Aposolo Jaŋere Binaŋ 24:8-20

⁸Ehuc dâŋko râembiŋ ŋic i jaŋe gorao fisi fuaniŋte mujarewec. Eme nâŋe dâŋ gazaŋgopeneŋ i go gahac mu esâic ecnehuc fuŋne sâcne bataniŋkecmu.”

⁹Dâŋ iŋuc mume Judaŋic jaŋe e bafickehuc dâŋticne dopeckembiŋ.

¹⁰Eme kiazi Paulo mezi sâsâc ecneme dâŋ ʒiŋuc muwec: “Go mâreŋ ʒira jara bocjaha kia juekic i manasuhuc dâŋnane manabâc tâmiric mupemu.

¹¹No Jerusalem haeo Anutu mai ecnepemurâ ferâ juwarekupe ʒoaŋ gie bapa 12 sawa ekac, go dâŋ irec maŋjahec erâ ŋic esâic‐jopatec gazaniŋmu.

¹²No taha ufuŋko me mitific gâcnao me miti haeo ŋic jaŋehec mitire mu qaqatarac me ŋic maŋbâiŋ eejare i moc mi epe honecnumbiŋ.

¹³Ŋic ʒizi qoricnuhuc dâŋ gazaŋgopieŋ, irec fârine wemocko gowatuniŋmu.

¹⁴Erâ moc mufua‐garepe manac: Hata ɋâri sureeŋgopieŋ i âteekopac mueŋgopieŋ, ine jâmbomac eekopac. Erâ jaŋere dâŋmiti bajuhuc sâcmutâc dâŋqâhâcko miti qâreŋkekicne fokac â porofete mu qâreŋ embiŋ i manape fârine ehame mimiŋnefâc‐nâŋec jaŋere Anutu kiŋaŋ qacneekopac.

¹⁵Erâ juku ŋic biaŋne â sâqocne hâmockonec fafahare maickeocmu, irec ŋic keci jaŋe â no mâmâc mamanac jueŋgopeneŋ.

¹⁶Iŋuc ehuc Anuture maio â ŋicmaio bahacmâc jupemurâ rucnane bahuc jaha juekopac.

¹⁷“Eme no jara bocjaha mâreŋ wiwicko juhuc mitire moneŋ qânusuckeku Jerusalem haeo ŋic âgofâc‐nâŋec jaŋerao warepo.

¹⁸Erâ bâzi ririkere baʒawierâ taha ufuŋko ferâ juhape bâfuacnumbiŋ. Ira ŋicguruo juju me dâŋfânâŋ sâkohec juju ine arictac.

¹⁹Asia mâreŋkonec Judaŋic gâcne jaŋe ine iŋuc embiŋ. Jaŋe hâcne nore bahac moc manaŋgopieŋko gorao fisirâ mutaniŋkenʒapiŋ.

²⁰Me micne bapa tutumaŋko domahape nore bahac moc bâfuambiŋko ŋic domaŋgopieŋ ʒizi gazaniŋ.