai, ma dia biti ba: Dia maur ma ra kalamana vain.

¹⁴Ma Petero i tur, ma diat bula ra vinun ma tikai, ma i manga tata, ma i biti ta diat: Avat a tarai Iudaia. ma avat par ava ki Ierusalem, avat a matoto ta go, ma avat a valongore kaugu tinata.

¹⁵Ava biti, ba go diat dia papaua ta ra nimomo; ma pata, tago i tar lavuvat ika ra pakana bung na malana;

¹⁶go ia ra magit ba ra propet Ioel i ga varvai ure dari:

¹⁷“God i biti: Ta ra mutuaina Ina lolongoi pa ta ra Tulungeagu taun ra tarai par, Ma ra umana natu i vavat, a umana tutana, Ma ra umana natu i vavat, a umana vavina, diat a tata na propet. Ma kavava lavur barmana diat a giragire ra umana ninana, Ma kavava umana patuana diat a ririvone ra umana ririvon;

¹⁸Io, ma taun diat bula kaugu umana tultul na tutana; Ma taun kaugu umana tultul na vavina, ta nam ra bungbung Ina lolonge ra Tulungeagu, ma diat a tata na propet.

¹⁹Ma ina ve tar ra umana magit na kinaian arama liu ta ra bakut, Ma ra umana vakilang ta ra gunagunan ra pia; A gap, ma ra iap, ma ra vual na mi;

²⁰A matana keake na bobotoi, Ma ra gai na gap uka; Ma ra bung kai ra Luluai na murmur, A ngala na bung nam, a bung na kinaian;

²¹Ma na dari, ia nam ba na kail upi ra iang i ra Luluai na ti laun.”

²²Avat a tarai Israel, avat a valongore go ra lavur tinata: Iesu, a te Nasaret, nina ra tutana, God i ga vakilang tar ia ta vavat ma ra lavur dekdek na papalum, ma ra lavur magit na kakaian, ma ra lavur vakilang, God i ga papait ia tana pire vavat, ma avat bula ava ti nunure;

²³nina di ga ongo tar ia, da God i ga kubu ia ta kana mamainga ma i ga nunure value, ava ga ot ia ta ra bolo, ma, ava ga doka ma ra lima i ra tarai vakuku;

²⁴ma God i ga vatut pa mule ba i tar pala vue ra kinadik na minat, tago ra minat i mama vake.

²⁵Tago David i ga tatike ure dari: “Iau ga gire vatikene ra Luluai ta ra luaina matagu, Tago i ki ta ra limagu tuna upi koko ina dadadar;

²⁶Kari i ga ra balagu, ma ra karameagu i gugu, Ma ra pakagu bula na ki nunur,

²⁷Tago pa una nur vue ra tulungeagu ta ra ruarua na tulungen, Ma pa una tul tar kaum Gomgomuna upi na nunure ra mareng na minat.

²⁸U tar vateten iau ta ra umana nga na nilaun; Una vabuka iau ma ra gugu ta ra matam.”

²⁹A tara na turagu, ina tata kapa ta vavat ure David, tama i dat lualua, ba i ga mat, ma di ga punang ia, ma kana babang na minat i ki pire dat gori.

³⁰Tago i ga propet, ma i nunure ba God i ga vatang ia ma ra vavalima, ba na vaki tika na natuna ta kana kiki na king,

³¹i nunure value go, ma i vatang ia ure ra nilaun mulai kai Kristo, ba pa di ga nur vue ara ra ruarua na tulungen, ma ra pakana bula pa i ga mareng.

³²God i ga valaun pa go Iesu, ma avet par ave ga giragire.

³³Ma ba di ga vaki ia urama ta ra lima i tuna God, ma tago i ga vatur vake bula ra vamading tai Tamana, ure ra Takodo na Tulungen, go i tar lolonge nina ava ti gire ma ava ti valongore.

³⁴Tago David pa i ga vana urama ra bala na bakut, tago ia iat i ga biti dari: “A Luluai i ga tatike tai kaugu Luluai: Una ki ta ra limagu tuna,

³⁵Tuk ta nam ra bung ba ina vadiop kaum lavur ebar upi ra ruarua na kakim.”

³⁶Boina ba ra kuba i Israel parika na nunure bulu, ba nam Iesu ava ga ot ia ta ra bolo, God i tar vaki ia upi na Luluai ma na Kristo bula.

³⁷Ba dia valongore go, i pinpidian ra bala i diat, ma dia tir Petero, diat ma ra umana apostolo, dari: A tara na tura i vevet, ava avet a pait ia?

³⁸Petero i biti ta diat: Avat par, tikatikai, avat a nukpuku, ma da baptaiso avat ta ra iang i Iesu Kristo, upi da pun vue kavava lavur varpiam, ma da tabar avat ma ra Takodo na Tulungen.