Apostolo 24:8-20

⁸ebu ani ꞌuteꞌeteꞌe azaḡa zinaꞌa, 'Feliki vaḡe onamoꞌi!' reiro. Ḡae ḡatanaꞌa ane ḡadinine, emeḡeꞌa ḡae mazao ꞌutataꞌaꞌe niduꞌa ḡoere huga rae zamariꞌuma.”

⁹Iuda azaḡa zuni Teretulo ḡoere atoneꞌenaꞌa “Aniꞌa ḡoerataꞌaꞌe ḡoere huga” rae reiro.

¹⁰Ebu gavana vazeḡaniꞌe Pauloꞌa ḡoeroga veize vadini hina taꞌoro harotene, Pauloꞌa ḡoere iḡuniro, raenaꞌa, “E edeḡa, ḡa muri ḡehaḡa Iuda azaḡa kotazinutaꞌaꞌe. Eꞌebanoꞌo eꞌe matuꞌuheta, ḡae ubumao eḡe none ḡoeꞌa rae fureneꞌohe.

¹¹E, mada gaubanana zu aheu fare (12) onamiroteꞌea, Badiꞌa kurano hanoga veize Ierusalema neḡa itiro. Ḡaeꞌa ḡadimu vaḡine, eꞌe hariḡa zogone ederiꞌuma.

¹²Eꞌe dibuꞌo neḡa zamaḡano vaze teite mene taꞌiro titido, ga Iuda azaḡa kuru neḡa zamaḡano ga Ierusalema neḡa zamaḡano vaze ḡuḡuvaḡa mene tutuze harae tauḡitauḡido. E zeḡe ubumao ꞌuguḡa haḡaiḡa mene haḡaido.

¹³Zu zeḡeꞌa izidi rae furenateꞌe haḡaiḡa horoniroteꞌe vazeḡa oꞌoꞌa. Eꞌanoꞌo ḡoereze mae ḡihinoga mene idaḡa.

¹⁴Rehano e ꞌadi rae fureneꞌohe. E ibi ꞌahoga, zeḡeꞌa veꞌoḡa raꞌeteꞌe ibiḡano emeḡe vouḡa Badiꞌa kurano hauꞌohe, ebu Mose goro ḡoeꞌa zu peroveta azaḡaniꞌa tiroteꞌe ḡoeꞌa niduꞌa mae ḡihineꞌohe.

¹⁵Ebu zeꞌe, vaze manoḡa zu sauꞌa niduꞌaniꞌa runeonoꞌo bare ḡabodiꞌuma raꞌeteꞌe madaḡa zamareꞌenaꞌa, guhineꞌohe. Ebu eḡe zuni eꞌe guhineꞌohe.

¹⁶Eꞌanoꞌo iḡaiḡa Badiꞌa zu vaze ubumao zamaheꞌe deheḡano radoga veize haḡai manoḡa haḡae huneꞌohe.

¹⁷E muri nu haba ꞌahoga ꞌahogano radiunuteꞌe enogano, bare Ierusalema neḡa itiro, Iuda azaḡa danaze moni zenoga veize, zu Badiꞌa dibuꞌo hanoga veize.

¹⁸E deheheꞌeteꞌe haḡaiḡa hauḡadu dibuꞌo neḡano dibuꞌo hau radiuꞌenogano, Iuda azaḡaniꞌa horohiro. Eꞌe zamaḡano eḡe uhiḡanoꞌe vaze ḡuḡuvaḡani oꞌoꞌa zu harae tauḡitauḡoga zu oꞌoꞌa.

¹⁹Eꞌe zamaḡano Iuda azaḡa Asia habaꞌanonoꞌo onairotaꞌa zuni eꞌea radiro. Eḡeꞌa haḡai sauꞌa haḡairo rae reifone, zeḡeꞌa onaadu ḡae mazao eꞌe rae furenifo.

²⁰Ga Iuda kanisoro azaḡa nuꞌonuꞌo zamao mae ohohadu ḡadihiroteꞌe zamaḡano, nagi haḡai sauꞌa eḡe mazao horoniroteꞌe, Iuda azaḡa ꞌadaꞌa rae furenine manoḡa.