Tinavete 2:8-38

⁸Ba vegua meke boka zama ni tu rini sari hopeke nada vinekala, meke boka avosi tu gita?

⁹Ura gita si hopeke mae guada tu pa Patia, Media, Elami, Mesopotemia, Ziudia, meke pa Kapadosia, Ponitasi, meke pa Esia.

¹⁰Kaiqa pule si mae gua pa Pamipilia, Pirizia, Izipi, meke koari na pinaqaha popoa pa Libia, sapu tata pa Saerini. Kaiqa gita si mae guada tu pa Roma.

¹¹Na tie Ziu si gita, meke na Zenitailo d tugo pu kekeredi la pa linotu Ziu. Kaiqa gita si mae guada tu pa Kiriti, meke pa Arebia d, ba avoso betoi tu gita doduru sari na tiṉitoṉa arilaedi pu evaṉi sa Tamasa, gua saripu korapa zama ni rini sara!” gua si arini.

¹²Meke pa dia minagasa, na ninunala, si lopu boka beto vari nanasi sarini, “Na sa si korapa ta evaṉa hie?” gua si arini.

¹³Ba kaiqa arini si va sisire, meke zama, “Ai, na naponapo ba sara!” gua.

¹⁴Meke gasa turu se Pita somanae koa ri ka manege eke apositolo, meke zama va ululae guahe si asa koari na kobi tinoni, “Gamu kasa na tie Ziu turaṉaqu, meke gamu doduru pa Zerusalema, mi avoso mae; hiva tozi va bakalani gamu rau sapu gua ta evaṉa hie!

¹⁵Sari tie hire si lopu naponapo, sapu gua balabala ia gamu. Na tiqe sia koloko munumunu mo sa totoso hie.

¹⁶Lokari, ura hie si zama nia sa poropita Zoili sapu guahe:

¹⁷‘Zama sa Tamasa: Gua hie si kaqu tavetia Rau koari na rane mumudi: Kaqu zoropo gore la nia Rau koari doduru tie sa Maqomaqoqu. Meke sari na tumia koreo na vineki vaqura si kaqu korokorotae, meke sari na tie vaqura si kaqu dogori sari na dinogodogorae variva magasadi, meke sari na barogoso si kaqu putaputagita.

¹⁸Koari na rane sara, si kaqu zoropo gore la nia tugo Rau sa Maqomaqoqu, kamo la gua tu koari na nabulu, sari palabatu na barikaleqe, meke kaqu korokorotae si arini.

¹⁹Kaqu evaṉi Rau sari na vina gilagila variva magasadi pa maṉauru panaulu meke pa pepeso panapeka; kaqu ta evaṉa sa minate, meke sa nika meke tuṉaha nika moatana. Pa maṉauru si kaqu tava huporo sa rimata, meke kaqu ziṉara guana ehara sa sidara, sipu lopu ele kamo sa rane arilaena meke variva holoqoruna tanisa Baṉara.

²¹Ba sari doduru pu tepa la koasa pozana sa Baṉara, si kaqu ta harupu!’ gua.

²²Gamu kasa na tie Izireli, mi avoso mae i sari na qua zinama: Va sosodea Tamasa sapu garunu mae nia Sa se Zisu, koari na tinavete variva magasa meke na vina gilagila pu taveti Tamasa koa Sa pa vari korapa mia. Gamu ba tumae nia telemia si hie.

²³Ura ele vizatia Tamasa pa Nana hiniva soti si pude kaqu ta luara vatu koa gamu se Zisu, meke pa tinokae tadi tie kaleadi si va matea gamu si Asa pa korosi.

²⁴Ba ele va toa pulea Tamasa si Asa, meke vata rupahia Sa koasa tinasigitina sa minate, sina lopu boka sa ṉiniraṉira tanisa minate pude pusi hola ia si Asa.

²⁵Ura guahe si zama nia e Devita koasa guguana Sa: ‘Dogoria rau sapu koa pa kenuqu rau doduru rane sa Baṉara. Koa tata koa rau si Asa, ke lopu kaqu matagutu si rau.

²⁶Gua asa ke qetuqetu hola sa buloqu, meke sari na qua zinama si ta siṉie qinetuqetu, meke be mate si rau, ba raṉe valeanigo rau si Goi,

²⁷sina lopu kaqu veko hola au Goi si rau pa lovu, meke lopu kaqu va malumia Goi sa mua nabulu Hopena pude muzi tinina.

²⁸Ele va dogoro nau Goi sa siraṉana sa tinoa, meke va siṉi nau Goi sa qinetuqetu pa kenumu,’ gua.

²⁹Ke, kasa tasiqu, maqu tozi va bakalani gamu rau sapu se Devita sa tamada si mate meke ta pomunae si asa, meke sa lovuna sa si korapa koa nana mo koa gita tani pa rane ṉinoroi.

³⁰Ba na poropita tugo se Devita, meke ele gilania nana sa sapu ele tokoro vekoa Tamasa sa vina tatara, sapu keke koari na tutina e Devita si kote baṉara hobena.

³¹Na dogoro va kenue ia e Devita gua sapu kote evaṉia sa Tamasa, ke zama nia sa sa tinuru pule pa minate tanisa Karisito d, sipu zama si asa, ‘Lopu ta veko hola pa lovu babe muzi sa tinina,’ gua.

³²Meke se Zisu hie si ele va turu pulea Tamasa, meke gami doduru hire si dogoro soti matamami!

³³Ta ovulu sage la pa kali mataona sa Tamasa sa Tamana si Asa, meke vagia Sa koa sa Tamasa sa Maqomaqo Hope gua sapu ele va tatara nia Sa. Ke zoropo vura mae nia Sa gua sapu dogoria na avosia gamu kamahire.

³⁴Ura se Devita si lopu sage la pa Maṉauru ba zama nia sa sapu guahe: ‘Zama sa Tamasa koasa qua Baṉara: Mu habotu pa kali mataoqu,

³⁵osolae vekoi Rau sari Mua kana pa kauru Nenemu!’ gua.

³⁶Gua ke mi tumae nia gamu doduru tie Izireli si hie: Se Zisu hie sapu va matea gamu pa korosi, si ele va evaṉae nia Baṉara, meke sa Karisito d sa Tamasa!” gua se Pita.

³⁷Sipu avosia ri na kobi tinoni sapu gua asa, si ta duaṉa hola sari bulodia. Ke nanasia rini se Pita, meke sari kaiqa apositolo, “Kasa turaṉa mami, na sa si kote tavetia gami?” gua si arini.

³⁸Meke olaṉa la koa rini se Pita, “Hopehopeke gamu doduru si mani kekere, mani ta papitaiso pa korapa pozana e Zisu Karisito, pude kaqu taleosae sari mia sinea, meke kaqu vagia gamu sa vinariponi sapu sa Maqomaqo Hope.