6“Könanöŋ analmö, Damaskus siti dopdowibiga miaŋgöreŋ yuai kun kewö asuhuyök: Silim bibiŋe miaŋgöreŋ asakmararaŋ ketaŋi kun Suepnöhök wölbilik ewö asuhuba wölaŋ eta turum niŋgiyök.
7Turum niŋgiiga tala gölmenöŋ eta ahöbiga Suepnöhök keu kun kewö asuhui möral, ‘Sol Sol, gi mönö wuanöŋgöra sesewerowero qakŋe al niŋgimakzan?’
8Mi möta meleŋnal, ‘Kembu, gi daŋön?’ Mewö meleŋbiga jiyök, ‘Ni Nazaret azi Jisös, sesewerowero qakŋe al niŋgimakzani, nia mönö mi.’
9Azi nömbuk kaba kingeri, yeŋön asakmararaŋ mia eketmö, keu nöŋgöra jiyöhi, miaŋgö kourukŋi kun qahö mötket.
10Mewö jiiga nöŋön qesiba jial, ‘Kembu, mönö nöŋön denöwö akŋam?’ Jibiga jiyök, ‘Gi mönö dölki wahöta Damaskus sitinöŋ anöŋga Anutunöŋ wani yuaia akŋangö jimawi, mi kunŋan jiiga mötman.’
11Asakmararaŋ miaŋön jeni qeiga jaŋjuŋ aka kinbiga azi nömbuk malgeri, yeŋön böröne memba noaŋgitketka Damaskus sitinöŋ anin.
12“Miaŋgöreŋ azi kun qetŋi Ananaias malök. Yaŋön Anutu göda qeba Mosesgöreŋ Köna keu törörök wuataŋgöba malök. Miaŋgöra Juda ambazip Damaskus malgeri, yeŋön körek gödaŋi ölöpŋi ak waŋgiba malget.
13Yaŋön nöŋgöreŋ kaba kösutne kinda nöŋgöra kewö jiyök, ‘Sol alani, jegi mönö kunbuk tohoyök.’ Mewö jiiga aua nalö miaŋgöreŋök jeni tohoiga uba ehal.
14Ekiga Ananaiasnöŋ jiyök, ‘Göŋön ahakmeme diŋdiŋi solanŋaŋgö Toŋa eknöŋga keu jitŋan jii könömŋi mötnöŋ. Nanine ambösakonini yeŋgöreŋ Anutu yaŋön gi möwölöhöm gihiiga yaŋgö jitsihitŋi möt kutuman.
15Gi wani yuai eka mötzani, mönö mi naŋgöba jiba yaŋgö jitŋe memeŋi aka gölmeŋi gölmeŋi ambazip jeŋine dangunu ewö kinda malman.
16Mewögöra gi wuanöŋgöra mambötzan? Mönö wahöta yaŋgö qetŋi qeta köuluköba jinöŋga o melun mem gihiinga siŋgisöndoki saŋgoŋniga solanima.’ Ananaiasnöŋ mewö jiyök.”
17“Damaskus siti mosöta Jerusalem sitinöŋ liliŋgöba jöwöwöl jikenöŋ köuluköbiga Kembugö alburupŋan (aŋsumbemŋan) nuŋgui kinda imut kun ehal.
Aposol nup meme 22
Aposol nup meme 22:6-17