Acts 24:8-20

⁸Abisiri yai kom yebo ikesim, kuna toirubai kata awaika ka bikunumakei wai basuna kuna panani.”

⁹Jew biyisi Tertullus si baisi ba Paul si kunumakei si wona, “Awaika ereonowana i sisiyei wai bisuwona.”

¹⁰Maranai governor Paul i rutapiyei iti sisiya wai, i kaobeyei, “A kuiri kata bodu pesarisi niko dobu kamonai kom kui bibuibuiya, kona kairavina nuwasisirai au potu ana ravi.

¹¹Pipiya kuna toirubaisi wai sina wonim kata karaku kao 12 si kakaba ba a gae ku Jerusalem ata bopepeta.

¹²Jew biyisi kega si pananiku kata kesana kotoi, yabata God ana yove kamonai kai kawapata, kona birauwa Jew biyisi asi dugu yovena kamonai a dagui, kona memena meyaga kamonai.

¹³Ba yebo kega rubana sini beyim kata karaku nikosi kunumaka wai bisuwona.

¹⁴Nikona a bisuwonim kata wawata asi God a bopepetei ba yauku Keresiyana ketana a bisununuri, saba te wonawona kwaruma. Saba yebo Moses ana kairuwana ba peroperoveta, awaika ereonowana si kirumi wai a bigeruwei.

¹⁵Ba yauku au nota maragasina God karinai nikosi pipiya rutainisi, kata pipiya gairesi ba goyosi asi bomsiri mena kairavina.

¹⁶Nikona kairavina mamanina a wosewosei kata nuwanuwaku ba au wose wai totorisi God matanai ba pipiya kurisi.

¹⁷Bodu biyamo a nesaira murinai a veramaga, ku Jerusalem au pipiya moyamoyakisi ata puyoisi ba ata suwara God kurina.

¹⁸Nikona God ana yove kamonai kona a wosewose, ba a bobunaga meyiku kata ata bopepeta Moses, ana kairuwana nununai ba si pananiku. Kona maranai wai koroto kega ba reso ba binuwamotom kega.

¹⁹Saba Jew biyisi mutusi Asia kupurinai si botu wai kosi yabata, ikesisi sita botu kurim kata asi bikunumaka sita berim.

²⁰Nikosi babada sita wonim kata yauku au goyona awaika si panani, maranai Sanhedrin naonai a msiri ba si kasekasemainiku.