Atos 22:6-17

⁶—Morarame jytoryhtao Tamaxiku pona, Tamaxiku moe pyra ahtao, tãxiahtao, kaino jetonie saereh nase.

⁷Nono pona epukase. Omi etase. Ynara nase, “Sauru, Sauru, oty katoh ypoetory tõ ryhmãko mah? Samũ kamexipõko mase ya,” nase.

⁸—“Onoky hma?” ase eya, oserepyase. —“Ywy ase Jezu Nazarepono. Oty katoh ypoetory ryhmãko mah?” nase ynororo ya.

⁹—Ymarõkõ noserepyase roropa saerehkary eneryke tyya xine. Yrome aomiry onetara toto.

¹⁰Mame ynara ase, “Oty poko ha?” ase eya. —“Owõko ropa xikihme,” nase ynororo. “Ytoko Tamaxiku pona. Moero awahtao ypoetory enyohnõko ase ãmorepase jomiry poko,” nase ya Jezu.

¹¹—Morarame ezuru a tonukehkase jexiryke, jaroase toto jemary poko, Tamaxiku pona.

¹²Moroto jahtao Anania noepyase ya. Mokyro, Moeze nymerohpyry omipona exikety. Mokyro poko, “Kure,” ãko juteu tõ emero.

¹³Mokyro tooehse ahtao ya ynara nase, “Sauru jakorony, oenutako ropa,” nase ya. —Morara tykase exiryke osenuhmase ropa. Anania enease.

¹⁴Ynara nase ropa Anania ya, “Ritonõpo, kytamurukõ esẽ, omenekase typoetoryme oehtohme, tõmipona roropa oehtohme, Tumũkuru kurã enepotohme oya, aomiry etapotohme roropa oya.

¹⁵Imehnõ tuarõtanohpõko mase enetopõpyry poko oya, aetatopõpyry poko roropa oya.

¹⁶Seromaroro oty eraximãko hma osẽpurihkapopyra, Ritonõpo a oorypyry korokatohme, Jezu Kyrixtu oesẽme ehtohme,” nase Anania ya.

¹⁷—Morarame tarona tooehse ropa jahtao, jotururuhtao Ritonõpo maro, imaro oturutoh tao, juaroro Jezu enease. Ymaro noturuase. Ynara nase ya, “Axĩ ke mya ytoko Jerusarẽ poe. Tarõkõ õmiry etary se pyra exĩko toh mana, ypoko õtururuhtao,” nase Jezu ya.