Aposel 22:6-17

⁶“Ning a han milau e Damaskus, ana tnan kamis, a tnan talapor misaot na langit i hanot kulkulan pa i pil talilis pas iau.

⁷A punga purum ting lapiu, pa a longor a elngena mainla i atai iau mange, ‘Sol, Sol, sur asa u alaulau iau?’

⁸Pa a dekeni mange, ‘Leklek, esi u?’ Pa i keles iau mange, ‘Iau e Iesu, a te Nasaret, ning u alaulau iau.’

⁹Pa tarai ning mila armuri, la oroi a talapor, ika bel la longor a elngena mainla ning i warwara tetek iau.

¹⁰Pa a dekeni, ‘Leklek, asaning ar toli?’ Pa a Leklek i keles iau mange, ‘Ur tur pa ur han utumo e Damaskus, pa dir atai u ana ututnala ning di ka aslang tari sur ur toli.’

¹¹La ning mila armuri la tong benben otnan iau utumo e Damaskus, anasa a matak i kut ana rakrakai a talapor.

¹²“Ning a barsan, a risana e Ananias, a tena lotu momol ning i sira mur asot a Warkuraila, pa a tarai Juda rop ning la kes tingia, la hanrawai koli. I hanot tetek iau,

¹³pa i tur milau iau, i atongi mange, ‘Sol, a tasiklik, ur tai ulak.’ Pa ana mais a kamis ot ning, a matak i tapalas pa a oroi e Ananias.

¹⁴Pa e Ananias i atai iau mange, ‘E God anuna tumtubundala nating ka aslang tar u, sur ur tasman anuna nemnem, pa ur oroi a Tena Tostos, pa ur longor anuna warwara miting na pahana.

¹⁵Pa ur tena warwara talapor anunai tetek a taraila rop ana ututnala ne ning u ka oroi tari pa u ka longor tari.

¹⁶U kes pas asa? Ur tur, pa dir baptais u, pa ur nunung ana risana, sur dir kepsen anum na toltol laulaula.’

¹⁷“Ning a ulak usaot e Jerusalem, pa a nunung ting na rumai a artabar, a oroi a Leklek ana tatatai, i atai iau mange, ‘Tur kapit! Ur han kapit mite e Jerusalem, anasa bel lar kibas anuma warwara talapor hok.’