Im̃auano Nalo 24:8-20

⁸Mia ver jau kovika den naio ga, mia komijikia kojog ka vite nalo nam̃a nuberenio nalo abe riano ga.”

⁹Ana bogo napano naio jom̃a milili jibe na, ana kulo Ju dolu nalo ajum̃a ap̃iliṽilig pariparilo, aju aberverenio aberinavo “Nina naruei, jibe na naruei, be riano ga na.”

¹⁰Ana iorou kanio, parinio tubo nei naio bitikar Pol ana jian bogo banio ka naio mijikia river kiano verdop̃eiano. Naruei Pol naio berinavo “Parinio Tubo Veliks, jibe ka napano jau kejibure kumemi ea buruvenuo nei ka yuka telabo abarlaka ruei, mia najaaro ga ka notumolu notukamu ea miramo ka nodu kanaku verdop̃eiano.

¹¹Mia kiniou nejidom never kaso ga, ka nabavin yako Yerusalemo maka vesiou leleio. Ver jau kovika vatitigio ga den tomu nalo, mia jau keleal ka kiniou naban ea vio na ka ga nava novolkouo ea Atua Kunuano Lu, maka rivokar bogoti ve duelimo ba veri 14 vo.

¹²Mia bogo napano nojoa vio na, mia maka aial ka napano kiniou nemila vite tai. Maka nala siniabu vija toro tai, a maka neilili van tomu tai neverenio nalo amila vite tai. Ea Atua Kunuano Lu, p̃eli na ea yimo nalo na volkouano nalo, p̃eli na ea vio be na ea komeli, mia maka nala titai leleio.

¹³Mia vite nalo napano nalo aberii kaso vonganei na, ka kiniou nemila jibe na jibe na, nina be iliano na kanalo taara ga na, mia nalo maka aver vite tai ka rikurukar kialo iliano vanso, ka rila kanalo iliano nei rive riano.

¹⁴“Mia vite takurano ga kiniou nemijikia najamo kanio, nemijikia never kaso neverenio, nao, kiniou nemila nina. Vite na, napano kiniou nojom̃a najakii M̃arabo Vou nei, napano m̃a aberenio nalotuano dolu. Mia maka tibe na, bior ea m̃arabo na, kumemi numitu nubolkouo ka Atua takurano ga, nina Atua na korobimemi tormoruo nalo kanalo, numitu numonea ga vite nalo napano kenememi tuboiano berenio p̃eli napano kenememi naverialiano nalo abivitauiaio.

¹⁵Mia jakii vite nalo na, mia kiniou nojo ga ban Atua, be verare ga ka napano nalo bunu aju abitikuku kanio, ka mia naio rila tomu nalo nonovio ameul bereio ea nam̃ariano, nina nalo napano amemedu ea mirano, a nalo napano maka amemedu ea mirano.

¹⁶Naruei bior kiniou nemijikia ka mia Atua rila tibe na, mia maka nosidomii ka mia nela re bajago na bova tai leleio. Mia bogo nonovio ga, nemila vonvon toru laka ka mia vite tai ve telisu tul re kiniou bogo tai, river ka nemila bova ea Atua mirano p̃eli na tomu nalo miralo.

¹⁷“Mia yuka tealo barlaka ruei, mia nojom̃a naban ea buruvenuo dolu nalo, mia karina, vonganei ga, ana nebinimei bereio ea vio Yerusalemo. Mia tomu nalo na laka yako ajuvanini ijaiano tai ka rijai kenememi tomu nalo na vio Yerusalemo, ana na kiniou nabar ijaiano nei nebinimei, nabar banlo, a nejidom nava nala sida bunu ea Atua Kunuano Lu.

¹⁸Ana bogo na m̃a kiniou nojoa Yimo Lu, nemila sida na meravoano bisi, ana na nalo na abinimei amial kiniou. Ka bogo na, maka bunu ve toro dolu tai atu rivija kiniou, mia maka ve iliano p̃eli na uetubaiano leleio, mia iorou kanio, ana kulo Ju nalo tealo na vio Esia abinimei, ana nalo naruei ajikar siniabu nei.

¹⁹Mia nalo napano abe burupati na vite nei, ver asidomii ka kiniou namila vite tai bova, mia bo kanio ver nalo bunu atu rivija kito ea vio nei banei ka averialio kaso, mia maka neialo.

²⁰Ver p̃eli, mia bo ka jau kalavonio ka kovika den nalo dolu napano aju na, ka bogo napano aburu kiniou naba nabavin ea kanalo komeli, mia amileal kiniou nemila venia. ?Kiniou nemila vite venia na maka rimemedu, p̃eli na neber iliano venia na maka rivu? Nejidomiio-o, maka lele garuei.