HECHOS 2:8-38

⁸Paykunaka manami yachansapachu ñukanchikunapa rimananchikunata. ¿Imashnatí kunan atipansapa rimananchikunata rimayta?

⁹Ñukanchikuna chikan chikan llaktakunamanta shamushpanchikuna rikchakmanta laya rimanayukkuna kanchisapa. Partia llaktamanta, Medya llaktamanta, Elam llaktamanta, Mesopotamia llaktamanta, Judea partimanta, Kapadosia llaktamanta, Ponto llaktamanta, Asia partimanta shamushkanchisapa.

¹⁰Chaymanta Frigia llaktamanta, Panfilia llaktamanta, Egipto llaktamanta, Libia partimanta, Sirene llaktamanta ashwan karu llaktakunamanta shamushkanchisapa. Roma llaktamantapish shamushkanchisapa.

¹¹Sukkuna judiyu kasta kanchisapa. Sukkuna mana judiyu kasta kashpa judiyuyashkanchisapa. Chaymanta Kreta llaktamanta, Arabia llaktamanta kanchisapa. Chashna chikan chikan llaktakunamantapish kashpanchikuna uyarinchisapa chay Galileamanta runakuna rimananchikunapi Tata Diosta alabaykaptinkuna.

¹²Chashna chay runakuna willanakushpankuna sukaman almirashpankuna tapunakurkansapa: —¿Imanansapatí kay runakuna chashna rimakushpankuna?

¹³Chaypina sukkuna asichishpankuna willarkansapa: —Chay runakunaka machadusapami.

¹⁴Chaymanta Pedruka chay chunka suk yachachikukmasinkunawan tantalla shayarirkansapa. Chaypina Pedruka chay aypa runakunata sinchita willarkansapa: —Judiyumasinikuna, Jerusalenpi kawsakkuna, allita tukuy willanaynita uyariychi yachanaykichipa imata ruraykanaynita.

¹⁵Kankuna machadu kanaynikunata rimaptikichipish manami machaduchu kanisapa. Tutapachara kaptin manara ni pi machanmanrachu.

¹⁶Ñawpa yachachikuk Joel rimashkanta kawaykankichi. Payka killkarkan:

¹⁷“Tata Dioska riman: Chay tukunan diyakunapi tukuy kreyiwak runakunaman Espirituynita kachasha. Chaypina ullku wambraykichi warmi wambraykichi ñuka willanaynita yachachikunkasapa. Waynakuna rikchadu kashpa muskuyninkunapishina almirana layakunata kawankasapa. Tatakuna muskuyninkunapi almirana layakunata kawankasapa.

¹⁸Chay diyakunapi kreyiwak ullkukunaman warmikunaman Espirituynita kachasha. Chaypina paykunaka willashkaynita yachachikunkasapa.

¹⁹Chaymanta sielupi manchana layakunata rurasha kawanaykichipa. Allpapi yawarta ninata kusnita kawankichi.

²⁰Manara manchanapa laya llipyashpa shamuptinira inti tuta likidu tukunka. Killapish puka likidu yawarshina tukunka.

²¹Manara shamuptinira tukuy runakuna perdonanaynipa mañawaptinkuna perdonashasapa.”

²²Chaymanta Pedruka chay tantanakudu runakunataka yachachiyllapi katirkan: —Judiyumasinikuna, willaptini uyariwaychi. Allita yachankichi Tata Dios yanapaptin Nasaret llaktamanta Jesus aypa manchana layakunata milagrukunata rurashkanta. Chaykunawan Tata Dios allita kawachishurkankichi paymanta shamudu runa kananta.

²³Jesus tukuy chay milagrukunata ruraptinpish kankunaka payta pusharkankichi mana alli rurak runakuna kruspi chakatashpa wañuchinankunapa. Ñawpamantapacha Tata Dios yuyarkan payta chashna wañuchichinaykichipa.

²⁴Kankuna wañuchichiptikichipish Tata Dioska paytaka kashkan kawsachimurkan. Tata Dioska mana nima munarkanchu wañudu kiparinanpa. Chayrayku kawsachimurkan.

²⁵Chaymanta chay ñawpa kamachikuk David kashna killkarkan: “A, Tata Dios, yachani tukuy tiempu ñukawan kanaykita. Kan laduynipi kaptiki mana nimata manchashachu.

²⁶Chashna ñukawan kaptiki sukaman kushikushpa kawsaykani. Kushikuypuru kantani. Yachani wañushpaynipish kawsamunaynita.

²⁷Wañuptini mana munankichu pampadu kiparinaynipa. Nima munankichu kuerpuyni usunanpa kanpa wambrayki kaptini.

²⁸Kawachiwashkanki kashkan kawsachimuwanaykita. Kanwan tantalla kawsashpayni sukaman kushikusha.”

²⁹Chashna willashpa Pedruka chay tantanakudu runakunataka willaysapallapi katirkan: —Wawkinikuna, paninikuna, kunanka allita uyariwaychi mana arkachishpa willaptini. Chay ñawpa awilunchi Davidka chay salmota killkashpa mana kikinmantachu rimarkan. Payka wañushkanami. Chashna wañuptin pamparkansapa. Chay pampashkankunaka kunankamanlla tiyan.

³⁰Davidka alli yachachikuk kashpa yacharkan Tata Dios jurashpa sukaman allita willashkanta: “Kanpa miraknikimanta sukta churasha kamachikuk runa kananpa.”

³¹Chashna Tata Dios willaptin Davidka iden kawaykakshinami yachachikurkan Tata Diosmanta shamudu runa wañushkanwasha kawsamunanta. Yachachikurkan mana pampadu kiparinanta nima kuerpun usunanta.

³²David rimashkanshina Tata Dioska Jesustaka kawsachimurkan. Kawsamushkanwasha ñukaykuna payta kawashkanisapa. Kunan chayta yachachiykaykichi.

³³Kawsamushkanwasha Jesuska Tatan Diospa alli ladunman rirkan chaypi paywan tantalla tukuy layapi kamachikunanpa. Chaypina Tatan Dioska payta kunanpa willashkan Espiritunta kurkan. Chashna kuptin Jesukristuka ñukaykunatapish Espiritunta kuwashkasapa. Chayrayku kunan chikan rimanakunata atipaykanisapa rimayta. Chayta kankunaka kawashkankichi uyarishkankichi.

³⁴Chay ñawpa awilunchi Davidka chay salmota killkashpa mana kikinpachu rimarkan. Payka mana kawsamurkanchu tukuy kuerpuntin sieluman rinanpa. Chayrayku suk salmopi Tata Diosmanta shamudu runapa rimashpa killkarkan: “Tata Dioska Señorninita willarkan: ‘Alli laduynipi shamuy tiyarik chay chiknishuk runakunata saru saru ruranaynikaman.’ ”

³⁶Kunanka tukuy kankuna judiyu runakuna sukaman allita yachaychi: Kruspi chakatashpa wañuchichishkaykichi Jesustaka Tata Dios churashkana ashwan sinchi kamachikuk kananpa. Payka Tata Diosmanta shamudu salvakuk runami.

³⁷Chashna Pedru yachachikuptinkuna chay tantanakudu runakunaka llakishpankuna sukaman turbakurkansapa. Chaypina Pedruta yachachikukmasinkunata tapurkansapa: —Wawkinikuna ¿imatatí rurashasapa?

³⁸Pedruka aynirkansapa: —Tukuy mana alli rurashkaykichimanta wanaychi Tata Dios perdonashunaykichipa. Chaymanta Jesukristupa shutinpi bawtisakuychi. Tata Dios perdonashushpaykichi Espiritunta kushunkichi yanapashunaykichipa.