Apostolo 2:8-38

⁸Â gorodà na jè têrerà, na rà gére tùra na jèpa paijè jècaa?»

⁹Ba gée nabibiu kàra, âna pwa tèpa âboro na rà me gée napô *Judée. Â pwa pàra tàpé na rà me gée na pâ napô—gée Parthes, ma Médie, ma Élam ma Mésopotamie. Â pwa pàra tàpé na rà me gée na jè province kà tèpa *Roma—Cappadoce, ma Pont, ma Asia,

¹⁰â gée na ére mwara wâ Phrygie ma Pamphylie. Â wà pàra tàpé, âna rà me gée napô *Aigupito, â gée na nyi nari napô gée goo na ville Cyrène wâ Libye. Â wà pàra tàpé mwara, âna rà me gée Roma,

¹¹â gée gòropô wâ Crète; â gée napô Arabie.  pwa pàra tàpé gée jaarà, âna rà nye tèpa âji Juif; ma wà tàpé na rà cèikî naa goro ê pwapwicîri kà tèpa Juif.  rà pitawèerirà pâ: «Gona dà majoroé ma jè têre wà tèpa âboro Galilée bèepwiri na rà gére ina naa na ê jèpa paijè ê pâ muru na maina na é pwa wà Pwiduée?»

¹²Â rà dau pò diri, â càra caa tâmogòori cèna rà niimiri, â rà pi-ina tàra pâ: «Dà pai ina wèe ni?»

¹³Êco na pwa pàra tàpé na rà piècaari tèpa cèikî, â rà ina pâ: «Bwa! Rà nye dau ipwirié kaa goro dipâa!»

¹⁴É cimadò wà Pétéru ma wà tèpa 11 *apostolo bée, â é mwa patùrarà, ba na rà tâmogòori bwàti. «Bwa; guwà têre, co tèpa jènereô, ma wâguwà diri na guwà wâni Iérusaléma. Guwà tàpo tàmaa ma go ina bwàti tàwà ê pwina gére tèepaa.

¹⁵Wà tèpa âboro bèeni, âna càra caa ipwirié pwacèwii ê pai niimiri kàwà, ba mwa nye gére 9h dàuru kaa.

¹⁶Bwa! Wàéni kaa i popai kà Pwiduée, na é naigé mee wà *péroféta Joël:

¹⁷Go o mwa naa boopaé ê Nyuâaê kôo naa gò tèpa Ba, na tòotù pwicò. Go o mwa naa popai kôo tà pa èpo paao ma èpo kàwà. Rà mwa tomara too târa inapàpari. Go o mwa paari pâ muru na nyuâa tà pa èpo dopwa kàwà. Go o mwa patùra tèpa ijiao kàwà naa na naurune.

¹⁸Go o naaboo Nyuâaô, na pwi pàara-bà, naa goo pâ ênawéna kôo, pa ilàri ma paao. Rà mwa picémara popai kôo.

¹⁹Go o nama tèepaa pâ muru na ité na càcaa mu côo naa gopaérenao ma naa gòropuu. Too ânye ma mu. O câé caa té tòotù. Ba é biié ma bàutê O mii parui pwacèwii domii. O cau coo diri béaa kâra pwi tòotù —tòotù kà Pwi Ukai. Nyamu ma pwényuâa pwi tòotù kôo-bà.

²¹Ée mwa udò awé wà pwina ée mwa todòo na pwi tòotù-bà!» Joël 3.1–5

²²É ina mwara wà Pétéru pâ: «Tèpa âboro *Isaraéla, tàpo tàmaari ê popai na go ina tàwà: Wà Iésu pwi âboro Nazareth, âna wà pwi âboro na é jèe tàmara pitòrigarié wà Pwiduée.  wà Pwiduée, âna é jèe paarié tàwà, ba é nama é pwa ê pâ *câmu kâra pàtàmee naa nabibiu kàwà, na guwà pò goo.

²³Wà pwiibà, âna pinaaê tàwà, â guwà pwa ma é bà, ma guwà nama rà tanamiriê naa goro *kurucé wà tèpa âboro èpà. Êco na é mara tâmogòori diri pwiibà wà Pwiduée, â nye câbawâdé kêe na wàrapwiri.

²⁴Â gée na càùru ê maagé côo kà Iésu â é upaé jii ê pwâra bà, â é pawâroé côwâ. Ba nye ticè pàtàmara ê pwâra bà naa gooé.

²⁵Ba é jèe tàmara picémaraê wà *Davita na é ina pâ: Go nye tà côo taaci wà Pwi Ukai béaa kôo. É tâa gòro âji îô, â câgo caa gùmagù.

²⁶Go ipwàdée ma picagòtùé! Ba wiàna go bà, â o nye tà wâdé naa gooò.

²⁷Go ina têe pâ: Gà jèe pitòrigario ma go pwi ênawéna'gà. O câgà caa panuâ nyuâaô ma é tâa na aubà. O câgà caa panuâ naiio ma o wai ma botére.

²⁸Gà jèe paari tôo ê naigé mara wâro. Go o mwa ipwàdée, ba gà tà wâjaao!» Psaume 16.8–11

²⁹É tòobàra pâ wà Pétéru, â é ina tàra pâ: «Tèpa jènereô, câgo caa piwâ na go ina ba pwéelaa tàwà pâ: Wà pwi jojoorojè Davita, âna é bà, â pwàniriê, ba jè bwaa tà côo nabàni ê bwàmu kêe, naa jaajè.

³⁰Êco na é nye pwi péroféta, ba é pame ê popai gée jaa Pwiduée â é nye tâmogòori ê *auipwataâboro kà Pwiduée na é ina têe pâ: Go o mwa pitòrigari cè pwi âboro caapwi gée goo wà tèpa gòobàragà. Ée mwa tâa na autâa'gà. Ba wâgo na go o mwa pwa. Psaume 132.11

³¹«Ûna é ina pwiri wà Davita, â é mara ina wà pwi *Mesia na ée mwa me. Ûna é ina pâ, o câé caa panuâê naa na aubà, â o càcaa wai ma botére ê naiié, â é inapàpari ê pai wâro côwâ kà pwi Mesia.

³²Â wà pwi Iésu na go gére ina tàwà, âna wàé kaa pwiri, ba wà Pwiduée, âna é jèe pawâroé côwâ gée na aubà.  nye wàibà kaa tèpa *paâjupâraê diri.

³³«Â é naaê too wà Pwiduée Caa naa gòro âji îê ba na é pitûâ kâra diri pâ muru â é naa têe ê Nyuâaê Pwicîri, na é jèe nabwé ina béaa. Êkaa na naa boome naa gòbà ê Nyuâaê Pwicîri, wàra na guwà gére côo ma têre nabà.

³⁴Ba wà Davita, âna câé caa too naa napwéretòotù, êco na é ina pâ: Popai kà Pwi Ukai, Pwi Ukai Pwiduée na é patùra Pwi Ukai kôo: “Gà me ma gà tâa ni. Tâa ni gòro îô étò. Go naa tâgà ê pitûâ. O pwamainagà awé. Go nama gà còogai tèpa ipaa dàgà.” Psaume 110.1

³⁶«Wâdé na wâguwà ê Ba Isaraéla, âna guwà câbaâjupâra pâ, wà i pwi Iésu na ia guwà tanamiriê naa goro kurucé, âna é nama é pwi Mesia ma Pwi Ukai wà Pwiduée.»

³⁷Na rà têre ê popai bèepwiri, â cau tatée ma tabagéaa diri ê pwâranümarà, â rà ina tà Pétéru ma tèpa apostolo bée pâ: «Tèpa jènerebà, na bà pwa dà?»

³⁸Â é ina tàra wà Pétéru pâ: «Guwà pinünüma ma guwà biiwà. Â guwà nama *upwaawà jècaa, naa na nee wà Iésu *Kériso, ba na o pwanauri ê pâ èpà kàwà, â na guwà o tòpi ê âraimeai, i Nyuâaê Pwicîri.